2028 Los Angeles Olympics: ਅਮਰੀਕਾ ਦੇ ਲਾਸ ਏਂਜਲਸ ਵਿੱਚ ਹੋਣ ਵਾਲੇ 2028 ਓਲੰਪਿਕ (Olympics 2028) ਵਿੱਚ ਕ੍ਰਿਕਟ ਨੂੰ ਸ਼ਾਮਲ ਕੀਤੇ ਜਾਣ ਦੀ ਉਮੀਦ ਹੈ।

ਆਈਸੀਸੀ ਨੇ ਇਸ ਮਾਮਲੇ ਵਿੱਚ ਆਪਣੀ ਪੂਰੀ ਯੋਜਨਾ ਲਾਸ ਏਂਜਲਸ ਓਲੰਪਿਕ ਖੇਡਾਂ ਦੀ ਆਯੋਜਨ ਕਮੇਟੀ ਨੂੰ ਭੇਜ ਦਿੱਤੀ ਹੈ, ਜਿਸ ਤੋਂ ਬਾਅਦ ਅਕਤੂਬਰ ਤੱਕ ਅੰਤਿਮ ਫੈਸਲਾ ਲਿਆ ਜਾਵੇਗਾ।

ਆਈਸੀਸੀ ਨੇ ਓਲੰਪਿਕ ਵਿੱਚ ਕ੍ਰਿਕਟ ਨੂੰ ਸ਼ਾਮਲ ਕਰਨ ਲਈ ਇੱਕ ਬਹੁਤ ਛੋਟੀ ਯੋਜਨਾ ਭੇਜੀ ਹੈ। ਆਈਸੀਸੀ ਨੇ ਪੁਰਸ਼ ਅਤੇ ਮਹਿਲਾ ਕ੍ਰਿਕਟ ਲਈ 6-6 ਟੀਮਾਂ ਦੀ ਸਿਫ਼ਾਰਿਸ਼ ਕੀਤੀ ਹੈ।

ਕ੍ਰਿਕਟ ਦਾ ਫਾਰਮੈਟ ਵੀ ਟੀ-20 ਰੱਖਿਆ ਗਿਆ ਹੈ। ਓਲੰਪਿਕ ਬਜਟ ਨੂੰ ਧਿਆਨ ਵਿੱਚ ਰੱਖਦਿਆਂ ਘੱਟ ਟੀਮਾਂ ਨੂੰ ਸ਼ਾਮਲ ਕਰਨ ਦੀ ਯੋਜਨਾ ਭੇਜੀ ਗਈ ਹੈ। ਸਾਰੇ ਮੈਚ ਇੱਕੋ ਥਾਂ 'ਤੇ ਕਰਵਾਉਣ ਦੀ ਸਿਫ਼ਾਰਸ਼ ਵੀ ਕੀਤੀ ਗਈ ਹੈ ਤਾਂ ਜੋ ਮੇਜ਼ਬਾਨ ਦੇਸ਼ ਦਾ ਬਜਟ ਜ਼ਿਆਦਾ ਨਾ ਵਧੇ। ਇਹ ਜਾਣਕਾਰੀ ਕ੍ਰਿਕਇੰਫੋ ਦੀ ਰਿਪੋਰਟ ਵਿੱਚ ਸਾਹਮਣੇ ਆਈ ਹੈ।

