Vijay Hazare Trophy 2023, Haryana Cricket Team: ਵਿਜੇ ਹਜ਼ਾਰੇ ਟਰਾਫੀ 2023 ਦੇ ਪਹਿਲੇ ਫਾਈਨਲਿਸਟ ਹਰਿਆਣਾ ਵਜੋਂ ਸਾਹਮਣੇ ਆਈ ਹੈ। ਹਰਿਆਣਾ ਨੇ ਘਰੇਲੂ ਕ੍ਰਿਕਟ ਵਿੱਚ ਖੇਡੇ ਜਾਣ ਵਾਲੇ 50 ਓਵਰਾਂ ਦੇ ਟੂਰਨਾਮੈਂਟ ਯਾਨਿ ਵਿਜੇ ਹਜ਼ਾਰੇ ਟਰਾਫੀ ਦੇ ਫਾਈਨਲ ਲਈ ਪਹਿਲੀ ਵਾਰ ਕੁਆਲੀਫਾਈ ਕੀਤਾ ਹੈ। ਅਸ਼ੋਕ ਮੇਨਾਰੀਆ ਦੀ ਕਪਤਾਨੀ ਵਾਲੀ ਹਰਿਆਣਾ ਨੇ ਸੈਮੀਫਾਈਨਲ 'ਚ ਤਾਮਿਲਨਾਡੂ ਨੂੰ 63 ਦੌੜਾਂ ਨਾਲ ਹਰਾ ਕੇ ਫਾਈਨਲ 'ਚ ਜਗ੍ਹਾ ਪੱਕੀ ਕੀਤੀ।
ਹਰਿਆਣਾ ਦੀ ਟੀਮ ਨੇ ਪੂਰੇ ਟੂਰਨਾਮੈਂਟ ਦੌਰਾਨ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਟੂਰਨਾਮੈਂਟ ਦੇ ਗਰੁੱਪ ਗੇੜ ਵਿੱਚ ਟੀਮ ਕੋਈ ਵੀ ਮੈਚ ਨਹੀਂ ਹਾਰੀ। ਹਰਿਆਣਾ ਨੇ ਗਰੁੱਪ ਪੜਾਅ ਦੇ ਮੈਚਾਂ ਵਿੱਚ ਕ੍ਰਮਵਾਰ ਉੱਤਰਾਖੰਡ, ਬਿਹਾਰ, ਚੰਡੀਗੜ੍ਹ, ਮਿਜ਼ੋਰਮ, ਦਿੱਲੀ, ਕਰਨਾਟਕ ਅਤੇ ਜੰਮੂ ਕਸ਼ਮੀਰ ਨੂੰ ਹਰਾਇਆ। ਇਸ ਤੋਂ ਬਾਅਦ ਕੁਆਰਟਰ ਫਾਈਨਲ ਵਿੱਚ ਹਰਿਆਣਾ ਨੇ ਬੰਗਾਲ ਨੂੰ ਹਰਾ ਕੇ ਸੈਮੀਫਾਈਨਲ ਵਿੱਚ ਥਾਂ ਬਣਾਈ। ਫਿਰ ਸੈਮੀਫਾਈਨਲ 'ਚ ਤਾਮਿਲਨਾਡੂ ਨੂੰ ਹਰਾ ਕੇ ਫਾਈਨਲ 'ਚ ਜਗ੍ਹਾ ਪੱਕੀ ਕੀਤੀ।
ਫਾਈਨਲ ਮੈਚ 16 ਦਸੰਬਰ ਦਿਨ ਸ਼ਨੀਵਾਰ ਨੂੰ ਰਾਜਕੋਟ ਵਿੱਚ ਖੇਡਿਆ ਜਾਵੇਗਾ। ਹਰਿਆਣਾ ਨੇ ਰਾਜਕੋਟ ਵਿੱਚ ਹੀ ਸੈਮੀਫਾਈਨਲ ਵਿੱਚ ਤਾਮਿਲਨਾਡੂ ਨੂੰ ਹਰਾਇਆ ਸੀ। ਟੂਰਨਾਮੈਂਟ ਦਾ ਪਹਿਲਾ ਸੈਮੀਫਾਈਨਲ ਹਰਿਆਣਾ ਅਤੇ ਤਾਮਿਲਨਾਡੂ ਵਿਚਾਲੇ ਖੇਡਿਆ ਗਿਆ। ਇਸ ਤੋਂ ਬਾਅਦ 14 ਦਸੰਬਰ ਵੀਰਵਾਰ ਨੂੰ ਦੂਜਾ ਸੈਮੀਫਾਈਨਲ ਰਾਜਸਥਾਨ ਅਤੇ ਕਰਨਾਟਕ ਵਿਚਾਲੇ ਖੇਡਿਆ ਜਾਵੇਗਾ। ਦੂਜਾ ਸੈਮੀਫਾਈਨਲ ਜਿੱਤਣ ਵਾਲੀ ਟੀਮ ਖ਼ਿਤਾਬੀ ਮੈਚ ਲਈ ਹਰਿਆਣਾ ਨਾਲ ਭਿੜੇਗੀ।
ਜਾਣੋ ਸੈਮੀਫਾਈਨਲ ਦਾ ਹਾਲ...
