ਚਾਹ ਵਾਲੇ ਤੋਂ ਕਰਵਾਇਆ ਉਦਘਾਟਨ

ਦੁਬਈ: ਸੰਯੁਕਤ ਅਰਬ ਅਮੀਰਾਤ ਵਿੱਚ ਇੱਕ ਦਿਲ ਨੂੰ ਛੂਹ ਲੈਣ ਵਾਲਾ ਮਨੁੱਖੀ ਵਰਤਾਰਾ ਵਾਪਰਿਆ ਜਦੋਂ ਪਰਵਾਸੀ ਨੇ 50 ਸਾਲਾ ਭਾਰਤੀ ਚਾਹ ਵਿਕਰੇਤਾ ਤੋਂ ਆਪਣੀ ਇਲੈਕਟ੍ਰਾਨਿਕ ਦੁਕਾਨ ਦਾ ਉਦਘਾਟਨ ਕਰਵਾਇਆ। ਭਾਰਤ ਦੇ ਕੇਰਲਾ ਸੂਬੇ ਨਾਲ ਸਬੰਧਤ ਮੁਹੰਮਦ ਸ਼ਫ਼ੀ ਦੀ ਖ਼ੁਸ਼ੀ ਦੀ ਹੱਦ ਨਾ ਰਹੀ ਜਿਸ ਵੇਲੇ ਉਸ ਨੂੰ ਦੁਕਾਨ ਦੀ ਨਵੀਂ ਸ਼ਾਖਾ ਦੇ ਉਦਘਾਟਨ ਲਈ ਰਿਬਨ ਕੱਟਣ ਵਾਸਤੇ ਸੱਦਿਆ ਗਿਆ। ਡਾਇਰਾ ਇਲਾਕੇ ਦੀ ਅਲ ਮੁਸੱਲਾ ਰੋਡ 'ਤੇ ਪੈਂਦੀ ਇਸ ਦੁਕਾਨ ਵਿੱਚ ਮੁਹੰਮਦ ਪਿਛਲੇ 20 ਸਾਲਾਂ ਤੋਂ ਚਾਹ ਵੇਚ ਰਿਹਾ ਹੈ। 'ਗਲਫ ਨਿਊਜ਼' ਦੀ ਰਿਪੋਰਟ ਮੁਤਾਬਕ ਇਹ ਦਿਲਦਾਰੀ ਭਰਿਆ ਕੰਮ 'ਕੀ ਫੈਸ਼ਨਜ਼ ਇਲੈਕਟ੍ਰਾਨਿਕਸ ਟਰੇਡਿੰਗ' ਦੇ ਚੇਅਰਮੈਨ ਨੀਲੇਸ਼ ਭਾਟੀਆ ਨੇ ਕੀਤਾ। ਸ਼ਫ਼ੀ ਨੇ ਰਿਬਨ ਕੱਟ ਕੇ ਦੁਕਾਨ ਦਾ ਉਦਘਾਟਨ ਕੀਤਾ, ਉਪਰੰਤ ਚੇਅਰਮੈਨ ਨੇ ਸਨਮਾਣ ਵਜੋਂ ਸ਼ਫੀ ਨੂੰ ਸ਼ਾਲ ਦਿੱਤੀ। ਇੰਨਾ ਹੀ ਨਹੀਂ 'ਡਰੀਮ ਵੇਅ ਕੈਫੇਟੇਰੀਆ' ਵਿੱਚ ਕੰਮ ਕਰਦਾ ਸ਼ਫ਼ੀ ਇਸ ਨਵੀਂ ਖੁੱਲ੍ਹੀ ਦੁਕਾਨ ਦਾ ਪਹਿਲਾ ਗਾਹਕ ਵੀ ਬਣਿਆ। ਉਸ ਨੇ ਇੱਥੋਂ ਮੋਬਾਈਲ ਹੈੱਡਫੋਨ ਸੈੱਟ ਖਰੀਦਿਆ। ਇਨਸਾਨੀ ਪ੍ਰੇਮ ਦੇ ਰੰਗ ਉਦੋਂ ਦੇਖਦਿਆਂ ਬਣਦੇ ਸੀ ਜਦੋਂ ਸਮਾਗਮ ਦੇ ਮਹਿਮਾਨ ਸ਼ਫੀ ਲਈ ਤਾੜੀਆਂ ਮਾਰ ਰਹੇ ਸਨ ਤਾਂ ਉਹ ਮਹਿਮਾਨਾਂ ਨੂੰ ਮਠਿਆਈਆਂ ਤੇ ਨਮਕੀਨ ਵਰਤਾ ਰਿਹਾ ਸੀ। ਸ਼ਫ਼ੀ ਨੇ ਆਪਣਾ ਅਨੁਭਵ ਦੱਸਦਿਆਂ ਕਿਹਾ ਕਿ ਉਸ ਨੇ ਕਦੇ ਵੀ ਇੰਨਾ ਮਾਣ ਮਿਲਣ ਬਾਰੇ ਨਹੀਂ ਸੋਚਿਆ ਸੀ ਤੇ ਨਾ ਹੀ ਅਜਿਹੀ ਅਲੋਕਾਰੀ ਪਹਿਲਾਂ ਕਦੇ ਸੁਣੀ ਸੀ। ਉਸ ਨੇ ਨੀਲੇਸ਼ ਨੂੰ ਵਪਾਰ ਵਿੱਚ ਹੋਰ ਤਰੱਕੀ ਤੇ ਜੀਵਨ ਵਿੱਚ ਖ਼ੁਸ਼ਹਾਲੀ ਦੀ ਦੁਆ ਕੀਤੀ। ਸ਼ਫ਼ੀ ਨੇ ਇਸ ਮੌਕੇ ਦੱਸਿਆ ਕਿ ਇੱਕ ਵਾਰ ਨੀਲੇਸ਼ ਨੇ ਉਸ ਦੇ ਪੁੱਤਰ ਦੀ ਆਈ.ਟੀ. ਇੰਜਨੀਅਰਿੰਗ ਦੀ ਪੜ੍ਹਾਈ ਜਾਰੀ ਰੱਖਣ ਲਈ 15 ਹਜ਼ਾਰ ਦਰਹਾਮ (2.7 ਲੱਖ ਰੁਪਏ) ਦਿੱਤੇ ਸਨ।