ਖੂਨ ਦਾ ਰੰਗ ਲਾਲ ਹੁੰਦਾ ਤਾਂ ਨਾੜਾਂ ਨੀਲੀਆਂ ਜਾਂ ਹਰੀਆਂ ਕਿਉਂ ਦਿਖਾਈ ਦਿੰਦੀਆਂ? ਇੱਥੇ ਜਾਣੋ ਸਹੀ ਜਵਾਬ

ਵੈਸੇ ਤਾਂ ਖੂਨ ਦਾ ਰੰਗ ਲਾਲ ਹੁੰਦਾ ਹੈ , ਪਰ ਸਾਨੂੰ ਆਪਣੀ ਸਕਿਨ ਦੇ ਹੇਠਾਂ ਉੱਭਰਦੀਆਂ ਨਾੜੀਆਂ ਅਕਸਰ ਨੀਲੇ ਜਾਂ ਹਰੇ ਰੰਗ ਦੀਆਂ ਦਿਖਾਈ ਦਿੰਦੀਆਂ ਹਨ? ਅਜਿਹਾ ਕਿਉਂ ਹੁੰਦਾ ਹੈ ਤਾਂ ਆਓ ਜਾਣਦੇ ਹਾਂ...

( Image Source : Freepik )

ਸਾਡੇ ਖੂਨ 'ਚ ਹੀਮੋਗਲੋਬਿਨ ਨਾਂ ਦਾ ਇੱਕ ਪ੍ਰੋਟੀਨ ਹੁੰਦਾ ਹੈ, ਜੋ ਸਰੀਰ ਦੇ ਹਰ ਹਿੱਸੇ 'ਚ ਆਕਸੀਜਨ ਪਹੁੰਚਾਉਣ ਦਾ ਕੰਮ ਕਰਦਾ ਹੈ। ਜਦੋਂ ਇਹ ਹੀਮੋਗਲੋਬਿਨ ਆਕਸੀਜਨ ਨਾਲ ਮਿਲਦਾ ਹੈ ਤਾਂ ਇਹ ਲਾਲ ਚਮਕਦਾਰ ਹੋ ਜਾਂਦਾ ਹੈ - ਇਹ ਉਹੀ ਖੂਨ ਹੈ ਜੋ ਸਾਡੇ ਸਰੀਰ 'ਚ ਦੌੜਦਾ ਹੈ।

ਜਦੋਂ ਰੌਸ਼ਨੀ ਸਾਡੀ ਸਕਿੱਨ 'ਤੇ ਪੈਂਦੀ ਹੈ ਤਾਂ ਇਹ ਵੱਖ-ਵੱਖ ਰੰਗਾਂ 'ਚ ਵੰਡੀ ਜਾਂਦੀ ਹੈ। ਲਾਲ ਰੰਗ ਦੀ ਤਰੰਗ-ਲੰਬਾਈ ਜ਼ਿਆਦਾ ਹੁੰਦੀ ਹੈ ਤੇ ਇਹ ਚਮੜੀ ਦੇ ਅੰਦਰ ਡੂੰਘਾਈ ਤੱਕ ਪਹੁੰਚ ਜਾਂਦੀ ਹੈ। ਨੀਲੀਆਂ ਤਰੰਗਾਂ ਘੱਟ ਡੂੰਘਾਈ ਤਕ ਜਾਂਦੀਆਂ ਹਨ ਅਤੇ ਜਲਦੀ ਰਿਫਲੈਕਟ ਹੋ ਜਾਂਦੀਆਂ ਹਨ। ਇਸ ਕਰਕੇ ਸਾਡੀਆਂ ਅੱਖਾਂ ਜ਼ਿਆਦਾਤਰ ਨੀਲੀਆਂ ਤਰੰਗਾਂ ਨੂੰ ਫੜਦੀਆਂ ਹਨ ਤੇ ਅਸੀਂ ਨਾੜੀਆਂ ਨੂੰ ਨੀਲੇ ਜਾਂ ਹਰੇ ਰੰਗ 'ਚ ਦੇਖਦੇ ਹਾਂ।