ਸੈਮੀਫਾਈਨਲ 'ਚ ਹਰਿਆਣਾ ਨੇ ਟਾਸ ਜਿੱਤ ਕੇ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਅਤੇ 50 ਓਵਰਾਂ 'ਚ 7 ਵਿਕਟਾਂ 'ਤੇ 293 ਦੌੜਾਂ ਬਣਾਈਆਂ। ਹਿਮਾਂਸ਼ੂ ਰਾਣਾ ਨੇ ਟੀਮ ਲਈ 116 ਦੌੜਾਂ ਦੀ ਸਭ ਤੋਂ ਵੱਡੀ ਪਾਰੀ ਖੇਡੀ, ਜਿਸ ਵਿੱਚ 11 ਚੌਕੇ ਅਤੇ 2 ਛੱਕੇ ਸ਼ਾਮਲ ਸਨ। ਇਸ ਤੋਂ ਇਲਾਵਾ ਸਲਾਮੀ ਬੱਲੇਬਾਜ਼ ਯੁਵਰਾਜ ਸਿੰਘ ਨੇ 7 ਚੌਕਿਆਂ ਅਤੇ 1 ਛੱਕੇ ਦੀ ਮਦਦ ਨਾਲ 65 ਦੌੜਾਂ ਬਣਾਈਆਂ।
ਫਿਰ ਟੀਚੇ ਦਾ ਪਿੱਛਾ ਕਰਨ ਉਤਰੀ ਤਾਮਿਲਨਾਡੂ ਦੀ ਟੀਮ 47.1 ਓਵਰਾਂ ਵਿਚ 230 ਦੌੜਾਂ 'ਤੇ ਹਰਿਆਣਾ ਦੇ ਗੇਂਦਬਾਜ਼ਾਂ ਦੇ ਹੱਥੋਂ ਆਊਟ ਹੋ ਗਈ ਅਤੇ 63 ਦੌੜਾਂ ਨਾਲ ਜਿੱਤ ਦਰਜ ਕੀਤੀ। ਇਸ ਦੌਰਾਨ ਹਰਿਆਣਾ ਲਈ ਅੰਸ਼ੁਲ ਕੰਬੋਜ ਨੇ ਸਭ ਤੋਂ ਵੱਧ 4 ਵਿਕਟਾਂ ਲਈਆਂ। ਇਸ ਤੋਂ ਇਲਾਵਾ ਰਾਹੁਲ ਤੇਵਤੀਆ ਨੇ 2 ਵਿਕਟਾਂ ਹਾਸਲ ਕੀਤੀਆਂ। ਜਦਕਿ ਸੁਮਿਤ ਕੁਮਾਰ, ਨਿਸ਼ਾਂਤ ਸਿੰਧੂ ਅਤੇ ਹਰਸ਼ਲ ਪਟੇਲ ਨੇ 1-1 ਵਿਕਟ ਲਈ।