ਕਿਸਾਨ ਨੇ ਕੰਮ 'ਤੇ ਰੱਖਿਆ ਪਰਵਾਸੀ ਮਜ਼ਦੂਰ, ਦੂਜੇ ਦਿਨ ਹੀ ਕਤਲ ਕਰਕੇ ਫਰਾਰ

ਪਰਵਾਸੀ ਮਜ਼ਦੂਰ ਨੇ ਨੌਕਰੀ ਦੇ ਦੂਜੇ ਦਿਨ ਹੀ ਕਿਸਾਨ ਦੀ ਹੱਤਿਆ ਕਰ ਦਿੱਤੀ ਤੇ ਪੈਸੇ ਲੈ ਕੇ ਫਰਾਰ ਹੋ ਗਿਆ। ਵਾਰਦਾਤ ਮੁਹਾਲੀ ਦੇ ਥਾਣਾ ਸੋਹਾਣਾ ਅਧੀਨ ਪੈਂਦੇ ਪਿੰਡ ਪੱਤੋਂ ਵਿੱਚ ਵਾਪਰੀ। ਇੱਥੇ 62 ਸਾਲਾ ਕਿਸਾਨ ਸੁਰਿੰਦਰ ਸਿੰਘ ਛਿੰਦਾ ਦਾ ਪਰਵਾਸੀ ਮਜ਼ਦੂਰ ਨੇ ਕਤਲ ਕਰ ਦਿੱਤਾ। ਪਤਾ ਲੱਗਾ ਹੈ ਕਿ ਮੁਲਜ਼ਮ ਕਿਸਾਨ ਦੀ ਜੇਬ ਵਿੱਚੋਂ ਵੀਹ ਹਜ਼ਾਰ ਰੁਪਏ ਵੀ ਕੱਢ ਕੇ ਲੈ ਗਿਆ।

ਚੰਡੀਗੜ੍ਹ: ਪਰਵਾਸੀ ਮਜ਼ਦੂਰ ਨੇ ਨੌਕਰੀ ਦੇ ਦੂਜੇ ਦਿਨ ਹੀ ਕਿਸਾਨ ਦੀ ਹੱਤਿਆ ਕਰ ਦਿੱਤੀ ਤੇ ਪੈਸੇ ਲੈ ਕੇ ਫਰਾਰ ਹੋ ਗਿਆ। ਵਾਰਦਾਤ ਮੁਹਾਲੀ ਦੇ ਥਾਣਾ ਸੋਹਾਣਾ ਅਧੀਨ ਪੈਂਦੇ ਪਿੰਡ ਪੱਤੋਂ ਵਿੱਚ ਵਾਪਰੀ। ਇੱਥੇ 62 ਸਾਲਾ ਕਿਸਾਨ ਸੁਰਿੰਦਰ ਸਿੰਘ ਛਿੰਦਾ ਦਾ ਪਰਵਾਸੀ ਮਜ਼ਦੂਰ ਨੇ ਕਤਲ ਕਰ ਦਿੱਤਾ। ਪਤਾ ਲੱਗਾ ਹੈ ਕਿ ਮੁਲਜ਼ਮ ਕਿਸਾਨ ਦੀ ਜੇਬ ਵਿੱਚੋਂ ਵੀਹ ਹਜ਼ਾਰ ਰੁਪਏ ਵੀ ਕੱਢ ਕੇ ਲੈ ਗਿਆ। ਦਰਅਸਲ ਸੁਰਿੰਦਰ ਸਿੰਘ ਐਤਵਾਰ ਰਾਤ ਵਿਹੜੇ ਵਿੱਚ ਕੂਲਰ ਲਗਾ ਕੇ ਸੁੱਤਾ ਪਿਆ ਸੀ। ਪਰਿਵਾਰ ਦੇ ਬਾਕੀ ਸਾਰੇ ਮੈਂਬਰ ਮਕਾਨ ਦੀ ਪਹਿਲੀ ਮੰਜ਼ਲ ਉੱਤੇ ਕਮਰਿਆਂ ਅੰਦਰ ਸਨ। ਰਾਤ ਨੂੰ ਪਰਵਾਸੀ ਮਜ਼ਦੂਰ ਨੇ ਉਸ ਦਾ ਕਤਲ ਕਰ ਦਿੱਤਾ। ਸਰਪੰਚ ਲਖਮੀਰ ਸਿੰਘ ਨੇ ਦੱਸਿਆ ਕਿ ਸੁਰਿੰਦਰ ਸਿੰਘ ਦੇ ਸਿਰ ਦੇ ਇੱਕ ਪਾਸੇ ਬਹੁਤ ਜ਼ਿਆਦਾ ਜ਼ਖ਼ਮਾਂ ਦੇ ਨਿਸ਼ਾਨ ਸਨ ਤੇ ਇੱਕ ਕੰਨ ਵੀ ਬੁਰੀ ਤਰ੍ਹਾਂ ਭੰਨ੍ਹਿਆ ਪਿਆ ਸੀ। ਉਨ੍ਹਾਂ ਦੱਸਿਆ ਕਿ ਪਰਿਵਾਰ ਦੀ ਮੱਝ ਨੇ ਬੀਤੀ ਰਾਤ ਕਿੱਲਾ ਪੁੱਟ ਲਿਆ ਸੀ, ਜਿਸ ਨੂੰ ਬੰਨ੍ਹਣ ਲਈ ਉੱਠੇ ਨੌਕਰ ਨੇ ਮੱਝ ਨੂੰ ਦੂਜੇ ਪਾਸੇ ਬੰਨ੍ਹ ਕੇ ਉਸੇ ਕਿੱਲੇ ਨਾਲ ਘਟਨਾ ਨੂੰ ਅੰਜਾਮ ਦਿੱਤਾ। ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਸੁਰਿੰਦਰ ਸਿੰਘ ਸ਼ਨੀਵਾਰ ਨੂੰ ਪਿੰਡ ਕੁਰੜੀ ਵਿੱਚ ਮੌਜੂਦ ਐਕਸਿਸ ਬੈਂਕ ਦੀ ਬਰਾਂਚ ਵਿੱਚੋਂ 20 ਹਜ਼ਾਰ ਰੁਪਏ ਕਢਵਾ ਕੇ ਲਿਆਇਆ ਸੀ। ਉਹ ਪੈਸੇ ਉਸ ਦੀ ਜੇਬ ਵਿੱਚ ਹੀ ਸਨ, ਜਿਸ ਬਾਰੇ ਨੌਕਰ ਨੂੰ ਪਤਾ ਸੀ। ਪਰਿਵਾਰਕ ਮੈਂਬਰਾਂ ਤੇ ਪਿੰਡ ਵਾਸੀਆਂ ਅਨੁਸਾਰ ਇਨ੍ਹਾਂ ਪੈਸਿਆਂ ਦੇ ਲਾਲਚ ਵਿੱਚ ਹੀ ਨੌਕਰ ਨੇ ਕਿਸਾਨ ਦੀ ਹੱਤਿਆ ਕੀਤੀ ਹੈ ਤੇ ਮ੍ਰਿਤਕ ਦੀ ਜੇਬ ਵਿੱਚੋਂ ਸਾਰੇ ਪੈਸੇ ਕੱਢ ਕੇ ਫ਼ਰਾਰ ਹੋ ਗਿਆ। ਦੋ ਦਿਨ ਪਹਿਲਾਂ ਰੱਖੇ ਛੋਟੂ ਉਰਫ਼ ਰਾਮੂ ਨਾਂ ਦੇ ਪਰਵਾਸੀ ਮਜ਼ਦੂਰ ਦਾ ਕਿਸਾਨ ਪਰਿਵਾਰ ਨੇ ਕੋਈ ਸ਼ਨਾਖ਼ਤੀ ਕਾਰਡ ਨਹੀਂ ਲਿਆ ਸੀ। ਪਰਿਵਾਰ ਅਨੁਸਾਰ ਉਹ ਆਪਣੇ ਆਪ ਨੂੰ ਬਿਹਾਰੀ ਦੱਸਦਾ ਸੀ। ਪੁਲਿਸ ਅਧਿਕਾਰੀਆਂ ਨੇ ਵਾਰਦਾਤ ਵਾਲੀ ਥਾਂ ਤੋਂ ਫ਼ਿੰਗਰ ਪ੍ਰਿੰਟ ਵੀ ਲਏ। ਪੁਲਿਸ ਨੇ ਮ੍ਰਿਤਕ ਕਿਸਾਨ ਦੇ ਪੁੱਤਰ ਹਰਿੰਦਰ ਸਿੰਘ ਦੇ ਬਿਆਨਾਂ ਉੱਤੇ ਅਣਪਛਾਤੇ ਪਰਵਾਸੀ ਮਜ਼ਦੂਰ ਖ਼ਿਲਾਫ਼ ਕਤਲ ਦਾ ਕੇਸ ਦਰਜ ਕਰ ਲਿਆ ਹੈ।