ਇਹ ਦਰਅਸਲ ਇਕ Visual trick ਹੈ। ਸਾਡੀਆਂ ਅੱਖਾਂ ਤੇ ਦਿਮਾਗ ਮਿਲ ਕੇ ਸਾਨੂੰ ਜੋ ਰੰਗ ਦਿਖਾਉਂਦੇ ਹਨ, ਉਹ ਜ਼ਰੂਰੀ ਨਹੀਂ ਕਿ ਹਕੀਕਤ ਹੋਵੇ। ਨਾੜਾਂ ਦੀ ਸਤ੍ਹਾ 'ਤੇ ਪੈਣ ਵਾਲੀ ਰੌਸ਼ਨੀ ਤੇ ਸਕਿੱਨ ਦੇ ਹੇਠਾਂ ਦੀ ਬਣਤਰ ਮਿਲ ਕੇ ਇਕ ਭਰਮ ਪੈਦਾ ਕਰਦੇ ਹਨ ਜਿਸ ਕਾਰਨ ਉਹ ਨੀਲੀਆਂ ਨਜ਼ਰ ਆਉਂਦੀਆਂ ਹਨ।

ਕਈ ਲੋਕ ਸੋਚਦੇ ਹਨ ਕਿ ਨੀਲਾ ਰੰਗ ਇਸ ਲਈ ਹੈ ਕਿਉਂਕਿ ਨਾੜੀਆਂ 'ਚ ਆਕਸੀਜਨ ਰਹਿਤ ਖੂਨ ਹੁੰਦਾ ਹੈ। ਹਾਲਾਂਕਿ, ਇਹ ਸੱਚ ਨਹੀਂ ਹੈ। ਆਕਸੀਜਨ ਰਹਿਤ ਖੂਨ ਵੀ ਗੂੜ੍ਹਾ ਲਾਲ ਹੁੰਦਾ ਹੈ - ਥੋੜ੍ਹਾ ਜਿਹਾ ਗੂੜ੍ਹਾ, ਪਰ ਨੀਲਾ ਨਹੀਂ। ਇਸ ਲਈ ਇਸਦਾ ਨੀਲਾ ਦਿਖਾਈ ਦੇਣਾ ਸਿਰਫ਼ ਰੌਸ਼ਨੀ ਤੇ ਸਕਿੱਨ ਦੀ ਬਣਤਰ ਦਾ ਨਤੀਜਾ ਹੈ, ਖੂਨ ਦੇ ਰੰਗ ਦਾ ਨਹੀਂ।

ਗੋਰ ਲੋਕਾਂ 'ਚ ਨਾੜਾਂ ਅਕਸਰ ਵਧੇਰੇ ਸਪੱਸ਼ਟ ਤੇ ਨੀਲੀਆਂ/ਹਰੇ ਰੰਗ ਦੀਆਂ ਦਿਖਾਈ ਦਿੰਦੀਆਂ ਹਨ, ਜਦੋਂਕਿ ਗਹਿਰੇ ਰੰਗ ਵਾਲੇ ਲੋਕਾਂ 'ਚ ਇਹ ਅੰਤਰ ਘੱਟ ਨਜ਼ਰ ਆਉਂਦਾ ਹੈ। ਸਕਿਨ ਦੀ ਮੋਟਾਈ, ਰੰਗ ਤੇ ਨਾੜਾਂ ਦੀ ਡੂੰਘਾਈ ਇਹ ਨਿਰਧਾਰਤ ਕਰਦੀ ਹੈ ਕਿ ਤੁਹਾਨੂੰ ਨਾੜੀਆਂ ਦਾ ਰੰਗ ਕਿਹੜਾ ਦਿਖਾਈ ਦੇਵੇਗਾ।