ਮੁੰਬਈ: ਐਤਵਾਰ ਦੇਰ ਰਾਤੀਂ ਤੇ ਅੱਜ ਸੋਮਵਾਰ ਦੀ ਸਵੇਰ ਨੂੰ 3:00 ਕੁ ਵਜੇ ਬਾਲੀਵੁੱਡ ਦੇ ਬਹੁਚਰਚਿਤ ਗਾਇਕ ਮੀਕਾ ਸਿੰਘ ਦੀ ਕਾਰ ਮੁੰਬਈ ਦੇ ਮੌਨਸੂਨੀ ਹੜ੍ਹ ’ਚ ਬੁਰੀ ਤਰ੍ਹਾਂ ਫਸ ਗਈ ਪਰ ਉੱਥੇ ਸੈਂਕੜੇ ਲੋਕ, ਜਿਨ੍ਹਾਂ ’ਚੋਂ ਜ਼ਿਆਦਾਤਰ ਪ੍ਰਸ਼ੰਸਕ ਹੀ ਸਨ, ਮੀਕਾ ਸਿੰਘ ਦੀ ਮਦਦ ਲਈ ਨਿੱਤਰ ਆਏ। ਉਸ ਵੇਲੇ ਮੁੰਬਈ ’ਚ ਭਾਰੀ ਵਰਖਾ ਹੋ ਰਹੀ ਸੀ। ਮੀਕਾ ਸਿੰਘ ਦੀ ‘ਹੰਮਰ’ ਕਾਰ ਜਿਵੇਂ ਹੀ ਮੀਂਹ ’ਚ ਫਸੀ, ਤਿਵੇਂ ਹੀ ਉੱਥੇ ਲੋਕਾਂ ਦੀ ਵੱਡੀ ਭੀੜ ਇਕੱਠੀ ਹੋ ਗਈ।
ਇੰਸਟਾਗ੍ਰਾਮ ਉੱਤੇ ਇਸ ਘਟਨਾ ਨਾਲ ਸਬੰਧਤ ਕੁਝ ਵੀਡੀਓਜ਼ ਵੀ ਸ਼ੇਅਰ ਕੀਤੀਆਂ ਗਈਆਂ ਹਨ। ਪਤਾ ਲੱਗਾ ਹੈ ਕਿ ਮੀਕਾ ਸਿੰਘ ਇੱਕ ਵਿਆਹ ਸਮਾਰੋਹ ’ਚ ਸ਼ਾਮਲ ਹੋਣ ਤੋਂ ਬਾਅਦ ਘਰ ਪਰਤ ਰਹੇ ਸਨ। ਕਿਸੇ ਆਮ ਵਿਅਕਤੀ/ਪ੍ਰਸ਼ੰਸਕ ਵੱਲੋਂ ਵਿਡੀਓ ਸ਼ੇਅਰ ਕੀਤੀ ਗਈ ਹੈ; ਜੋ ਬੋਲਦਾ ਸੁਣਦਾ ਹੈ- ਜਬ ਮੀਕਾ ਭਾਅ ਜੀ ਕੀ ਕਾਰ ਬੰਦ ਹੋਤੀ ਹੈ, ਤੋ ਇਤਨੇ ਲੋਕ ਹੈਲਪ ਕਰਨੇ ਆ ਜਾਤੇ ਹੈਂ, ਮੁੰਬਈ ਸਿਟੀ।
ਫਿਰ ਇਹ ਵਿਅਕਤੀ ਮੀਕਾ ਸਿੰਘ ਤੇ ਉਨ੍ਹਾਂ ਨਾਲ ਕਾਰ ’ਚ ਬੈਠੀ ਆਕਾਂਕਸ਼ਾ ਸਿੰਘ ਨਾਲ ਗੱਲ ਵੀ ਕਰਦਾ ਹੈ। ਉਹ ਵਿਅਕਤੀ ਦੱਸਦਾ ਹੈ ਕਿ ਘੱਟੋ-ਘੱਟ 200 ਵਿਅਕਤੀ ਮੀਕਾ ਸਿੰਘ ਦੀ ਕਾਰ ਕੋਲ ਜਮ੍ਹਾ ਹੋ ਚੁੱਕੇ ਹਨ। ਭੀੜ ਵੀ ਮੀਕਾ ਸਿੰਘ ਨੂੰ ਵੇਖ ਕੇ ਉੱਚੀ-ਉੱਚੀ ‘ਚੀਅਰਜ਼’ ਕਰਦੀ ਹੈ।
