Lakshya Sen Reaches Semifinal Badminton Olympics 2024: ਨੌਜਵਾਨ ਸ਼ਟਲਰ ਲਕਸ਼ਯ ਸੇਨ ਨੇ ਆਪਣੇ ਜ਼ਬਰਦਸਤ ਪ੍ਰਦਰਸ਼ਨ ਨਾਲ ਪੈਰਿਸ ਓਲੰਪਿਕ 'ਚ ਪੀਵੀ ਸਿੰਧੂ ਅਤੇ ਸਾਤਵਿਕਸਾਈਰਾਜ ਰੈਂਕੀਰੈੱਡੀ-ਚਿਰਾਗ ਸ਼ੈੱਟੀ ਦੀ ਹਾਰ ਤੋਂ ਨਿਰਾਸ਼ ਭਾਰਤੀ ਪ੍ਰਸ਼ੰਸਕਾਂ ਨੂੰ ਖੁਸ਼ਖਬਰੀ ਦਿੱਤੀ ਹੈ। ਲਕਸ਼ਯ ਸੇਨ ਨੇ ਪੈਰਿਸ ਓਲੰਪਿਕ 2024 ਵਿੱਚ ਪੁਰਸ਼ ਸਿੰਗਲ ਬੈਡਮਿੰਟਨ ਦੇ ਸੈਮੀਫਾਈਨਲ ਵਿੱਚ ਥਾਂ ਬਣਾ ਕੇ ਇਤਿਹਾਸ ਰਚ ਦਿੱਤਾ ਹੈ। ਇਸ ਨਾਲ ਉਹ ਓਲੰਪਿਕ ਇਤਿਹਾਸ ਵਿੱਚ ਸੈਮੀਫਾਈਨਲ ਵਿੱਚ ਪਹੁੰਚਣ ਵਾਲਾ ਪਹਿਲਾ ਭਾਰਤੀ ਪੁਰਸ਼ ਖਿਡਾਰੀ ਬਣ ਗਿਆ ਹੈ। ਲਕਸ਼ਯ (Lakshya Sen) ਨੇ ਆਪਣੇ ਕੁਆਰਟਰ ਫਾਈਨਲ ਮੈਚ (Reaches Semifinal) ਵਿੱਚ ਪਛੜਨ ਤੋਂ ਬਾਅਦ ਜ਼ੋਰਦਾਰ ਵਾਪਸੀ ਕਰਦਿਆਂ ਤਾਇਵਾਨ ਦੇ ਸ਼ਟਲਰ ਨੂੰ 19-21, 21-15 ਨਾਲ ਹਰਾਇਆ।
ਬੀਤੇ ਦਿਨ ਭਾਰਤ ਨੂੰ ਬੈਡਮਿੰਟਨ ਕੋਰਟ ਵਿੱਚ ਦੋਹਰਾ ਝਟਕਾ ਲੱਗਾ ਸੀ
ਇੱਕ ਦਿਨ ਪਹਿਲਾਂ ਹੀ ਭਾਰਤ ਨੂੰ ਬੈਡਮਿੰਟਨ ਕੋਰਟ ਵਿੱਚ ਦੋਹਰਾ ਝਟਕਾ ਲੱਗਾ ਸੀ। ਦੇਸ਼ ਲਈ ਤਮਗੇ ਦੀ ਵੱਡੀ ਉਮੀਦ ਬਣੀ ਸਟਾਰ ਸ਼ਟਲਰ ਪੀਵੀ ਸਿੰਧੂ ਲਗਾਤਾਰ ਤੀਜਾ ਓਲੰਪਿਕ ਤਮਗਾ ਜਿੱਤਣ ਤੋਂ ਖੁੰਝ ਗਈ। ਉਸ ਨੂੰ ਪ੍ਰੀ ਕੁਆਰਟਰ ਫਾਈਨਲ ਵਿੱਚ ਹੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਉਥੇ ਹੀ ਪੁਰਸ਼ ਡਬਲਜ਼ ਵਿੱਚ ਸਾਤਵਿਕ-ਚਿਰਾਗ ਦੀ ਸੁਪਰਸਟਾਰ ਜੋੜੀ ਨੂੰ ਵੀ ਦਿਲ ਦਹਿਲਾਉਣ ਵਾਲੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਅਤੇ ਉਹ ਵੀ ਕੁਆਰਟਰ ਫਾਈਨਲ ਵਿੱਚ ਹੀ ਬਾਹਰ ਹੋ ਗਏ। ਅਜਿਹੇ 'ਚ ਬੈਡਮਿੰਟਨ 'ਚ ਭਾਰਤ ਦੀ ਆਖਰੀ ਉਮੀਦ ਲਕਸ਼ਯ ਸੀ, ਜਿਸ ਨੇ ਪ੍ਰੀ-ਕੁਆਰਟਰ ਫਾਈਨਲ 'ਚ ਭਾਰਤ ਦੇ ਆਪਣੇ ਸੀਨੀਅਰ ਐੱਚ.ਐੱਸ. ਪ੍ਰਣਯ ਨੂੰ ਹਰਾਇਆ।
ਲਕਸ਼ਯ ਨੂੰ ਜਿੱਤ ਦੇ ਲਈ ਵੱਡੀ ਚੁਣੌਤੀ ਦਾ ਸਾਹਮਣਾ ਕਰਨਾ ਪਿਆ
ਹਾਲਾਂਕਿ ਲਕਸ਼ਯ ਦੇ ਸਾਹਮਣੇ ਚੁਣੌਤੀ ਆਸਾਨ ਨਹੀਂ ਸੀ ਕਿਉਂਕਿ ਉਹ ਤਾਈਵਾਨੀ ਖਿਡਾਰੀ ਚਾਉ ਤਿਏਨ ਚੇਨ ਖਿਲਾਫ 4 ਮੈਚਾਂ 'ਚੋਂ ਸਿਰਫ 1 ਹੀ ਜਿੱਤ ਸਕਿਆ ਸੀ। ਇਸ ਮੈਚ ਦੀ ਸ਼ੁਰੂਆਤ ਵੀ ਲਕਸ਼ਯ ਲਈ ਚੰਗੀ ਨਹੀਂ ਰਹੀ ਅਤੇ ਸਖ਼ਤ ਮੁਕਾਬਲੇ ਵਿੱਚ ਤਾਈਵਾਨੀ ਖਿਡਾਰੀ ਨੇ ਪਹਿਲੀ ਗੇਮ 21-19 ਨਾਲ ਜਿੱਤ ਲਈ। ਇਸ ਤੋਂ ਬਾਅਦ ਲਕਸ਼ਯ ਨੇ ਹੈਰਾਨੀਜਨਕ ਵਾਪਸੀ ਕੀਤੀ ਅਤੇ ਚਾਉ ਨੂੰ ਵੀ ਸੰਭਲਣ ਦਾ ਮੌਕਾ ਨਹੀਂ ਦਿੱਤਾ। ਲਕਸ਼ਯ ਨੇ ਅਗਲੇ ਦੋ ਗੇਮਾਂ ਵਿੱਚ ਤਾਈਵਾਨੀ ਸ਼ਟਲਰ ਦੀਆਂ ਕੋਸ਼ਿਸ਼ਾਂ ਨੂੰ ਨਾਕਾਮ ਕਰ ਦਿੱਤਾ ਅਤੇ ਜ਼ਬਰਦਸਤ ਸਮੈਸ਼ ਅਤੇ ਚਲਾਕ ਡਰਾਪ ਸ਼ਾਟ ਨਾਲ ਮੈਚ ਜਿੱਤ ਲਿਆ।