ਪੰਜਾਬ ਵਿਧਾਨ ਸਭਾ ਬਣੀ ਜੰਗ ਦਾ ਮੈਦਾਨ

ਆਖਰੀ ਦਿਨ ਰਾਣਾ-ਖਹਿਰਾ ਗਾਲ਼ੋ-ਗਾਲ਼ੀ, ਮਨਪ੍ਰੀਤ ਨੇ ਸ਼ਰੀਕਾਂ ਨੂੰ 'ਸਿੰਙਾਂ' 'ਤੇ ਚੁੱਕਿਆ

  ਚੰਡੀਗੜ੍ਹ: ਪੰਜਾਬ ਵਿਧਾਨ ਸਭਾ ਦੇ ਬਜਟ ਇਜਲਾਸ ਦਾ ਅੱਜ ਆਖ਼ਰੀ ਦਿਨ ਹੈ। ਅੱਜ ਦੇ ਦਿਨ ਵਿਧਾਨ ਸਭਾ ਜਿਵੇਂ ਜੰਗ ਦਾ ਅਖਾੜਾ ਬਣ ਗਈ। ਪਹਿਲਾਂ ਸੁਖਪਾਲ ਸਿੰਘ ਖਹਿਰਾ ਤੇ ਰਾਣਾ ਗੁਰਜੀਤ ਸਿੰਘ ਵਿਚਾਲੇ ਜ਼ਬਰਦਸਤ ਤੂੰ-ਤੂੰ, ਮੈਂ-ਮੈਂ ਹੋਈ ਤੇ ਫਿਰ ਮਨਪ੍ਰੀਤ ਬਾਦਲ ਨੇ ਆਪਣੇ ਸ਼ਰੀਕਾਂ ਨੂੰ 'ਸਿੰਙਾਂ' 'ਤੇ ਚੁੱਕ ਲਿਆ। ਸਾਬਕਾ ਕੈਬਨਿਟ ਮੰਤਰੀ ਰਾਣਾ ਗੁਰਜੀਤ ਸਿੰਘ ਨੇ ਖਹਿਰਾ ਨੂੰ ਲੈਂਡ ਮਾਫੀਆ ਕਿਹਾ। ਰਾਣਾ ਗੁਰਜੀਤ ਨੇ ਮਸਲਾ ਉਠਾਇਆ ਕਿ ਖਹਿਰਾ ਲੈਂਡ ਮਾਫੀਆ ਹੈ। ਉਹ ਮੇਰੇ ਨਾਲ ਕੋਠੀ ਵੇਚਣ ਦਾ ਦਾਅਵਾ ਮੁਕਰਿਆ ਹੈ। ਦੋਵਾਂ ਲੀਡਰਾਂ ਨੇ ਇੱਕ-ਦੂਜੇ ਲਈ ਅਪਸ਼ਬਦ ਵੀ ਵਰਤੇ। ਜਿਨ੍ਹਾਂ ਨੂੰ ਸਪੀਕਰ ਨੇ ਕਾਰਵਾਈ 'ਚੋਂ ਹਟਵਾ ਦਿੱਤਾ। ਇਸ ਤੋਂ ਬਾਅਦ ਮਨਪ੍ਰੀਤ ਬਾਦਲ ਦੇ ਬਜਟ ਭਾਸ਼ਣ 'ਤੇ 'ਆਪ' ਤੇ ਅਕਾਲੀਂ ਦਲ ਵੱਲੋਂ ਨਾਅਰੇਬਾਜ਼ੀ ਕੀਤੀ ਗਈ। ਖ਼ੁਦਕੁਸ਼ੀ ਰਿਪੋਰਟ 'ਤੇ ਨਾ ਬੋਲਣ ਦੇ ਵਿਰੋਧ ਵਿੱਚ 'ਆਪ' ਵੱਲੋਂ ਸਦਨ ਵਿੱਚੋਂ ਵਾਕ ਆਊਟ ਕਰ ਦਿੱਤਾ ਗਿਆ। ਸਦਨ ਵਿੱਚੋਂ ਵਿਰੋਧੀ ਧਿਰ ਦੇ ਚਲੇ ਜਾਣ 'ਤੇ ਖ਼ਜ਼ਾਨਾ ਮੰਤਰੀ ਖ਼ੂਬ ਰੋਹ ਵਿੱਚ ਆ ਗਏ। ਉਨ੍ਹਾਂ ਦਾ ਪਾਰਾ ਹੋਰ ਵੀ ਚੜ੍ਹ ਗਿਆ ਜਦ ਮਜੀਠੀਆ ਨੇ ਵਿਧਾਨ ਸਭਾ 'ਚ ਗੁੰਡਾ ਟੈਕਸ, ਜੋਜੋ ਟੈਕਸ ਦੇ ਪੋਸਟਰ ਦਿਖਾਏ। ਹਰਖ਼ ਵਿੱਚ ਆਏ ਮਨਪ੍ਰੀਤ ਬਾਦਲ ਨੇ ਕਿਹਾ ਮਜੀਠੀਆ ਹੁਣ ਵੱਡਾ ਬਣਦਾ ਹੈ, ਆਪਣੀ ਭੈਣ ਹਰਸਿਮਰਤ ਨੂੰ ਕਿਸ਼ਤਾਂ 'ਤੇ ਗੱਡੀ ਦਿੱਤੀ ਸੀ। ਵਿੱਤ ਮੰਤਰੀ ਨੇ ਆਪਣੇ ਸ਼ਰੀਕਾਂ ਨੂੰ ਸਾਰੀਆਂ ਅਗਲੀਆਂ ਪਿਛਲੀਆਂ ਸੁਣਾ ਦਿੱਤੀਆਂ। ਉਨ੍ਹਾਂ ਕਿਹਾ, "ਮੇਰੀ ਤਾਈ ਦੇ ਭੋਗ 'ਤੇ ਲੰਗਰ SGPC ਨੇ ਲਾਇਆ ਸੀ, ਸ਼ਰਮ ਨਹੀਂ ਆਈ ਇਨ੍ਹਾਂ ਨੂੰ। ਮਜੀਠੀਆ ਦੇ ਪਰਿਵਾਰ ਨੇ ਅੰਗਰੇਜ਼ਾਂ ਨਾਲ ਮਿਲਕੇ ਗ਼ੱਦਾਰੀ ਕੀਤੀ ਸੀ। ਪੰਜਾਬ ਸਰਕਾਰ ਦੇ ਪੈਸੇ ਨਾਲ ਮੇਰੀ ਤਾਈ ਦੇ ਕੈਂਸਰ ਦਾ ਇਲਾਜ ਕਰਵਾਇਆ ਤੇ ਪ੍ਰਕਾਸ਼ ਸਿੰਘ ਬਾਦਲ ਨੇ ਆਪਣੇ ਦਿਲ ਦਾ ਇਲਾਜ ਪੰਜਾਬ ਸਰਕਾਰ ਦੇ ਖ਼ਜ਼ਾਨੇ 'ਚੋਂ ਕਰਵਾਇਆ।"