ਮੁੰਬਈ: ਟੈਲੀਵਿਜ਼ਨ ਰਿਐਲਿਟੀ ਸ਼ੋਅ 'ਬਿੱਗ ਬੌਸ' ਦੀ ਸਾਬਕਾ ਕੰਟੇਸਟੈਂਟ ਅਮ੍ਰਿਤਾ ਧਨੋਆ ਨੂੰ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਅਸਲ 'ਚ ਅਮ੍ਰਿਤਾ ਧਨੋਆ ਬਿੱਗ ਬੌਸ 13 ਦੇ ਕੰਟੇਸਟੈਂਟ ਅਰਹਾਨ ਖ਼ਾਨ ਦੀ ਸਾਬਕਾ ਪ੍ਰੇਮਿਕਾ ਹੈ। ਸੈਕਸ ਰੈਕੇਟ 'ਚ ਸ਼ਾਮਲ ਹੋਣ ਕਾਰਨ ਪੁਲਿਸ ਨੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਵੀਰਵਾਰ ਦੀ ਰਾਤ ਨੂੰ ਪੁਲਿਸ ਨੇ ਉਸ ਨੂੰ 5 ਸਿਤਾਰਾ ਹੋਟਲ ਤੋਂ ਗ੍ਰਿਫ਼ਤਾਰ ਕੀਤਾ।

ਅਮ੍ਰਿਤਾ ਦੇ ਨਾਲ ਰਿਚਾ ਸਿੰਘ ਨਾਂ ਦੀ ਲੜਕੀ ਵੀ ਫੜੀ ਗਈ ਹੈ। ਰਿਚਾ ਇੱਕ ਸਟ੍ਰਗਲਿੰਗ ਅਦਾਕਾਰਾ ਹੈ। ਸੈਕਸ ਰੈਕੇਟ ਬਾਰੇ ਪਤਾ ਲੱਗਦਿਆਂ ਅੱਧੀ ਰਾਤ ਨੂੰ ਪੁਲਿਸ ਨੇ ਗੋਰੇਗਾਓਂ ਦੇ ਵੈਸਟਿਨ ਹੋਟਲ 'ਚ ਛਾਪਾ ਮਾਰਿਆ। ਡਿੰਡੋਸ਼ੀ ਥਾਣੇ ਦੇ ਸੀਨੀਅਰ ਇੰਸਪੈਕਟਰ ਧਰਮਿੰਦਰ ਕੰਬਲੇ ਨੇ ਇਸ ਬਾਰੇ ਜਾਣਕਾਰੀ ਦਿੱਤੀ ਹੈ।

ਮੀਡੀਆ ਨਾਲ ਗੱਲਬਾਤ ਦੌਰਾਨ ਧਰਮਿੰਦਰ ਕੰਬਲੇ ਨੇ ਕਿਹਾ, “ਜਾਣਕਾਰੀ ਮਿਲਣ ਤੋਂ ਬਾਅਦ ਅਸੀਂ ਹੋਟਲ ‘ਤੇ ਛਾਪਾ ਮਾਰਿਆ। ਇੱਥੋਂ 32 ਸਾਲਾ ਅਮ੍ਰਿਤਾ ਧਨੋਆ ਅਤੇ 26 ਸਾਲਾ ਰਿਚਾ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਇਨ੍ਹਾਂ ਦੋਵਾਂ ‘ਤੇ ਧਾਰਾ 370 ( 3), 34 ਅਤੇ ਅਨੈਤਿਕ ਵਪਾਰ ਰੋਕਥਾਮ ਐਕਟ ਦੀ ਧਾਰਾ 4,5 ਅਧੀਨ ਕੇਸ ਦਰਜ ਕੀਤਾ ਗਿਆ ਹੈ।”

ਇਸ ਦੇ ਨਾਲ ਦੱਸ ਦੇਈਏ ਕਿ ਅਮ੍ਰਿਤਾ, ਅਰਹਾਨ ਖ਼ਾਨ 'ਤੇ ਵੀ ਕਈ ਇਲਜ਼ਾਮ ਲਗਾ ਚੁੱਕੀ ਹੈ।