Commonwealth Games Day 5 Updates: ਮੰਗਲਵਾਰ ਨੂੰ ਇੰਗਲੈਂਡ ਦੇ ਬਰਮਿੰਘਮ ਵਿੱਚ ਚੱਲ ਰਹੀਆਂ ਰਾਸ਼ਟਰਮੰਡਲ ਖੇਡਾਂ ਦਾ ਪੰਜਵਾਂ ਦਿਨ ਵੀ ਭਾਰਤ ਲਈ ਸ਼ਾਨਦਾਰ ਰਿਹਾ। ਪੰਜਵੇਂ ਦਿਨ ਖੇਡਾਂ ਵਿੱਚ ਭਾਗ ਲੈਣ ਵਾਲੇ ਸਾਰੇ ਦੇਸ਼ਾਂ ਦੇ ਖਿਡਾਰੀ ਕੁੱਲ 37 ਸੋਨ ਤਗਮਿਆਂ ਲਈ ਆਪਸ ਵਿੱਚ ਭਿੜੇ।
Commonwealth Games 2022: ਬਰਮਿੰਘਮ ਵਿੱਚ ਚੱਲ ਰਹੀਆਂ 22ਵੀਆਂ ਰਾਸ਼ਟਰਮੰਡਲ ਖੇਡਾਂ (Commonwealth Games 2022) ਦੇ ਪੰਜਵੇਂ ਦਿਨ ਭਾਰਤ ਨੇ ਲਾਅਨ ਬਾਲਸ (Lawn Balls) ਤੋਂ ਬਾਅਦ ਟੇਬਲ ਟੈਨਿਸ (Table Tennis) ਵਿੱਚ ਸੋਨ ਤਮਗਾ ਜਿੱਤਿਆ। ਭਾਰਤ ਨੂੰ ਫਿਰ ਤੋਂ ਵੇਟ ਲਿਫਟਿੰਗ ਵਿੱਚ ਵੀ ਮੈਡਲ ਮਿਲਿਆ। ਵਿਕਾਸ ਠਾਕੁਰ ਨੇ ਪੁਰਸ਼ਾਂ ਦੇ 96 ਕਿਲੋ ਵਰਗ ਵਿੱਚ ਚਾਂਦੀ ਦਾ ਤਗ਼ਮਾ ਜਿੱਤਿਆ। ਦੱਸ ਦਈਏ ਕਿ ਵਿਕਾਸ ਠਾਕੁਰ ਪੰਜਾਬ ਦੇ ਲੁਧਿਆਣਾ ਦਾ ਰਹਿਣ ਵਾਲਾ ਹੈ। ਇਸ ਵਾਰ ਪੰਜਾਬ ਦੇ ਖਿਡਾਰੀ ਸ਼ਾਨਦਾਰ ਪ੍ਰਦਰਸ਼ਨ ਕਰ ਰਹੇ ਹਨ।


ਉਧਰ ਭਾਰਤ ਨੂੰ ਬੈਡਮਿੰਟਨ ਦੇ ਫਾਈਨਲ ਵਿੱਚ ਸੋਨੇ ਦੀ ਉਮੀਦ ਸੀ। ਪੀਵੀ ਸਿੰਧੂ ਨੇ ਆਪਣਾ ਮੈਚ ਜਿੱਤ ਲਿਆ ਪਰ ਕਿਦਾਂਗੀ ਸ਼੍ਰੀਕਾਂਤ (kidambi srikanth) ਨਹੀਂ ਜਿੱਤ ਸਕੇ। ਜਿਸ ਕਾਰਨ ਮਲੇਸ਼ੀਆ ਨੇ ਇਹ ਮੈਚ 3-1 ਨਾਲ ਜਿੱਤ ਲਿਆ। ਭਾਰਤ ਨੂੰ ਚਾਂਦੀ ਨਾਲ ਹੀ ਸਬਰ ਕਰਨਾ ਪਿਆ। ਦੂਜੇ ਪਾਸੇ ਮਹਿਲਾ ਹਾਕੀ ਮੈਚ (India vs England Women Hockey) ਵਿੱਚ ਭਾਰਤ ਨੂੰ ਇੰਗਲੈਂਡ ਨੇ ਹਰਾਇਆ। ਇਸ ਨਾਲ ਭਾਰਤ ਦੇ ਕੁੱਲ ਮੈਡਲਾਂ ਦੀ ਗਿਣਤੀ 13 ਹੋ ਗਈ ਹੈ।



ਡਿਸਕਸ ਥਰੋਅ ਵਿੱਚ ਸੀਮਾ ਪੂਨੀਆ ਪੰਜਵੇਂ ਸਥਾਨ ’ਤੇ ਰਹੀ
ਮਹਿਲਾਵਾਂ ਦੇ ਡਿਸਕਸ ਥਰੋਅ ਵਿੱਚ ਭਾਰਤ ਨੂੰ ਨਿਰਾਸ਼ਾ ਹੋਈ। ਸੀਮਾ ਪੂਨੀਆ ਫਾਈਨਲ ਵਿੱਚ ਪੰਜਵੇਂ ਸਥਾਨ ’ਤੇ ਰਹੀ। ਉਸ ਨੇ ਛੇ ਕੋਸ਼ਿਸ਼ਾਂ ਚੋਂ ਦੋ ਕੋਸ਼ਿਸ਼ਾਂ ਫਾਊਲ ਕੀਤੀਆਂ। ਪਹਿਲੀ ਕੋਸ਼ਿਸ਼ ਵਿੱਚ ਉਸ ਨੇ ਡਿਸਕਸ ਨੂੰ 52.28 ਮੀਟਰ ਦੂਰ ਸੁੱਟਿਆ। ਇਸ ਤੋਂ ਬਾਅਦ ਦੂਜੀ ਕੋਸ਼ਿਸ਼ 'ਚ ਉਸ ਨੇ ਡਿਸਕਸ ਨੂੰ 55.92 ਮੀਟਰ ਦੂਰ ਸੁੱਟਿਆ। ਤੀਜੀ ਕੋਸ਼ਿਸ਼ ਵਿੱਚ ਸੀਮਾ ਨੇ ਡਿਸਕਸ 52.30 ਮੀਟਰ ਦੂਰ ਸੁੱਟਿਆ। ਚੌਥੀ ਅਤੇ ਪੰਜਵੀਂ ਕੋਸ਼ਿਸ਼ ਵਿੱਚ ਬਾਊਂਡਰੀ ਫਾਊਲ ਹੋਏ। ਆਪਣੀ ਛੇਵੀਂ ਅਤੇ ਆਖਰੀ ਕੋਸ਼ਿਸ਼ ਵਿੱਚ ਸੀਮਾ ਨੇ ਡਿਸਕਸ 53.81 ਮੀਟਰ ਦੂਰ ਸੁੱਟਿਆ।


 


ਇਸੇ ਈਵੈਂਟ ਵਿੱਚ ਇੱਕ ਹੋਰ ਭਾਰਤੀ ਅਥਲੀਟ ਨਵਜੀਤ ਕੌਰ ਢਿੱਲੋਂ ਅੱਠਵੇਂ ਸਥਾਨ ’ਤੇ ਰਹੀ। ਉਸਨੇ ਪਹਿਲੀ ਕੋਸ਼ਿਸ਼ ਵਿੱਚ 50.95 ਮੀਟਰ, ਦੂਜੀ ਕੋਸ਼ਿਸ਼ ਵਿੱਚ 53.14 ਮੀਟਰ ਡਿਸਕਸ ਸੁੱਟਿਆ। ਨਵਜੀਤ ਦੀ ਤੀਜੀ ਕੋਸ਼ਿਸ਼ ਫਾਊਲ ਰਹੀ। ਚੌਥੀ ਕੋਸ਼ਿਸ਼ ਵਿੱਚ ਨਵਜੀਤ ਨੇ 52.21 ਮੀਟਰ ਦੂਰ ਡਿਸਕਸ ਸੁੱਟਿਆ। ਉਸ ਨੇ ਪੰਜਵੀਂ ਕੋਸ਼ਿਸ਼ ਵਿੱਚ 52.46 ਮੀਟਰ ਅਤੇ ਛੇਵੀਂ ਕੋਸ਼ਿਸ਼ ਵਿੱਚ 53.51 ਮੀਟਰ ਦੂਰ ਸੁੱਟਿਆ।


ਭਾਰਤ ਦੇ ਮੈਡਲ ਜੇਤੂ
5 ਗੋਲਡ: ਮੀਰਾਬਾਈ ਚਾਨੂ, ਜੇਰੇਮੀ ਲਾਲਰਿਨੁੰਗਾ, ਅੰਚਿਤਾ ਸ਼ਿਉਲੀ, ਮਹਿਲਾ ਲਾਅਨ ਬਾਲ ਟੀਮ, ਟੇਬਲ ਟੈਨਿਸ ਪੁਰਸ਼ ਟੀਮ
5 ਚਾਂਦੀ: ਸੰਕੇਤ ਸਰਗਾਰੀ, ਬਿੰਦਿਆਰਾਣੀ ਦੇਵੀ, ਸੁਸ਼ੀਲਾ ਦੇਵੀ, ਵਿਕਾਸ ਠਾਕੁਰ, ਭਾਰਤੀ ਬੈਡਮਿੰਟਨ ਟੀਮ
3 ਕਾਂਸੀ: ਗੁਰੂਰਾਜਾ ਪੁਜਾਰੀ, ਵਿਜੇ ਕੁਮਾਰ ਯਾਦਵ, ਹਰਜਿੰਦਰ ਕੌਰ