ਭਾਰਤ ਤੇ ਦੱਖਣੀ ਅਫਰੀਕਾ ਦਾ ਦੂਜਾ ਟੈਸਟ ਮੈਚ ਬਣਿਆ ਰੌਚਕ

ਨਵੀਂ ਦਿੱਲੀ: ਸੈਂਚੂਰੀਅਨ ਵਿੱਚ ਖੇਡੇ ਜਾ ਰਹੇ ਦੂਜੇ ਟੈਸਟ ਮੈਚ ਦੀ ਦੂਜੀ ਪਾਰੀ ਸ਼ੁਰੂ ਹੋ ਚੁੱਕੀ ਹੈ। ਬਾਰਿਸ਼ ਕਾਰਨ ਮੈਚ ਰੁਕ ਗਿਆ ਸੀ ਪਰ ਕੁਝ ਸਮੇਂ ਬਾਅਦ ਚਾਲੂ ਹੋ ਗਿਆ। ਦੂਜੀ ਪਾਰੀ ਵਿੱਚ ਦੀ ਸ਼ੁਰੂਆਤ ਵਿੱਚ ਮੇਜ਼ਬਾਨ ਟੀਮ ਲੜਖੜਾ ਗਈ ਪਰ ਬਾਅਦ ਵਿੱਚ ਏ ਬੀ ਡਿਵੀਲੀਅਰਜ਼ ਤੇ ਡੀਨ ਅਲਗਰ ਨੇ ਟੀਮ ਨੂੰ ਸੰਭਾਲ ਲਿਆ। ਮੈਚ ਰੁਮਾਂਚਕ ਦੌਰ ਵਿੱਚ ਪਹੁੰਚ ਚੁੱਕਾ ਹੈ। ਜੇਕਰ ਭਾਰਤੀ ਗੇਂਦਬਾਜ਼ ਮੇਜ਼ਬਾਨ ਟੀਮ ਨੂੰ ਘੱਟ ਤੋਂ ਘੱਟ ਦੌੜਾਂ 'ਤੇ ਆਊਟ ਕਰ ਲੈਂਦੇ ਹਨ ਤਾਂ ਮੈਚ ਆਪਣੀ ਟੀਮ ਦੀ ਝੋਲੀ ਪਾ ਸਕਦੇ ਹਨ। ਉੱਧਰ ਦੱਖਣੀ ਅਫਰੀਕਾ 'ਤੇ ਭਾਰਤ ਨੂੰ ਵੱਡੇ ਤੋਂ ਵੱਡਾ ਟੀਚਾ ਦੇਣ ਦਾ ਦਬਾਅ ਹੈ। ਫਿਲਹਾਲ ਦੱਖਣੀ ਅਫਰੀਕਾ ਨੂੰ 108 ਦੌੜਾਂ ਦੀ ਲੀਡ ਮਿਲ ਚੁੱਕੀ ਹੈ। ਮੈਚ ਦੀ ਪਹਿਲੀ ਇਨਿੰਗਜ਼ ਦਾ ਅੰਤ ਵਿਰਾਟ ਕੋਹਲੀ ਦੀ ਕਪਤਾਨੀ ਪਾਰੀ ਸਦਕਾ ਭਾਰਤ ਨੂੰ ਹਾਰ ਦੀ ਨਮੋਸ਼ੀ ਵਿੱਚੋਂ ਕੱਢਣ ਨਾਲ ਹੋਇਆ। ਪਹਿਲੀ ਪਾਰੀ ਵਿੱਚ ਦੱਖਣੀ ਅਫਰੀਕਾ ਵੱਲੋਂ ਬਣਾਈਆਂ 335 ਦੌੜਾਂ ਦੇ ਜਵਾਬ ਵਿੱਚ ਪੂਰੀ ਭਾਰਤੀ ਟੀਮ ਨੇ 307 ਦੌੜਾਂ ਬਣਾ ਆਊਟ ਹੋ ਗਈ ਸੀ। ਕਪਤਾਨ ਵਿਰਾਟ ਕੋਹਲੀ ਨੇ ਆਪਣੀਆਂ 153 ਦੌੜਾਂ ਪੂਰੀਆਂ ਕਰ ਕੇ ਟੈਸਟ ਕਰੀਅਰ ਵਿੱਚ ਇਹ ਇੱਕੀਵਾਂ ਤੇ ਵਿਆਹ ਤੋਂ ਬਾਅਦ ਪਹਿਲਾ ਸੈਂਕੜਾ ਬਣਾ ਲਿਆ ਹੈ। ਆਖ਼ਰੀ ਵਿਕਟ ਟੀਮ ਦੇ ਕਪਤਾਨ ਵਿਰਾਟ ਕੋਹਲੀ ਦੀ ਡਿੱਗੀ ਜਦੋਂ ਉਹ ਮੋਰੇਨ ਮੋਰਕਲ ਦੀ ਗੇਂਦ ‘ਤੇ ਏ.