ਕਮੇਟੀ ਦੇ ਮੈਂਬਰ ਤੋਤਾ ਸਿੰਘ, ਡਾ. ਦਲਜੀਤ ਸਿੰਘ ਚੀਮਾ, ਬਲਵਿੰਦਰ ਸਿੰਘ ਭੂੰਦੜ, ਪ੍ਰੇਮ ਸਿੰਘ ਚੰਦੂਮਾਜਰਾ ਤੇ ਮਨਜਿੰਦਰ ਸਿੰਘ ਸਿਰਸਾ ਹਨ। ਅਕਾਲੀ ਦਲ, ਭਾਜਪਾ ਤੋਂ ਉਸ ਦੇ ਜਥੇਬੰਦਕ ਢਾਂਚੇ ਦੀ ਸੇਧ ਲੈਂਦਿਆਂ ਆਪਣੇ ਵਿੱਚ ਸੁਧਾਰ ਕਰਨ ਦੀ ਕੋਸ਼ਿਸ਼ ਕਰੇਗਾ। ਖ਼ਬਰਾਂ ਹਨ ਕਿ ਲੋਕ ਸਭਾ ਚੋਣਾਂ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਮਗਰੋਂ ਭਾਜਪਾ ਸਾਲ 2022 ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਵਧੇਰੇ ਸੀਟਾਂ ਦੀ ਮੰਗ ਕਰ ਸਕਦੀ ਹੈ। ਮੀਟਿੰਗ ਮੌਕੇ ਪਾਰਟੀ ਆਗੂਆਂ ਵਿਚਕਾਰ ਕਾਫੀ ਬਹਿਸ ਵੀ ਹੋਈ।
ਅਕਾਲੀ ਲੀਡਰਾਂ ਦਾ ਮੰਨਣਾ ਹੈ ਕਿ ਵੋਟਾਂ ਵਿੱਚ ਸਿਰਫ ਬਾਦਲ ਪਰਿਵਾਰ ਜਿੱਤਿਆ ਹੈ ਪਰ ਪਾਰਟੀ ਹਾਰੀ ਹੈ। ਇੱਕ ਸੀਨੀਅਰ ਲੀਡਰ ਨੇ ਇੱਥੋਂ ਤਕ ਕਹਿ ਦਿੱਤਾ ਕਿ ਪਾਰਟੀ ਦਾ ਜ਼ਿਆਦਾ ਧਿਆਨ ਬਠਿੰਡਾ ਤੇ ਫ਼ਿਰੋਜ਼ਪੁਰ ਸੀਟਾਂ 'ਤੇ ਹੀ ਵਧੇਰੇ ਰਿਹਾ। ਕੁਝ ਆਗੂ ਪਾਰਟੀ ਤੋਂ ਸਿੱਖ ਵੋਟਰਾਂ ਦੇ ਟੁੱਟਦੇ ਜਾਣ ਤੋਂ ਵੀ ਚਿੰਤਤ ਹਨ। ਉੱਧਰ, ਪਾਰਟੀ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਹੌਸਲੇ ਵਿੱਚ ਹਨ ਕਿ ਸਾਲ 2014 ਦੀਆਂ ਲੋਕ ਸਭਾ ਚੋਣਾਂ ਵਿੱਚ ਪਾਰਟੀ ਦਾ ਵੋਟ ਫ਼ੀਸਦ 26.3 ਸੀ ਜਦਕਿ ਇਸ ਵਾਰ 27.4 ਫ਼ੀਸਦ ਵੋਟਾਂ ਅਕਾਲੀ ਦਲ ਹਿੱਸੇ ਆਈਆਂ ਹਨ।