Shakira tax Fraud Case: ਕੋਲੰਬੀਆ ਦੀ ਪੌਪ ਗਾਇਕਾ ਸ਼ਕੀਰਾ ਇੱਕ ਗਲੋਬਲ ਸਟਾਰ ਹੈ ਜੋ ਆਪਣੇ ਟੈਕਸ ਧੋਖਾਧੜੀ ਦੇ ਮਾਮਲੇ ਨੂੰ ਲੈ ਕੇ ਲੰਬੇ ਸਮੇਂ ਤੋਂ ਸੁਰਖੀਆਂ ਵਿੱਚ ਹੈ। ਸ਼ਕੀਰਾ ਹੁਣ ਤੱਕ ਇਸ ਮਾਮਲੇ 'ਚ ਆਪਣੀ ਬੇਗੁਨਾਹੀ ਨੂੰ ਬਰਕਰਾਰ ਰੱਖ ਰਹੀ ਸੀ, ਪਰ ਸੋਮਵਾਰ ਨੂੰ ਉਹ ਸਪੇਨ ਦੀ ਸਰਕਾਰ ਨਾਲ ਸੈਟਲਮੈਂਟ ਕਰਨ ਲਈ ਰਾਜ਼ੀ ਹੋ ਗਈ। ਇਸ ਦੇ ਨਾਲ ਹੀ ਹੁਣ ਸ਼ਕੀਰਾ ਨੂੰ ਸਪੇਨ ਦੀ ਸਰਕਾਰ ਨੂੰ ਕਰੋੜਾਂ ਰੁਪਏ ਦੀ ਵੱਡੀ ਰਕਮ ਅਦਾ ਕਰਨੀ ਪਵੇਗੀ, ਜਿਸ ਨੂੰ ਉਹ ਹੁਣ ਤੱਕ ਟਾਲ ਰਹੀ ਸੀ।
ਸੋਮਵਾਰ ਨੂੰ ਸ਼ਕੀਰਾ ਨੂੰ ਟੈਕਸ ਧੋਖਾਧੜੀ ਦੇ ਮਾਮਲੇ 'ਚ ਬਾਰਸੀਲੋਨਾ ਦੀ ਅਦਾਲਤ 'ਚ ਪੇਸ਼ ਹੋਣ ਲਈ ਸੰਮਨ ਜਾਰੀ ਕੀਤਾ ਗਿਆ ਸੀ। ਇਸ ਸਮੇਂ ਦੌਰਾਨ ਸ਼ਕੀਰਾ ਸਪੇਨੀ ਅਧਿਕਾਰੀਆਂ ਨਾਲ ਸਮਝੌਤਾ ਕਰਨ ਲਈ ਸਹਿਮਤ ਹੋ ਗਈ।
ਸ਼ਕੀਰਾ ਅਤੇ ਉਸ ਦੀ ਕਾਨੂੰਨੀ ਟੀਮ ਹੁਣ ਤੱਕ ਇਨ੍ਹਾਂ ਦੋਸ਼ਾਂ ਨੂੰ ਝੂਠਾ ਦੱਸ ਰਹੀ ਸੀ, ਪਰ ਸੋਮਵਾਰ ਨੂੰ ਗਾਇਕਾ ਜੁਰਮਾਨਾ ਭਰਨ ਲਈ ਤਿਆਰ ਹੋ ਗਈ। ਸ਼ਕੀਰਾ ਦੇ ਏਜੰਟ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਉਸ ਨੇ 3 ਸਾਲ ਦੀ ਜੇਲ੍ਹ ਦੀ ਸਜ਼ਾ ਨੂੰ ਟਾਲਣ ਲਈ 6.6 ਮਿਲੀਅਨ ਯੂਰੋ (60 ਕਰੋੜ ਰੁਪਏ) ਦੀ ਸੈਟਲਮੈਂਟ ਰਾਸ਼ੀ ਭਰਨ ਲਈ ਹਾਮੀ ਭਰ ਦਿੱਤੀ ਹੈ।
ਸ਼ਕੀਰਾ 'ਤੇ ਟੈਕਸ ਚੋਰੀ ਦੇ ਇਹ ਦੋਸ਼ 2012 ਤੋਂ 2014 ਤੱਕ ਦੇ ਹਨ। ਕੁਇੰਟ ਦੀ ਰਿਪੋਰਟ ਮੁਤਾਬਕ ਸਪੇਨ ਦੇ ਅਧਿਕਾਰੀਆਂ ਨੇ ਦਾਅਵਾ ਕੀਤਾ ਹੈ ਕਿ ਸ਼ਕੀਰਾ ਨੇ 2012 ਤੋਂ 2014 ਦਰਮਿਆਨ ਆਪਣਾ ਅੱਧੇ ਤੋਂ ਜ਼ਿਆਦਾ ਸਮਾਂ ਸਪੇਨ 'ਚ ਬਿਤਾਇਆ ਹੈ। ਇਸ ਲਈ ਉਸ ਨੂੰ ਦੇਸ਼ 'ਚ ਹੀ ਟੈਕਸ ਦੇਣਾ ਚਾਹੀਦਾ ਸੀ। ਹਾਲਾਂਕਿ ਉਸਦਾ ਅਧਿਕਾਰਤ ਘਰ ਬਹਾਮਾਸ ਵਿੱਚ ਹੈ। ਅਪ੍ਰੈਲ ਵਿੱਚ, ਸ਼ਕੀਰਾ ਬਾਰਸੀਲੋਨਾ ਦੇ ਸਾਬਕਾ ਡਿਫੈਂਡਰ ਜੇਰਾਰਡ ਪਿਕ ਨਾਲ ਵੱਖ ਹੋਣ ਤੋਂ ਬਾਅਦ ਆਪਣੇ ਦੋ ਪੁੱਤਰਾਂ ਨਾਲ ਮਿਆਮੀ, ਫਲੋਰੀਡਾ ਚਲੀ ਗਈ।