ਅਕਤੂਬਰ 'ਚ ਕਰਨਗੇ ਫੈਸਲਾ : ਅੰਤਰਰਾਸ਼ਟਰੀ ਓਲੰਪਿਕ ਕਮੇਟੀ (IOC) ਇਸ ਸਾਲ ਮਾਰਚ ਤੱਕ 2028 ਓਲੰਪਿਕ ਲਈ ਨਵੀਆਂ ਖੇਡਾਂ ਦੀ ਸੂਚੀ ਤਿਆਰ ਕਰੇਗੀ। ਇਸ ਤੋਂ ਬਾਅਦ ਅਕਤੂਬਰ 'ਚ ਮੁੰਬਈ 'ਚ ਹੋਣ ਵਾਲੇ ਆਈਓਸੀ ਸੈਸ਼ਨ 'ਚ ਸਾਰੀਆਂ ਨਵੀਆਂ ਖੇਡਾਂ 'ਤੇ ਵਿਚਾਰ-ਵਟਾਂਦਰਾ ਕਰਨ ਤੋਂ ਬਾਅਦ ਫੈਸਲਾ ਲਿਆ ਜਾਵੇਗਾ।

ਕ੍ਰਿਕਟ ਦੇ ਨਾਲ-ਨਾਲ ਬੇਸਬਾਲ, ਸਾਫਟਬਾਲ, ਫਲੈਗ ਫੁੱਟਬਾਲ, ਲੈਕਰੋਸ, ਬ੍ਰੇਕ ਡਾਂਸਿੰਗ, ਕਰਾਟੇ, ਕਿੱਕ ਬਾਕਸਿੰਗ, ਸਕੁਐਸ਼ ਅਤੇ ਮੋਟਰਸਪੋਰਟ ਵੀ ਓਲੰਪਿਕ 2028 ਦਾ ਹਿੱਸਾ ਬਣਨ ਲਈ ਸੂਚੀ ਵਿੱਚ ਹਨ।

ਛੋਟੀ ਜਿਹੀ ਯੋਜਨਾ ਭੇਜ ਕੇ ਜਗਾਈ ਉਮੀਦ : ਕ੍ਰਿਕਟ ਲਈ ਟੀਮਾਂ ਨੂੰ ਸੀਮਤ ਕਰਕੇ ਅਤੇ ਸਿਰਫ਼ ਇੱਕ ਸਥਾਨ ਦੀ ਸਿਫ਼ਾਰਸ਼ ਕਰਕੇ, ਆਈਸੀਸੀ ਨੇ ਓਲੰਪਿਕ 2028 ਵਿੱਚ ਕ੍ਰਿਕਟ ਨੂੰ ਸ਼ਾਮਲ ਕਰਨ ਦੀਆਂ ਉਮੀਦਾਂ ਵਧਾ ਦਿੱਤੀਆਂ ਹਨ।

ਅਜੇ ਤੱਕ ਇਹ ਸਾਹਮਣੇ ਨਹੀਂ ਆਇਆ ਹੈ ਕਿ ਓਲੰਪਿਕ 'ਚ 6 ਕ੍ਰਿਕਟ ਟੀਮਾਂ ਇਕ-ਦੂਜੇ ਨਾਲ ਕਿਵੇਂ ਭਿੜਨਗੀਆਂ ਅਤੇ ਟੂਰਨਾਮੈਂਟ ਕਿਸ ਫਾਰਮੈਟ 'ਚ ਖੇਡਿਆ ਜਾਵੇਗਾ ਪਰ ਮੰਨਿਆ ਜਾ ਰਿਹੈ ਕਿ ਜੇ ਆਈਸੀਸੀ ਦਾ ਪ੍ਰਸਤਾਵ ਮੰਨ ਲਿਆ ਜਾਂਦਾ ਹੈ ਤਾਂ ਮਹਿਲਾ ਅਤੇ ਪੁਰਸ਼ ਟੀ-20 ਦੀ ਰੈਂਕਿੰਗ ਟੀਮਾਂ ਕੀਤੀਆਂ ਜਾਣਗੀਆਂ। ਨਿਰਧਾਰਤ ਮਿਤੀ ਤੱਕ ਚੋਟੀ 'ਤੇ ਰਹਿਣ ਵਾਲੀਆਂ 6-6 ਟੀਮਾਂ ਐਂਟਰੀ ਲੈ ਸਕਦੀਆਂ ਹਨ।