ਚੰਡੀਗੜ੍ਹ: ਕੋਰੋਨਾ ਵੈਕਸਿਨ (ਕੋਵੈਕਸਿਨ) ਦਾ ਟ੍ਰਾਇਲ ਰੋਹਤਕ ਪੀਜੀਆਈ ਵਿੱਚ ਸ਼ੁਰੂ ਹੋਇਆ ਹੈ। ਪੋਸਟ ਗ੍ਰੈਜੂਏਟ ਇੰਸਟੀਚਿਊਟ ਆਫ ਮੈਡੀਕਲ ਸਾਇੰਸ (ਪੀਜੀਆਈਐਮਐਸ) ