ਸਟਾਰਲਿੰਕ, ਸਪੇਸਐਕਸ ਅਤੇ ਟੇਸਲਾ ਦੇ ਮਾਲਕ ਐਲਨ ਮਸਕ ਸੋਮਵਾਰ ਨੂੰ ਇਤਿਹਾਸ ਦੇ ਪਹਿਲੇ ਵਿਅਕਤੀ ਬਣ ਗਏ ਹਨ, ਜਿਨ੍ਹਾਂ ਦੀ ਕੁੱਲ ਦੌਲਤ 600 ਬਿਲੀਅਨ ਡਾਲਰ (ਲਗਭਗ 54.49 ਲੱਖ ਕਰੋੜ ਰੁਪਏ) ਤੋਂ ਵੀ ਵੱਧ ਹੋ ਗਈ। ਫੋਰਬਸ ਮੁਤਾਬਕ 15 ਦਸੰਬਰ ਦੀ ਦੁਪਹਿਰ ਤੱਕ ਐਲਨ ਮਸਕ ਦੀ ਨੈਟ ਵਰਥ ਕਰੀਬ 677 ਬਿਲੀਅਨ ਡਾਲਰ (ਲਗਭਗ 61.47 ਲੱਖ ਕਰੋੜ ਰੁਪਏ) ਤੱਕ ਪਹੁੰਚ ਗਈ। ਦੁਨੀਆ ਵਿੱਚ ਅੱਜ ਤੱਕ ਕੋਈ ਵੀ ਇੰਨਾ ਅਮੀਰ ਨਹੀਂ ਹੋਇਆ।
ਸਪੇਸਐਕਸ ਦੀ ਵੈਲਿਊਏਸ਼ਨ ਵਿੱਚ ਵੱਡਾ ਉਛਾਲਐਲਨ ਮਸਕ ਦੀ ਦੌਲਤ ਵਿੱਚ ਆਇਆ ਇਹ ਵੱਡਾ ਵਾਧਾ ਮੁੱਖ ਤੌਰ ‘ਤੇ ਉਨ੍ਹਾਂ ਦੀ ਪ੍ਰਾਈਵੇਟ ਰਾਕੇਟ ਕੰਪਨੀ ਸਪੇਸਐਕਸ ਦੀ ਵੈਲਿਊਏਸ਼ਨ ਵਿੱਚ ਤੇਜ਼ ਉਛਾਲ ਕਾਰਨ ਹੋਇਆ ਹੈ। ਸਪੇਸਐਕਸ ਦੇ ਹਾਲੀਆ ਟੈਂਡਰ ਆਫਰ ਵਿੱਚ ਕੰਪਨੀ ਦੀ ਕੀਮਤ 800 ਬਿਲੀਅਨ ਡਾਲਰ ਦੱਸੀ ਗਈ ਹੈ, ਜੋ ਅਗਸਤ ਵਿੱਚ 400 ਬਿਲੀਅਨ ਡਾਲਰ ਸੀ।
ਮਸਕ ਕੋਲ ਸਪੇਸਐਕਸ ਵਿੱਚ ਲਗਭਗ 42 ਫੀਸਦੀ ਹਿੱਸੇਦਾਰੀ ਹੈ, ਜਿਸ ਕਾਰਨ ਉਨ੍ਹਾਂ ਦੀ ਦੌਲਤ ਵਿੱਚ ਕਰੀਬ 168 ਬਿਲੀਅਨ ਡਾਲਰ ਦਾ ਵਾਧਾ ਹੋਇਆ। ਇਸ ਨਾਲ ਹੁਣ ਉਹ ਦੁਨੀਆ ਦੇ ਦੂਜੇ ਸਭ ਤੋਂ ਅਮੀਰ ਵਿਅਕਤੀ ਲੈਰੀ ਪੇਜ ਨਾਲੋਂ ਲਗਭਗ 400 ਬਿਲੀਅਨ ਡਾਲਰ, ਯਾਨੀ ਤਕਰੀਬਨ 36.32 ਲੱਖ ਕਰੋੜ ਰੁਪਏ ਅੱਗੇ ਨਿਕਲ ਗਏ ਹਨ।
ਮਸਕ 500 ਬਿਲੀਅਨ ਡਾਲਰ ਦੀ ਦੌਲਤ ਵਾਲੇ ਪਹਿਲੇ ਵਿਅਕਤੀ ਵੀ ਬਣੇ ਸਨ
ਅਕਤੂਬਰ 2025 ਵਿੱਚ ਐਲਨ ਮਸਕ 500 ਬਿਲੀਅਨ ਡਾਲਰ ਦੀ ਨੈਟ ਵਰਥ ਪਾਰ ਕਰਨ ਵਾਲੇ ਦੁਨੀਆ ਦੇ ਪਹਿਲੇ ਵਿਅਕਤੀ ਬਣੇ ਸਨ। ਇਸ ਤੋਂ ਬਾਅਦ ਹਾਲੇ 2 ਮਹੀਨੇ ਵੀ ਪੂਰੇ ਨਹੀਂ ਹੋਏ ਕਿ ਉਨ੍ਹਾਂ ਦੀ ਦੌਲਤ ਵਿੱਚ 100 ਬਿਲੀਅਨ ਡਾਲਰ ਤੋਂ ਵੀ ਵੱਧ ਦਾ ਜ਼ਬਰਦਸਤ ਉਛਾਲ ਆ ਗਿਆ ਹੈ।
ਇਸਦੇ ਨਾਲ ਹੀ ਸਪੇਸਐਕਸ 2026 ਵਿੱਚ ਆਪਣਾ ਆਈਪੀਓ ਲਿਆਉਣ ਦੀ ਤਿਆਰੀ ਕਰ ਰਹੀ ਹੈ। ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਆਈਪੀਓ ਦੇ ਸਮੇਂ ਕੰਪਨੀ ਦੀ ਵੈਲਿਊਏਸ਼ਨ 1.5 ਟ੍ਰਿਲੀਅਨ ਡਾਲਰ ਤੱਕ ਪਹੁੰਚ ਸਕਦੀ ਹੈ। ਜੇ ਅਜਿਹਾ ਹੁੰਦਾ ਹੈ ਤਾਂ ਐਲਨ ਮਸਕ ਦੀ ਦੌਲਤ ਵਿੱਚ ਹੋਰ ਵੀ ਵੱਡਾ ਵਾਧਾ ਹੋ ਸਕਦਾ ਹੈ।
ਮਸਕ ਦੀ ਦੌਲਤ ਵਿੱਚ ਟੇਸਲਾ ਦਾ ਵੀ ਵੱਡਾ ਯੋਗਦਾਨ ਹੈ
ਐਲਨ ਮਸਕ ਕੋਲ ਟੇਸਲਾ ਵਿੱਚ ਲਗਭਗ 12 ਫੀਸਦੀ ਹਿੱਸੇਦਾਰੀ ਹੈ, ਜਿਸ ਦੀ ਕੀਮਤ ਕਰੀਬ 197 ਬਿਲੀਅਨ ਡਾਲਰ ਨਾਪੀ ਗਈ ਹੈ। ਭਾਵੇਂ ਇਸ ਸਾਲ ਟੇਸਲਾ ਦੀ ਵਿਕਰੀ ਵਿੱਚ ਕੁਝ ਘਟਾਓ ਆਇਆ ਹੈ, ਫਿਰ ਵੀ ਕੰਪਨੀ ਦੇ ਸ਼ੇਅਰਾਂ ਵਿੱਚ 13 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਹੈ।
