ਵਿਅਰਥ ਗਿਆ ਬਾਬਰ ਆਜ਼ਮ ਦਾ ਸੈਂਕੜਾ
ਆਸਟ੍ਰੇਲੀਆ ਅਤੇ ਪਾਕਿਸਤਾਨ ਵਿਚਾਲੇ ਐਡੀਲੇਡ 'ਚ ਖੇਡੇ ਗਏ ਵਨਡੇ ਸੀਰੀਜ਼ ਦੇ ਆਖਰੀ ਮੈਚ 'ਚ ਵਾਰਨਰ ਨੇ ਧਮਾਕਾ ਕਰ ਦਿੱਤਾ।
ਵਾਰਨਰ ਪਾਕਿਸਤਾਨ ਖਿਲਾਫ 179 ਰਨ ਬਣਾ ਕੇ ਆਊਟ ਹੋਏ। ਵਾਰਨਰ ਦੇ ਦਮਦਾਰ ਸੈਂਕੜੇ ਆਸਰੇ ਆਸਟ੍ਰੇਲੀਆ ਨੇ ਪਾਕਿਸਤਾਨ ਨੂੰ 57 ਰਨ ਨਾਲ ਮਾਤ ਦਿੱਤੀ ਅਤੇ ਸੀਰੀਜ਼ 4-1 ਨਾਲ ਆਪਣੇ ਨਾਮ ਕਰ ਲਈ।
ਦੋਹਰਾ ਸੈਂਕੜਾ ਜੜਨ ਦਾ ਮੌਕਾ
ਵਾਰਨਰ ਕੋਲ ਦੋਹਰਾ ਸੈਂਕੜਾ ਜੜਨ ਦਾ ਮੌਕਾ ਸੀ ਪਰ ਵਾਰਨਰ ਇਹ ਖਾਸ ਕਾਮਯਾਬੀ ਆਪਣੇ ਨਾਮ ਕਰਨ 'ਚ ਨਾਕਾਮ ਰਹੇ। ਵਾਰਨਰ ਨੇ 128 ਗੇਂਦਾਂ 'ਤੇ 179 ਰਨ ਦੀ ਪਾਰੀ ਖੇਡੀ।
ਆਸਟ੍ਰੇਲੀਆ ਦੇ ਬੱਲੇਬਾਜ ਆਖਰੀ ਓਵਰਾਂ ਦੌਰਾਨ ਜਲਦੀ ਨਾਲ ਰਨ ਬਣਾਉਣ ਦੀ ਕੋਸ਼ਿਸ਼ ਕਰਦੇ ਹੋਏ ਆਪਣੇ ਵਿਕਟ ਗਵਾਉਂਦੇ ਰਹੇ। ਪਰ ਵਾਰਨਰ ਅਤੇ ਹੈਡ ਦੀ ਦਮਦਾਰ ਬੱਲੇਬਾਜ਼ੀ ਸਦਕਾ ਆਸਟ੍ਰੇਲੀਆ ਨੇ ਨਿਰਧਾਰਿਤ 50 ਓਵਰਾਂ 'ਚ 7 ਵਿਕਟ ਗਵਾ ਕੇ 369 ਰਨ ਦਾ ਸਕੋਰ ਖੜਾ ਕੀਤਾ।
ਵਾਰਨਰ ਦੀ ਪਾਰੀ 'ਚ 19 ਚੌਕੇ ਅਤੇ 5 ਛੱਕੇ ਸ਼ਾਮਿਲ ਸਨ। ਵਾਰਨਰ ਦੇ ਧਮਾਕੇ ਦਾ ਅੰਦਾਜਾ ਇਸੇ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਉਨ੍ਹਾਂ ਦੀ ਪਾਰੀ 'ਚ 106 ਰਨ ਚੌਕੇ-ਛੱਕਿਆਂ ਨਾਲ ਹੀ ਬਣੇ। ਵਾਰਨਰ ਨੇ ਹੈਡ ਨਾਲ ਮਿਲਕੇ ਪਹਿਲੇ ਵਿਕਟ ਲਈ 284 ਰਨ ਦੀ ਪਾਰਟਨਰਸ਼ਿਪ ਕੀਤੀ।
ਬਾਬਰ ਆਜ਼ਮ ਨੇ ਜੜਿਆ ਸੈਂਕੜਾ
ਬਾਬਰ ਆਜ਼ਮ ਨੇ 109 ਗੇਂਦਾਂ 'ਤੇ 100 ਰਨ ਦਾ ਯੋਗਦਾਨ ਪਾਇਆ। ਉਮਰ ਅਕਮਲ ਨੇ ਵੀ 46 ਰਨ ਦੀ ਪਾਰੀ ਖੇਡੀ ਪਰ ਬਾਕੀ ਦੇ ਪਾਕਿਸਤਾਨੀ ਬੱਲੇਬਾਜ ਵੱਡਾ ਯੋਗਦਾਨ ਪਾਉਣ 'ਚ ਨਾਕਾਮ ਰਹੇ ਅਤੇ ਪਾਕਿਸਤਾਨ ਦੀ ਟੀਮ 312 ਰਨ 'ਤੇ ਆਲ ਆਊਟ ਹੋ ਗਈ। ਆਸਟ੍ਰੇਲੀਆ ਨੇ ਮੈਚ 57 ਰਨ ਨਾਲ ਆਪਣੇ ਨਾਮ ਕੀਤਾ।
ਇਹ ਵਨਡੇ ਇਤਿਹਾਸ ਦੀ ਦੂਜੀ ਸਭ ਤੋਂ ਵੱਡੀ ਓਪਨਿੰਗ ਪਾਰਟਨਰਸ਼ਿਪ ਹੈ। ਆਸਟ੍ਰੇਲੀਆ ਲਈ ਇਹ ਸਭ ਤੋਂ ਵੱਡੀ ਓਪਨਿੰਗ ਪਾਰਟਨਰਸ਼ਿਪ ਸਾਬਿਤ ਹੋਈ।ਟਰੇਵਿਸ ਹੈਡ ਨੇ 128 ਰਨ ਦੀ ਪਾਰੀ ਖੇਡੀ।
370 ਰਨ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਪਾਕਿਸਤਾਨ ਦੀ ਟੀਮ ਲਈ ਸ਼ਰਜੀਲ ਖਾਨ ਅਤੇ ਬਾਬਰ ਆਜ਼ਮ ਨੇ ਦਮਦਾਰ ਪਾਰੀਆਂ ਖੇਡੀਆਂ। ਸ਼ਰਜੀਲ ਖਾਨ ਨੇ 69 ਗੇਂਦਾਂ 'ਤੇ 79 ਰਨ ਦੀ ਪਾਰੀ ਖੇਡੀ।