ਬੀ. ਡੇਵਿਲੀਅਰਜ਼ ਨੂੰ ਕੈਚ ਦੇ ਬੈਠੇ। ਕੋਹਲੀ ਤੋਂ ਇਲਾਵਾ ਟੀਮ ਨੂੰ ਰਵੀ ਚੰਦਰਨ ਅਸ਼ਵਿਨ ਦੀਆਂ 38 ਦੌੜਾਂ ਨਾਲ ਮਜ਼ਬੂਤੀ ਮਿਲੀ। ਇਸ ਤੋਂ ਪਹਿਲਾਂ ਸਲਾਮੀ ਬੱਲੇਬਾਜ਼ ਮੁਰਲੀ ਵਿਜੇ ਨੇ ਆਪਣੀਆਂ 46 ਦੌੜਾਂ ਸਦਕਾ ਟੀਮ ਨੂੰ ਕਾਫੀ ਸਹਾਰਾ ਦਿੱਤਾ। ਦੂਜੇ ਸਲਾਮੀ ਬੱਲੇਬਾਜ਼ ਲੋਕੇਸ਼ ਰਾਹੁਲ ਤੇ ਮੁਢਲੇ ਕ੍ਰਮ ਦੇ ਬੱਲੇਬਾਜ਼ ਚਿਤੇਸ਼ਵਰ ਪੁਜਾਰਾ ਨੇ ਭਾਰਤ ਨੂੰ ਫਿਰ ਨਿਰਾਸ਼ ਕੀਤਾ। ਤੀਜੇ ਦਿਨ ਦੀ ਖੇਡ ਸ਼ੁਰੂ ਹੋਣ ਤੋਂ ਬਾਅਦ ਹਾਰਦਿਕ ਪੰਡਿਆ ਰਨ ਆਊਟ ਹੋ ਗਏ, ਜਿਸ ਨਾਲ ਭਾਰਤ ਨੂੰ ਕਰਾਰਾ ਝਟਕਾ ਲੱਗਾ। ਇਸ ਤੋਂ ਪਹਿਲਾਂ ਭਾਰਤ ਨੇ ਦੂਜੇ ਦਿਨ ਸਵੇਰੇ ਦੱਖਣੀ ਅਫਰੀਕਾ ਨੂੰ ਆਲ ਆਊਟ ਕਰ ਦਿੱਤਾ ਸੀ। ਭਾਰਤ ਦੇ ਫਿਰਕੀ ਗੇਂਦਬਾਜ਼ ਰਵੀਚੰਦਰਨ ਅਸ਼ਵਿਨ ਤੇ ਤੇਜ਼ ਗੇਂਦਬਾਜ਼ ਈਸ਼ਾਂਤ ਸ਼ਰਮਾ ਵੱਲੋਂ ਕ੍ਰਮਵਾਰ 4 ਤੇ 3 ਵਿਕਟਾਂ ਝਟਕਾਈਆਂ। ਪਹਿਲੀ ਪਾਰੀ ਵਿੱਚ ਦੱਖਣੀ ਅਫਰੀਕਾ ਦੇ ਕਿਸੇ ਬੱਲੇਬਾਜ਼ ਨੇ ਸੈਂਕੜਾ ਤਾਂ ਨਹੀਂ ਬਣਾਇਆ ਪਰ ਤਿੰਨ ਖਿਡਾਰੀਆਂ ਦੇ ਅਰਧ ਸੈਂਕੜਿਆਂ ਨਾਲ ਟੀਮ ਨੇ ਚੰਗਾ ਸਕੋਰ ਖੜ੍ਹਾ ਕਰ ਲਿਆ। ਟੀਮ ਦੇ ਹਾਸ਼ਿਮ ਅਮਲਾ ਤੇ ਏਡਨ ਮਾਰਕਮ ਨੇ ਕ੍ਰਮਵਾਰ 82 ਤੇ 94 ਦੌੜਾਂ ਬਣਾਈਆਂ ਸਨ।