ਸੋਮਵਾਰ ਨੂੰ ਟੇਸਲਾ ਦੇ ਸ਼ੇਅਰ ਲਗਭਗ 4 ਫੀਸਦੀ ਚੜ੍ਹ ਗਏ, ਜਦੋਂ ਮਸਕ ਨੇ ਦੱਸਿਆ ਕਿ ਕੰਪਨੀ ਰੋਬੋਟੈਕਸੀ ਦਾ ਟੈਸਟ ਕਰ ਰਹੀ ਹੈ, ਜਿਸ ਵਿੱਚ ਅੱਗੇ ਵਾਲੀ ਸੀਟ 'ਤੇ ਕੋਈ ਸੇਫਟੀ ਮਾਨੀਟਰ ਨਹੀਂ ਰੱਖਿਆ ਗਿਆ।
ਨਵੰਬਰ ਮਹੀਨੇ ਵਿੱਚ ਟੇਸਲਾ ਦੇ ਸ਼ੇਅਰਹੋਲਡਰਾਂ ਨੇ ਐਲਨ ਮਸਕ ਲਈ 1 ਟ੍ਰਿਲੀਅਨ ਡਾਲਰ ਦਾ ਪੇ ਪੈਕੇਜ ਮਨਜ਼ੂਰ ਕੀਤਾ ਸੀ, ਜੋ ਇਤਿਹਾਸ ਦਾ ਸਭ ਤੋਂ ਵੱਡਾ ਕਾਰਪੋਰੇਟ ਪੇ ਪੈਕੇਜ ਮੰਨਿਆ ਜਾ ਰਿਹਾ ਹੈ। ਇਸ ਫ਼ੈਸਲੇ ਨਾਲ ਕੰਪਨੀ ਨੂੰ AI ਅਤੇ ਰੋਬੋਟਿਕਸ ਦੇ ਖੇਤਰ ਵਿੱਚ ਵੱਡਾ ਖਿਡਾਰੀ ਬਣਾਉਣ ਲਈ ਸਹਾਰਾ ਮਿਲੇਗਾ।
ਮਸਕ ਦੀਆਂ ਹੋਰ ਕੰਪਨੀਆਂ ਤੋਂ ਵੀ ਕਮਾਈ ਵਿੱਚ ਵੱਡਾ ਵਾਧਾ ਹੋਇਆ ਹੈ
ਐਲਨ ਮਸਕ ਦੀ ਆਰਟੀਫ਼ੀਸ਼ੀਅਲ ਇੰਟੈਲੀਜੈਂਸ ਕੰਪਨੀ xAI 15 ਬਿਲੀਅਨ ਡਾਲਰ ਦੀ ਨਵੀਂ ਫੰਡਿੰਗ ਇਕੱਠੀ ਕਰਨ ਲਈ ਗੱਲਬਾਤ ਕਰ ਰਹੀ ਹੈ, ਜਿਸ ਨਾਲ ਕੰਪਨੀ ਦੀ ਵੈਲਿਊਏਸ਼ਨ ਲਗਭਗ 230 ਬਿਲੀਅਨ ਡਾਲਰ ਤੱਕ ਪਹੁੰਚ ਸਕਦੀ ਹੈ। ਹਾਲਾਂਕਿ, ਇਸ ਮਾਮਲੇ 'ਤੇ ਮਸਕ, ਟੇਸਲਾ, ਸਪੇਸਐਕਸ ਅਤੇ xAI ਵੱਲੋਂ ਅਜੇ ਤੱਕ ਕੋਈ ਸਰਕਾਰੀ ਟਿੱਪਣੀ ਨਹੀਂ ਕੀਤੀ ਗਈ। ਕੁੱਲ ਮਿਲਾ ਕੇ, ਐਲਨ ਮਸਕ ਦੀ ਦੌਲਤ ਵਿੱਚ ਆ ਰਹਾ ਤੇਜ਼ ਵਾਧਾ ਉਸ ਦੀਆਂ ਵੱਖ-ਵੱਖ ਕੰਪਨੀਆਂ ਦੀ ਉੱਚੀ ਵੈਲਿਊਏਸ਼ਨ ਕਾਰਨ ਹੋ ਰਿਹਾ ਹੈ।