North Korea News: ਉੱਤਰੀ ਕੋਰੀਆ ਦੇ ਨੇਤਾ ਕਿਮ ਜੋਂਗ ਉਨ ਨੇ ਆਤਮਘਾਤੀ ਹਮਲਾ ਕਰਨ ਵਾਲੇ ਡਰੋਨਾ ਦਾ ਵੱਡੇ ਪੱਧਰ 'ਤੇ ਨਿਰਮਾਣ ਕਰਨ ਦਾ ਆਦੇਸ਼ ਦਿੱਤਾ ਹੈ। ਸਰਕਾਰੀ ਮੀਡੀਆ ਨੇ ਸ਼ੁੱਕਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਇਸ ਤੋਂ ਇਕ ਦਿਨ ਪਹਿਲਾਂ ਉਸ ਨੇ ਇਸ ਹਥਿਆਰ ਪ੍ਰਣਾਲੀ ਦਾ ਟੈਸਟ ਦੇਖਿਆ ਸੀ।
ਕਿਮ ਜੋਂਗ ਉਨ ਨੇ ਦੇਖਿਆ ਸੀ ਟੈਸਟ
ਕਿਮ ਜੋਂਗ ਉਨ ਨੇ ਉੱਤਰੀ ਕੋਰੀਆ ਦੇ ਮਨੁੱਖ ਰਹਿਤ ਏਰੀਅਲ ਟੈਕਨਾਲੋਜੀ ਕੰਪਲੈਕਸ (UATC) ਦੁਆਰਾ ਨਿਰਮਿਤ ਜ਼ਮੀਨੀ ਅਤੇ ਸਮੁੰਦਰੀ ਟੀਚਿਆਂ 'ਤੇ ਹਮਲਾ ਕਰਨ ਲਈ ਤਿਆਰ ਕੀਤੇ ਗਏ ਡਰੋਨਾਂ ਦੇ ਟੈਸਟਾਂ ਨੂੰ ਦੇਖਿਆ ਸੀ।
ਕੋਰੀਅਨ ਸੈਂਟਰਲ ਨਿਊਜ਼ ਏਜੰਸੀ ਨੇ ਦਿੱਤੀ ਆਹ ਜਾਣਕਾਰੀ
ਕੋਰੀਅਨ ਸੈਂਟਰਲ ਨਿਊਜ਼ ਏਜੰਸੀ (KCNA) ਨੇ ਦੱਸਿਆ, "ਕਿਮ ਜੋਂਗ ਉਨ ਨੇ ਆਤਮਘਾਤੀ ਹਮਲਾ ਕਰਨ ਵਾਲੇ ਡਰੋਨਾਂ ਦੇ ਵੱਡੇ ਪੱਧਰ 'ਤੇ ਉਤਪਾਦਨ ਦੀ ਲੋੜ 'ਤੇ ਜ਼ੋਰ ਦਿੱਤਾ ਹੈ।" ਆਤਮਘਾਤੀ ਡਰੋਨ ਵਿਸਫੋਟਕਾਂ ਵਾਲੇ ਮਾਨਵ ਰਹਿਤ ਡਰੋਨ ਹੁੰਦੇ ਹਨ, ਜੋ ਜਾਣਬੁੱਝ ਕੇ ਦੁਸ਼ਮਣ ਦੇ ਟੀਚਿਆਂ 'ਤੇ ਸੁੱਟਣ ਲਈ ਤਿਆਰ ਕੀਤੇ ਜਾਂਦੇ ਹਨ। ਇਹ ਪ੍ਰਭਾਵਸ਼ਾਲੀ ਢੰਗ ਨਾਲ ਗਾਈਡਡ ਮਿਜ਼ਾਈਲਾਂ ਵਜੋਂ ਕੰਮ ਕਰਦੀਆਂ ਹਨ।
ਅਗਸਤ ਵਿੱਚ ਪਹਿਲੀ ਵਾਰ ਆਤਮਘਾਤੀ ਡਰੋਨ ਦਾ ਕੀਤਾ ਗਿਆ ਸੀ ਪਰਦਾਫਾਸ਼
ਪਿਓਂਗਯਾਂਗ ਨੇ ਅਗਸਤ ਵਿੱਚ ਪਹਿਲੀ ਵਾਰ ਆਪਣੇ ਆਤਮਘਾਤੀ ਡਰੋਨ ਦਾ ਪਰਦਾਫਾਸ਼ ਕੀਤਾ ਸੀ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਰੂਸ ਨਾਲ ਵਧਦੇ ਸਬੰਧਾਂ ਕਾਰਨ ਉੱਤਰੀ ਕੋਰੀਆ ਹੁਣ ਇਸ ਤਕਨੀਕ ਦੀ ਵਰਤੋਂ ਕਰਨਾ ਚਾਹੁੰਦਾ ਹੈ। ਕੇਸੀਐਨਏ ਨੇ ਰਿਪੋਰਟ ਦਿੱਤੀ ਕਿ ਵੀਰਵਾਰ ਦੇ ਟੈਸਟ ਵਿੱਚ ਡਰੋਨ ਨੇ ਇੱਕ ਪੂਰਵ-ਨਿਰਧਾਰਤ ਮਾਰਗ 'ਤੇ ਉਡਾਣ ਭਰੀ ਅਤੇ "ਸਹੀ" ਟੀਚਿਆਂ 'ਤੇ ਹਮਲਾ ਕੀਤਾ।
ਏਜੰਸੀ ਨੇ ਕਿਹਾ, "ਜ਼ਮੀਨ ਅਤੇ ਸਮੁੰਦਰ 'ਤੇ ਦੁਸ਼ਮਣ ਦੇ ਕਿਸੇ ਵੀ ਟੀਚੇ 'ਤੇ ਸਟੀਕ ਹਮਲੇ ਕਰਨ ਦੇ ਉਦੇਸ਼ ਨਾਲ ਆਤਮਘਾਤੀ ਹਮਲਾ ਕਰਨ ਵਾਲੇ ਡਰੋਨਾਂ ਦੀ ਵਰਤੋਂ ਵੱਖ-ਵੱਖ ਸਟ੍ਰਾਈਕ ਰੇਂਜਾਂ ਵਿੱਚ ਕੀਤੀ ਜਾਵੇਗੀ।"
ਰੂਸ ਤੋਂ ਹਾਸਲ ਕੀਤੀ ਤਕਨੀਕ
ਮਾਹਿਰਾਂ ਨੇ ਕਿਹਾ ਕਿ ਅਗਸਤ 'ਚ ਸਰਕਾਰੀ ਮੀਡੀਆ ਦੁਆਰਾ ਜਾਰੀ ਕੀਤੀਆਂ ਗਈਆਂ ਤਸਵੀਰਾਂ 'ਚ ਇਹ ਡਰੋਨ ਇਜ਼ਰਾਈਲੀ ਬਣੇ 'ਹਾਰੋਪ', ਰੂਸੀ ਬਣੇ 'ਲੈਂਸੇਟ-3' ਅਤੇ ਇਜ਼ਰਾਈਲੀ ਬਣੇ 'ਹੀਰੋ 30' ਵਰਗੇ ਲੱਗਦੇ ਹਨ। ਹੋ ਸਕਦਾ ਹੈ ਕਿ ਉੱਤਰੀ ਕੋਰੀਆ ਨੇ ਇਹ ਤਕਨੀਕ ਰੂਸ ਤੋਂ ਹਾਸਲ ਕੀਤੀ ਹੋਵੇ।