ਰੋਮਾਂਚਕ ਮੈਚ 'ਚ ਪਾਰੀ ਦੇ ਫਰਕ ਨਾਲ ਜਿੱਤਿਆ ਆਸਟ੍ਰੇਲੀਆ

ਆਸਟ੍ਰੇਲੀਆ ਅਤੇ ਪਾਕਿਸਤਾਨ ਵਿਚਾਲੇ ਮੈਲਬਰਨ 'ਚ ਖੇਡੇ ਗਏ ਟੈਸਟ ਸੀਰੀਜ਼ ਦੇ ਦੂਜੇ ਮੈਚ 'ਚ ਆਸਟ੍ਰੇਲੀਆ ਨੇ ਪਾਰੀ ਦੇ ਫਰਕ ਨਾਲ ਜਿੱਤ ਦਰਜ ਕਰ ਲਈ ਹੈ।

ਆਸਟ੍ਰੇਲੀਆ ਨੇ ਪਾਕਿਸਤਾਨ ਦੇ 443 ਰਨ ਦੇ ਸਕੋਰ ਦੇ 'ਜਵਾਬ ਚ ਮੈਚ ਦੇ 5ਵੇਂ ਦਿਨ ਆਪਣੀ ਪਹਿਲੀ ਪਾਰੀ 8 ਵਿਕਟਾਂ ਦੇ ਨੁਕਸਾਨ 'ਤੇ 624 ਰਨ ਬਣਾ ਕੇ ਐਲਾਨੀ। ਆਸਟ੍ਰੇਲੀਆ ਲਈ ਕਪਤਾਨ ਸਮਿਥ 165 ਰਨ ਬਣਾ ਕੇ ਨਾਬਾਦ ਰਹੇ ਜਦਕਿ ਮਿਚਲ ਸਟਾਰਕ ਨੇ 84 ਰਨ ਦੀ ਪਾਰੀ ਖੇਡੀ। ਸਟਾਰਕ ਦੀ ਪਾਰੀ 'ਚ 3 ਚੌਕੇ ਅਤੇ 7 ਛੱਕੇ ਸ਼ਾਮਿਲ ਸਨ। ਆਸਟ੍ਰੇਲੀਆ ਨੂੰ ਪਹਿਲੀ ਪਾਰੀ 'ਚ 181 ਰਨ ਦੀ ਲੀਡ ਹਾਸਿਲ ਹੋਈ।

ਪਾਕਿਸਤਾਨ - 163 ਆਲ ਆਊਟ

ਆਸਟ੍ਰੇਲੀਆ ਨੇ ਕਪਤਾਨ ਸਮਿਥ ਦੀ ਦਮਦਾਰ ਬੱਲੇਬਾਜ਼ੀ ਅਤੇ ਸਟਾਰਕ ਦੇ ਆਲ ਰਾਊਂਡ ਪ੍ਰਦਰਸ਼ਨ ਆਸਰੇ ਬੇਹਦ ਰੋਮਾਂਚਕ ਅੰਦਾਜ਼ 'ਚ ਮੈਚ ਆਪਣੇ ਨਾਮ ਕੀਤਾ। ਆਸਟ੍ਰੇਲੀਆ ਨੇ ਪਾਰੀ ਅਤੇ 18 ਰਨ ਦੇ ਫਰਕ ਨਾਲ ਮੈਚ ਆਪਣੇ ਨਾਮ ਕਰ ਸੀਰੀਜ਼ 'ਚ 2-0 ਦੀ ਲੀਡ ਹਾਸਿਲ ਕਰ ਲਈ।

ਆਸਟ੍ਰੇਲੀਆ - 624/8

ਪਾਕਿਸਤਾਨੀ ਟੀਮ ਨੇ ਪਹਿਲੀ ਪਾਰੀ 'ਚ ਦਮਦਾਰ ਬੱਲੇਬਾਜ਼ੀ ਵਿਖਾਈ ਸੀ ਪਰ ਦੂਜੀ ਪਾਰੀ 'ਚ ਪਾਕਿਸਤਾਨੀ ਬੱਲੇਬਾਜ ਆਸਟ੍ਰੇਲੀਆ ਦੇ ਗੇਂਦਬਾਜ਼ਾਂ ਸਾਹਮਣੇ ਟਿਕਣ 'ਚ ਨਾਕਾਮ ਰਹੇ। ਪਾਕਿਸਤਾਨ ਦੀ ਟੀਮ 53.2 ਓਵਰਾਂ 'ਚ 163 ਰਨ 'ਤੇ ਆਲ ਆਊਟ ਹੋ ਗਈ ਅਤੇ ਮੈਚ ਆਸਟ੍ਰੇਲੀਆ ਦੇ ਨਾਮ ਰਿਹਾ। ਆਸਟ੍ਰੇਲੀਆ ਲਈ ਮਿਚਲ ਸਟਾਰਕ ਨੇ 4 ਅਤੇ ਲਿਓਨ ਨੇ 3 ਵਿਕਟ ਹਾਸਿਲ ਕੀਤੇ।