Punjab police: ਖੰਨਾ 'ਚ ਚੋਰ ਇੱਕ ਤਰ੍ਹਾਂ ਨਾਲ ਪੁਲਿਸ ਨੂੰ ਲਲਕਾਰ ਰਹੇ ਹਨ। ਸ਼ਹਿਰ ਵਿੱਚ ਰੱਬ ਦੇ ਘਰ ਵੀ ਸੁਰੱਖਿਅਤ ਨਹੀਂ ਹਨ। ਕੁਝ ਦਿਨਾਂ ਵਿੱਚ ਮੰਦਰਾਂ ਵਿੱਚ ਚੋਰੀ ਦੀ ਇਹ ਛੇਵੀਂ ਘਟਨਾ ਹੈ। ਪ੍ਰਬੰਧਕ ਕਮੇਟੀਆਂ ਹੋਰ ਛੋਟੀਆਂ-ਮੋਟੀਆਂ ਘਟਨਾਵਾਂ ਦੀ ਸ਼ਿਕਾਇਤ ਨਹੀਂ ਕਰਦੀਆਂ। ਕੁੱਲ ਮਿਲਾ ਕੇ ਚੋਰ ਬਿਨਾਂ ਕਿਸੇ ਡਰ ਦੇ ਅਪਰਾਧ ਕਰ ਰਹੇ ਹਨ। ਇਸ ਵਾਰ ਚੋਰਾਂ ਨੇ ਵੱਡਾ ਚੈਲੰਜ ਕੀਤਾ। ਇੱਕ ਹਫ਼ਤੇ ਵਿੱਚ ਦੂਜੀ ਘਟਨਾ ਹੋਈ ਹੈ। ਚੋਰੀ ਦੀ ਘਟਨਾ ਉਸੇ ਮੰਦਰ ਵਿੱਚ ਵਾਪਰੀ ਜਿੱਥੇ ਬੀਤੀ ਦੇਰ ਰਾਤ ਇਹ ਚੋਰੀ ਹੋਈ ਸੀ। ਸਮਾਂ ਵੀ ਉਹੀ ਸੀ ਤੇ ਚੋਰ ਵੀ ਉਹੀ ਸੀ।
ਪੰਡਿਤ ਦੇਸਰਾਜ ਸ਼ਾਸਤਰੀ ਨੇ ਦੱਸਿਆ ਕਿ ਸਵੇਰੇ ਉਨ੍ਹਾਂ ਦੇਖਿਆ ਕਿ ਗੁੱਗਾ ਮਾੜੀ ਸ਼ਿਵ ਮੰਦਰ 'ਚ ਫਿਰ ਤੋਂ ਚੋਰੀ ਹੋਈ ਹੈ। ਇਹ ਮੰਦਰ ਸਮਰਾਲਾ ਰੋਡ 'ਤੇ ਹੈ। ਸਾਰੀ ਰਾਤ ਸੜਕ ਖੁੱਲ੍ਹੀ ਰਹਿੰਦੀ ਹੈ। ਇੱਥੋਂ ਥੋੜ੍ਹੀ ਦੂਰੀ ’ਤੇ ਪੁਲਿਸ ਲਾਈਨ ਅਤੇ ਸੀਆਈਏ ਸਟਾਫ਼ ਵੀ ਹੈ ਪਰ ਚੋਰਾਂ ਨੂੰ ਕੋਈ ਡਰ ਨਹੀਂ। ਇਸ ਵਾਰ ਫਿਰ ਚੋਰਾਂ ਨੇ ਗੱਲਾ ਤੋੜ ਕੇ ਨਕਦੀ ਚੋਰੀ ਕਰ ਲਈ।
ਸਾਡੀ ਕੋਈ ਜ਼ਿੰਮੇਵਾਰੀ ਨਹੀਂ, ਆਪਣੀ ਰਾਖੀ ਆਪ ਕਰੋ
ਪੰਡਿਤ ਦੇਸਰਾਜ ਸ਼ਾਸਤਰੀ ਨੇ ਦੱਸਿਆ ਕਿ ਜਦੋਂ ਪੁਲਸ ਨੂੰ ਸੂਚਨਾ ਦਿੱਤੀ ਗਈ ਤਾਂ ਥਾਣਾ ਸਿਟੀ ਦੇ ਇੱਕ ਏ.ਐੱਸ.ਆਈ. ਮੌਕੇ ਉੱਤੇ ਆਏ ਤੇ ਆਉਂਦਿਆਂ ਹੀ ਕਿਹਾ ਕਿ ਪੁਲਿਸ ਦੀ ਕੋਈ ਜ਼ਿੰਮੇਵਾਰੀ ਨਹੀਂ ਹੈ। ਥਾਣੇ ਵਿੱਚ ਕੋਈ ਫੋਰਸ ਨਹੀਂ ਹੈ। ਆਪਣੀ ਰਾਖੀ ਆਪ ਕਰੋ। ਇਹ ਕਹਿ ਕੇ ਏਐਸਆਈ ਉੱਥੋਂ ਚਲਾ ਗਿਆ। ਇਸ ਤੋਂ ਬਾਅਦ ਮੰਦਰ ਪ੍ਰਬੰਧਕ ਕਮੇਟੀ ਵਿੱਚ ਗੁੱਸਾ ਪਾਇਆ ਜਾ ਰਿਹਾ ਹੈ। ਇਸ ਸਬੰਧੀ ਉਹ ਐਸਐਸਪੀ ਨੂੰ ਮਿਲਣਗੇ।
ਇਸ ਤੋਂ ਪਹਿਲਾਂ ਵੀ ਹੋ ਚੁੱਕੀਆਂ ਨੇ ਕਈ ਚੋਰੀਆਂ
ਸ਼ਹਿਰ ਦੇ ਦੇਵੀ ਦੀਵਾਲਾ ਮੰਦਿਰ, ਸ਼੍ਰੀ ਰਾਧਾ ਕ੍ਰਿਸ਼ਨ ਮੰਦਿਰ, ਸ਼ਿਵ ਮੰਦਰ ਮਲੇਰਕੋਟਲਾ ਰੋਡ ਖੰਨਾ, ਗੁੱਗਾ ਮਾੜੀ ਸ਼ਿਵ ਮੰਦਰ ਵਿੱਚ ਪਹਿਲਾਂ ਵੀ ਚੋਰੀਆਂ ਹੋ ਚੁੱਕੀਆਂ ਹਨ। ਕੁਝ ਸਮਾਂ ਪਹਿਲਾਂ ਬੱਸ ਸਟੈਂਡ ’ਤੇ ਬਣੇ ਮੰਦਰ ਵਿੱਚ ਵੀ ਚੋਰੀ ਹੋਈ ਸੀ। ਅਜਿਹੇ ਵਿੱਚ ਰੱਬ ਦਾ ਘਰ ਵੀ ਸੁਰੱਖਿਅਤ ਨਹੀਂ ਹੈ। ਐਸਐਚਓ ਹੇਮੰਤ ਮਲਹੋਤਰਾ ਨੇ ਕਿਹਾ ਕਿ ਚੋਰਾਂ ਨੂੰ ਜਲਦੀ ਕਾਬੂ ਕਰ ਲਿਆ ਜਾਵੇਗਾ। ਰਾਤ ਸਮੇਂ ਗਸ਼ਤ ਤੇਜ਼ ਕੀਤੀ ਜਾਵੇਗੀ।