ਮੋਗਾ: ਪੰਜਾਬ ਦੀ ਅਕਾਲੀ ਸਰਕਾਰ ਸੂਬੇ 'ਚ ਵਿਕਾਸ ਦੇ ਦਾਅਵੇ ਕਰ ਰਹੀ ਹੈ। ਇਸੇ ਵਿਕਾਸ ਦਾ ਹਵਾਲਾ ਦਿੰਦਿਆਂ ਸੂਬੇ 'ਚ ਤੀਜੀ ਵਾਰ ਅਕਾਲੀ-ਬੀਜੇਪੀ ਸਰਕਾਰ ਬਣਨ ਦਾ ਵੀ ਦਾਅਵਾ ਕੀਤਾ ਜਾ ਰਿਹਾ ਹੈ। ਪਰ ਪੰਜਾਬ 'ਚੋਂ ਆ ਰਹੀਆਂ ਕਈ ਤਸਵੀਰਾਂ ਸੂਬਾ ਸਰਕਾਰ ਦੇ ਵਿਕਾਸ ਦੀ ਪੋਲ ਖੋਲ ਰਹੀਆਂ ਹਨ। ਖਬਰ ਮੋਗਾ ਤੋਂ ਹੈ। ਜਿੱਥੇ ਸੀਜ਼ਨ ਦੇ ਪਹਿਲੇ ਭਾਰੀ ਮੀਂਹ ਕਾਰਨ ਹੀ ਪੂਰੀ ਸੜਕ ਕਈ ਫੁੱਟ ਹੇਠਾਂ ਧਸ ਗਈ ਹੈ।
ਜਾਣਕਾਰੀ ਮੁਤਾਬਕ ਕੱਲ੍ਹ ਪੰਜਾਬ ਦੇ ਕਈ ਇਲਾਕਿਆਂ 'ਚ ਭਾਰੀ ਮੀਂਹ ਪਿਆ। ਮੋਗਾ 'ਚ ਵੀ ਲੋਕਾਂ ਨੇ ਸੀਜ਼ਨ ਦੀ ਪਹਿਲੀ ਬਾਰਿਸ਼ ਦੇਖੀ। ਮੀਂਹ ਦੇ ਆਉਂਦਿਆਂ ਹੀ ਲੋਕਾਂ ਨੇ ਗਰਮੀ ਤੋਂ ਰਾਹਤ ਦੀ ਉਮੀਦ ਕੀਤੀ। ਪਰ ਸ਼ਾਇਦ ਇਹਨਾਂ ਨੂੰ ਇਹ ਨਹੀਂ ਪਤਾ ਸੀ ਮੀਂਹ ਦੀ ਇਸ ਰਫਤਾਰ ਸਾਹਮਣੇ ਬਾਦਲ ਸਰਕਾਰ ਦਾ ਵਿਕਾਸ ਨਹੀਂ ਟਿਕ ਸਕੇਗਾ। ਹੋਇਆ ਵੀ ਇੰਝ ਹੀ, ਇਸ ਮੀਂਹ ਦੇ ਚੱਲਦੇ ਮੋਗਾ ਦੇ ਗੋਧੇਵਾਲਾ ਰੋਡ 'ਤੇ ਸੜਕ ਦਾ ਵੱਡਾ ਹਿੱਸਾ ਬੁਰੀ ਤਰਾਂ ਧਸ ਗਿਆ। ਪੂਰਾ ਰਾਸਤਾ ਬੰਦ ਹੋ ਗਿਆ।
ਇਲਜ਼ਾਮ ਹਨ ਕਿ ਇਸ ਸੜਕ ਨੂੰ ਬਣਾਉਣ ਸਮੇਂ ਵੱਡੀ ਲਾਪਰਵਾਹੀ ਤੇ ਭ੍ਰਿਸ਼ਟਾਚਾਰ ਹੋਇਆ ਹੈ। ਇਸੇ ਦਾ ਨਤੀਜਾ ਹੈ ਕਿ ਸੜਕ ਕਦਰ ਰੇਤ ਖੁਰ ਗਈ ਤੇ ਕਰੀਬ ਢਾਈ ਫੁੱਟ ਥੱਲੇ ਜਾ ਧਸੀ। ਅਜਿਹੇ 'ਚ ਸਵਾਲ ਖੜਾ ਹੁੰਦਾ ਹੈ ਕਿ ਜਨਤਾ ਦੀ ਮਿਹਨਤ ਦੀ ਕਮਾਈ 'ਚੋਂ ਦਿੱਤੇ ਟੈਕਸ ਦੇ ਸਰਕਾਰੀ ਪੈਸੇ ਨਾਲ ਬਣੀ ਇਹ ਸੜਕ ਬਰਬਾਦ ਹੋਣ ਲਈ ਕੌਣ ਜਿੰਮੇਵਾਰ ਹੈ। ਕੀ ਠੇਕੇਦਾਰ ਨੇ ਇਸ ਸੜਕ ਨੂੰ ਬਣਾਉਣ ਲਈ ਘਟੀਆ ਮਟੀਰੀਅਲ ਦੀ ਵਰਤੋਂ ਕੀਤੀ..? ਅਜਿਹੇ 'ਚ ਜੇਕਰ ਠੇਕੇਦਾਰ ਨੇ ਕੋਈ ਕਮੀ ਛੱਡੀ ਤਾਂ ਕੰਮ 'ਤੇ ਨਜ਼ਰ ਰੱਖਣ ਵਾਲੇ ਅਧਿਕਾਰੀ ਕਿੱਥੇ ਸਨ..? ਜੋ ਵੀ ਹੋਇਆ, ਤੇ ਜਿਸ ਨੇ ਵੀ ਕੋਤਾਹੀ ਕੀਤੀ ਨੁਕਸਾਨ ਆਮ ਜਨਤਾ ਨੂੰ ਝੱਲਣਾ ਪਿਆ ਹੈ।