ਅਰਥਰਾਈਟਿਸ, ਜਿਸ ਨੂੰ ਗਠੀਆ ਵੀ ਕਿਹਾ ਜਾਂਦਾ ਹੈ, ਇਕ ਬਿਮਾਰੀ ਹੈ ਜੋ ਜੋੜਾਂ ਨੂੰ ਪ੍ਰਭਾਵਿਤ ਕਰਦੀ ਹੈ। ਇਸ ਦੀਆਂ ਕਈ ਕਿਸਮਾਂ ਹਨ ਤੇ ਇਸਦੇ ਲੱਛਣਾਂ 'ਚ ਜੋੜਾਂ ਦਾ ਦਰਦ, ਸੋਜ ਤੇ ਗਤੀਸ਼ੀਲਤਾ 'ਚ ਕਮੀ ਸ਼ਾਮਲ ਹਨ। ਜ਼ਿਆਦਾ ਭਾਰ ਹੋਣ ਨਾਲ ਜੋੜਾਂ 'ਤੇ ਦਬਾਅ ਵਧਦਾ ਹੈ। ਇਹ ਖਾਸ ਤੌਰ 'ਤੇ ਗੋਡਿਆਂ, ਕੁੱਲ੍ਹੇ ਤੇ ਰੀੜ੍ਹ ਦੀ ਹੱਡੀ ਨੂੰ ਸਭ ਤੋਂ ਵੱਧ ਪ੍ਰਭਾਵਿਤ ਕਰਦਾ ਹੈ। ਇਸ ਕਾਰਨ ਗਠੀਏ ਦੇ ਲੱਛਣ ਵਧ ਸਕਦੇ ਹਨ। ਇਕ ਸਿਹਤਮੰਦ ਖੁਰਾਕ ਤੇ ਨਿਯਮਤ ਕਸਰਤ ਜ਼ਰੀਏ ਹੈਲਦੀ ਵਜ਼ਨ ਬਣਾਈ ਰੱਖਣ ਨਾਲ ਜੋੜਾਂ 'ਤੇ ਦਬਾਅ ਘੱਟ ਜਾਂਦਾ ਹੈ। ਵਿਟਾਮਿਨ, ਖਣਿਜ ਤੇ ਐਂਟੀਆਕਸੀਡੈਂਟਸ ਨਾਲ ਭਰਪੂਰ ਸੰਤੁਲਿਤ ਭੋਜਨ ਜੋੜਾਂ ਦੀ ਸਿਹਤ ਲਈ ਚੰਗਾ ਹੈ। ਓਮੇਗਾ-3 ਫੈਟੀ ਐਸਿਡ ਨਾਲ ਭਰਪੂਰ ਭੋਜਨ ਪਦਾਰਥ ਜਿਵੇਂ ਕਿ ਮੱਛੀ, ਅਖਰੋਟ ਅਤੇ ਫਲੈਕਸਸੀਡਜ਼ ਸੋਜ ਨੂੰ ਘੱਟ ਕਰਨ ਵਿੱਚ ਮਦਦ ਕਰਦੇ ਹਨ। ਨਿਯਮਤ ਕਸਰਤ ਕਰਨ ਨਾਲ ਜੋੜਾਂ ਨੂੰ ਮਜ਼ਬੂਤੀ ਮਿਲਦੀ ਹੈ ਅਤੇ ਲਚਕਤਾ ਵਧਦੀ ਹੈ। ਹੌਲੀ-ਹੌਲੀ ਸ਼ੁਰੂ ਕਰੋ ਤੇ ਅਜਿਹੀਆਂ ਗਤੀਵਿਧੀਆਂ ਚੁਣੋ ਜੋ ਤੁਹਾਡੇ ਲਈ ਆਸਾਨ ਹਨ, ਜਿਵੇਂ ਕਿ ਤੈਰਾਕੀ, ਯੋਗਾ, ਜਾਂ ਤਾਈ ਚੀ। ਯੋਗਾ ਵਿਸ਼ੇਸ਼ ਤੌਰ 'ਤੇ ਗਠੀਏ ਨੂੰ ਰੋਕਣ 'ਚ ਮਦਦ ਕਰ ਸਕਦਾ ਹੈ। ਸਿਗਰਟ ਪੀਣ ਨਾਲ ਜੋੜਾਂ 'ਚ ਖੂਨ ਦਾ ਸੰਚਾਰ ਘੱਟ ਹੁੰਦਾ ਹੈ ਤੇ ਸੋਜ ਵਧਦੀ ਹੈ। ਤਣਾਅ ਗਠੀਏ ਦੇ ਲੱਛਣਾਂ ਨੂੰ ਵਧਾ ਸਕਦਾ ਹੈ। ਯੋਗਾ, ਧਿਆਨ ਤੇ ਡੂੰਘੇ ਸਾਹ ਲੈਣ ਵਰਗੀਆਂ ਤਕਨੀਕਾਂ ਦੀ ਵਰਤੋਂ ਕਰਕੇ ਤਣਾਅ ਨੂੰ ਘਟਾਉਣ ਦੀ ਕੋਸ਼ਿਸ਼ ਕਰੋ।