ਪੈਰਾਂ ਦੀ ਮੁਸ਼ਕ ਦੂਰ ਕਰਨ ਲਈ ਅਪਣਾਓ ਇਹ ਤਰੀਕਾ
ਨਵੀਂ ਦਿੱਲੀ: ਗਰਮੀ ਦੇ ਮੌਸਮ 'ਚ ਸਾਰਾ ਦਿਨ ਜੁੱਤੀ ਪਹਿਨਣ ਤੋਂ ਬਾਅਦ ਪੈਰਾਂ 'ਚ ਪਸੀਨੇ ਦੀ ਮੁਸ਼ਕ ਆਉਣ ਲੱਗ ਜਾਂਦੀ ਹੈ। ਪੈਰਾਂ ਦੇ ਇਸ ਮੁਸ਼ਕ ਨੂੰ ਬ੍ਰੋਮਿਹਾਇਡ੍ਰੋਸਿਸ ਕਹਿੰਦੇ ਹਨ ਜੋ ਲੰਮੇ ਸਮੇਂ ਤੱਕ ਜੁੱਤੇ ਪਹਿਨਣ ਨਾਲ ਹੋ ਜਾਂਦੀ ਹੈ। ਸਰੀਰ 'ਚੋਂ ਆਉਣ ਵਾਲੀ ਪਸੀਨੇ ਦੀ ਦੁਰਗੰਧ ਨੂੰ ਤਾਂ ਪਰਫਿਊਮ ਤੇ ਡੀਓ ਲਾ ਕੇ ਦੂਰ ਕੀਤਾ ਜਾ ਸਕਦਾ ਹੈ ਪਰ ਪੈਰਾਂ ਦੀ ਮੁਸ਼ਕ ਨੂੰ ਦੂਰ ਕਰਨਾ ਔਖਾ ਹੁੰਦਾ ਹੈ। ਕੁਝ ਘਰੇਲੂ ਤਰੀਕੇ ਅਪਣਾ ਕੇ ਇਸ ਸਮੱਸਿਆ ਤੋਂ ਛੁਟਕਾਰਾ ਪਾਇਆ ਜਾ ਸਕਦਾ ਹੈ।
ਪੈਰਾਂ 'ਚੋਂ ਮੁਸ਼ਕ ਹਟਾਉਣ ਲਈ ਚਾਵਲਾਂ ਦੇ ਪਾਣੀ ਦੀ ਵਰਤੋਂ ਵੀ ਕੀਤੀ ਜਾ ਸਕਦੀ ਹੈ। ਚਾਵਲ ਪਾਣੀ 'ਚ ਭਿਉਂ ਕੇ ਰੱਖਣ ਤੋਂ ਬਾਅਦ ਪਾਣੀ ਛਾਣ ਕੇ ਇਸ ਨਾਲ ਪੈਰ ਧੋਵੋ।
ਫਟਕੜੀ 'ਚ ਐਂਟੀਸੈਪਟਿਕ ਗੁਣ ਹੁੰਦੇ ਹਨ ਜੋ ਬੈਕਟੀਰੀਆ ਨੂੰ ਆਸਾਨੀ ਨਾਲ ਖਤਮ ਕਰ ਦਿੰਦੇ ਹਨ। ਇਸ ਲਈ ਇੱਕ ਕੱਪ ਪਾਣੀ 'ਚ ਇੱਕ ਚਮਚ ਫਟਕੜੀ ਪਾਓ ਤੇ ਇਸ ਪਾਣੀ ਨਾਲ ਪੈਰ ਧੋਵੋ।
ਜੇਕਰ ਪੈਰਾਂ 'ਚੋਂ ਜ਼ਿਆਦਾ ਮੁਸ਼ਕ ਆਵੇ ਤਾਂ ਦਿਨ 'ਚ 2-3 ਵਾਰ ਸਾਬਣ ਨਾਲ ਪੈਰ ਧੋਵੋ 'ਤੇ ਗਰਮ ਪਾਣੀ ਦੀ ਵਰਤੋਂ ਕਰੋ।
ਗਰਮ ਪਾਣੀ 'ਚ ਸੇਬ ਦਾ ਸਿਰਕਾ ਪਾ ਕੇ ਉਸ 'ਚ ਥੋੜ੍ਹੀ ਦੇਰ ਪੈਰ ਰੱਖਣ ਨਾਲ ਪੈਰਾਂ 'ਚ ਆਉਣ ਵਾਲੀ ਮੁਸ਼ਕ ਦੂਰ ਹੁੰਦੀ ਹੈ।
ਇਸ ਤੋਂ ਇਲਾਵਾ ਪੈਰਾਂ ਦੀ ਦੁਰਗੰਧ ਹਟਾਉਣ ਲਈ ਚਾਹ ਪੱਤੀ ਦੀ ਵਰਤੋਂ ਵੀ ਕੀਤੀ ਜਾ ਸਕਦੀ ਹੈ। ਇੱਕ ਟੱਬ 'ਚ ਗਰਮ ਪਾਣੀ ਲੈ ਕੇ ਉਸ 'ਚ ਚਾਹ ਪੱਤੀ ਜਾਂ ਟੀ-ਬੈਗ ਪਾ ਕੇ ਅੱਧੇ ਘੰਟੇ ਲਈ ਪੈਰ ਉਸ 'ਚ ਡੁਬੋ ਕੇ ਰੱਖਣ ਨਾਲ ਵੀ ਮਦਦ ਮਿਲਦੀ ਹੈ।
ਜੁੱਤੇ ਪਾਉਣ ਤੋਂ ਪਹਿਲਾਂ ਜੇਕਰ ਥੋੜ੍ਹਾ ਜਿਹਾ ਬੇਕਿੰਗ ਪਾਊਡਰ ਪਾ ਲਓ ਤਾਂ ਇਸ ਸਮੱਸਿਆ ਤੋਂ ਛੁਟਕਾਰਾ ਪਾਇਆ ਜਾ ਸਕਦਾ ਹੈ।