ਅਮਰੀਕਾ ਵਿੱਚ ਅੰਡਿਆਂ ਦੀ ਕੀਮਤ ਰਿਕਾਰਡ ਪੱਧਰ 'ਤੇ ਪਹੁੰਚ ਗਈ ਹੈ, ਜਿਸ ਕਾਰਨ ਉਪਭੋਗਤਾ ਚਿੰਤਤ ਹਨ।

ਇਸ ਵਾਧੂ ਕੀਮਤ ਦਾ ਮੁੱਖ ਕਾਰਨ ਬਰਡ ਫਲੂ ਹੈ, ਜਿਸ ਨੇ ਦੇਸ਼ ਭਰ ਵਿੱਚ ਅੰਡਿਆਂ ਦੀ ਸਪਲਾਈ ਨੂੰ ਗੰਭੀਰ ਤਰੀਕੇ ਨਾਲ ਪ੍ਰਭਾਵਿਤ ਕੀਤਾ ਹੈ।

ਕਦੇ ਸਸਤਾ ਪ੍ਰੋਟੀਨ ਮੰਨਿਆ ਜਾਂਦਾ ਅੰਡਾ ਹੁਣ ਮਹਿੰਗੇ ਖਾਣ-ਪੀਣ ਵਾਲੇ ਆਈਟਮਾਂ ਦੀ ਸ਼੍ਰੇਣੀ ਵਿੱਚ ਆ ਗਿਆ ਹੈ।

ਅਮਰੀਕਾ ਵਿੱਚ ਫੈਲੇ ਬਰਡ ਫਲੂ, ਜਿਸ ਨੂੰ ਵਿਗਿਆਨਕ ਰੂਪ ਵਿੱਚ ਹਾਈਲੀ ਪੈਥੋਜੈਨਿਕ ਏਵਿਅਨ ਇਨਫਲੂਐਂਜ਼ਾ ਕਿਹਾ ਜਾਂਦਾ ਹੈ, ਦੇ ਕਾਰਨ ਲੱਖਾਂ ਅੰਡੇ ਦੇਣ ਵਾਲੀਆਂ ਮੁਰਗੀਆਂ ਨੂੰ ਮਾਰਨਾ ਪਿਆ।

ਇਸ ਵਾਇਰਸ ਨੂੰ ਰੋਕਣ ਲਈ ਉਠਾਏ ਗਏ ਕਦਮ ਅੰਡਿਆਂ ਦੀ ਸਪਲਾਈ 'ਤੇ ਭਾਰੀ ਅਸਰ ਪਾ ਗਏ, ਜਿਸ ਕਾਰਨ ਕੀਮਤਾਂ ਵਿੱਚ ਵੱਡੇ ਪੱਧਰ ਦੇ ਵਿੱਚ ਵਾਧਾ ਹੋਇਆ ਹੈ।

ਪਿਛਲੇ ਤਿੰਨ ਮਹੀਨਿਆਂ ਵਿੱਚ 2 ਕਰੋੜ ਤੋਂ ਵੱਧ ਮੁਰਗੀਆਂ ਮਾਰੀ ਗਈਆਂ, ਜਿਸ ਨਾਲ ਅੰਡਿਆਂ ਦੇ ਉਤਪਾਦਨ 'ਤੇ ਗੰਭੀਰ ਪ੍ਰਭਾਵ ਪਿਆ ਅਤੇ ਕੀਮਤਾਂ ਆਸਮਾਨ ਨੂੰ ਛੂਹਣ ਲੱਗੀਆਂ।

ਅਮਰੀਕਾ ਵਿੱਚ ਅੰਡਿਆਂ ਦੀ ਘੱਟ ਸਪਲਾਈ ਕਰਕੇ ਕੁਝ ਸਥਾਨਾਂ 'ਤੇ ਇੱਕ ਦਰਜਨ ਅੰਡਿਆਂ ਦੀ ਕੀਮਤ ₹860 (ਲਗਭਗ $10) ਤਕ ਪਹੁੰਚ ਗਈ ਹੈ।

ਅਮਰੀਕੀ ਲੇਬਰ ਅੰਕੜੇ (BLS) ਅਨੁਸਾਰ, ਜਨਵਰੀ 2025 ਵਿੱਚ ਗ੍ਰੇਡ-A ਦਰਜੇ ਦੇ ਇੱਕ ਦਰਜਨ ਅੰਡਿਆਂ ਦੀ ਔਸਤ ਕੀਮਤ $4.95 (₹429.91) ਰਹੀ, ਜੋ ਕਿ ਅਗਸਤ 2023 ਵਿੱਚ ਦਰਜ ਘੱਟੋ-ਘੱਟ $2.04 (₹176.47) ਨਾਲੋਂ ਦੋ ਗੁਣਾ ਤੋਂ ਵੀ ਵੱਧ ਹੈ।

ਅੰਡਿਆਂ ਦੀ ਵਧਦੀ ਕੀਮਤ ਨੇ ਨਾ ਸਿਰਫ ਘਰੇਲੂ ਜੀਵਨ, ਸਗੋਂ ਵਪਾਰਾਂ 'ਤੇ ਵੀ ਸੰਕਟ ਪੈਦਾ ਕਰ ਦਿੱਤਾ ਹੈ।

ਕਈ ਉਪਭੋਗਤਾ ਅੰਡਿਆਂ ਦੀ ਖਪਤ ਘਟਾ ਰਹੇ ਹਨ, ਜਦਕਿ ਕੁਝ ਦੁਕਾਨਾਂ 'ਤੇ ਅੰਡਿਆਂ ਦੀ ਘਾਟ ਕਾਰਨ ਗਾਹਕਾਂ ਨੂੰ ਸੀਮਿਤ ਮਾਤਰਾ ਵਿੱਚ ਹੀ ਅੰਡੇ ਖਰੀਦਣ ਦੀ ਇਜਾਜ਼ਤ ਦਿੱਤੀ ਜਾ ਰਹੀ ਹੈ।

ਹੋਟਲ ਅਤੇ ਰੈਸਟੋਰੈਂਟ ਉਦਯੋਗ ਵੀ ਅੰਡਿਆਂ ਦੀ ਕੀਮਤ 'ਚ ਹੋਈ ਵਾਧੂ ਤੋਂ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਰਹੇ ਹਨ।

ਅੰਡਿਆਂ 'ਤੇ ਆਧਾਰਿਤ ਭੋਜਨ (ਜਿਵੇਂ ਕਿ ਬੇਕਰੀ ਆਈਟਮਾਂ, ਆਮਲੇਟ, ਪੇਸਟਰੀ ਆਦਿ) ਦੀ ਵਧ ਰਹੀ ਕੀਮਤ ਦੇ ਕਾਰਨ, ਕਈ ਰੈਸਟੋਰੈਂਟ ਅਤੇ ਬੇਕਰੀਆਂ ਆਪਣੇ ਮੇਨੂ ਵਿੱਚ ਤਬਦੀਲੀਆਂ ਕਰ ਰਹੀਆਂ ਹਨ, ਤਾਂ ਜੋ ਅੰਡਿਆਂ ਦੀ ਵਰਤੋਂ ਘਟਾਈ ਜਾ ਸਕੇ।