ਇੱਥੇ ਇਹ ਵੀ ਦੱਸ ਦੇਈਏ ਕਿ ਮੀਕਾ ਸਿੰਘ ਤੇ ਆਕਾਂਕਸ਼ਾ ਸਿੰਘ ਬਾਰੇ ਇਹ ਵੀ ਆਖਿਆ ਜਾ ਰਿਹਾ ਹੈ ਕਿ ਉਹ ਅੱਜ-ਕੱਲ੍ਹ ਇਸ਼ਕ-ਪੇਚੇ ਦੀ ਵੇਲ ਨੂੰ ਪ੍ਰਫ਼ੁੱਲਤ ਕਰ ਰਹੇ ਹਨ ਤੇ ਇੱਥੋਂ ਤੱਕ ਵੀ ਖ਼ਬਰਾਂ ਆ ਰਹੀਆਂ ਹਨ ਕਿ ਉਨ੍ਹਾਂ ਨੇ ਇੱਕ-ਦੂਜੇ ਨਾਲ ਅੰਗੂਠੀਆਂ ਦਾ ਆਦਾਨ-ਪ੍ਰਦਾਨ ਵੀ ਕਰ ਲਿਆ ਹੈ। ‘ਹਿੰਦੁਸਤਾਨ ਟਾਈਮਜ਼’ ਨੇ ਇਸ ਬਾਰੇ ਰਿਪੋਰਟ ਪ੍ਰਕਾਸ਼ਿਤ ਕੀਤੀ ਹੈ।
ਆਕਾਂਕਸ਼ਾ ਦਾ ਕਹਿਣਾ ਹੈ ਕਿ ਉਹ ਮੀਕਾ ਸਿੰਘ ਨੂੰ 12 ਸਾਲਾਂ ਤੋਂ ਜਾਣਦਾ ਹੈ ਤੇ ਉਹ ਪਰਿਵਾਰਕ ਮੈਂਬਰ ਵਾਂਗ ਹੀ ਹਨ ਪਰ ਆਕਾਂਕਸ਼ਾ ਅਨੁਸਾਰ ਉਨ੍ਹਾਂ ਦੋਵਾਂ ਵਿਚਾਲੇ ਮੰਗਣੀ ਜਾਂ ਵਿਆਹ ਜਿਹਾ ਕੁਝ ਨਹੀਂ। ਇਹ ਗੱਲ ਉਨ੍ਹਾਂ ਬੀਤੇ ਅਪ੍ਰੈਲ ਮਹੀਨੇ ਇੱਕ ਮੈਗਜ਼ੀਨ ਨਾਲ ਗੱਲਬਾਤ ਕਰਦਿਆਂ ਆਖੀ ਸੀ।
ਮੀਕਾ ਸਿੰਘ ਵੀ ਪਿਛਲੇ ਕੁਝ ਦਿਨਾਂ ਤੋਂ ਲਗਾਤਾਰ ਖ਼ਬਰਾਂ ’ਚ ਬਣੇ ਹੋਏ ਹਨ। ਉਨ੍ਹਾਂ ਦਾ ਕਮਾਲ ਆਰ. ਖ਼ਾਨ ਨਾਲ ਝਗੜਾ ਹੋ ਗਿਆ ਸੀ ਤੇ ਉਨ੍ਹਾਂ ਨੇ ਖ਼ਾਨ ਉੱਤੇ ‘ਕੁੱਤਾ’ ਗੀਤ ਬਣਾਇਆ ਸੀ; ਜਿਸ ਨੂੰ ਅੱਧੀ ਕਰੋੜ ਤੋਂ ਵੀ ਵੀ ਵੱਧ ਲੋਕ ਵੇਖ ਚੁੱਕੇ ਹਨ ਤੇ ਇੰਝ ਉਹ ਗੀਤ ਹਿੱਟ ਹੋ ਚੁੱਕਾ ਹੈ। ਉੱਧਰ ਕਮਾਲ ਰਾਸ਼ਿਦ ਖ਼ਾਨ ਨੇ ਵੀ ਮੀਕਾ ਲਈ ‘ਸੂਰ’ ਗੀਤ ਬਣਾਇਆ ਸੀ।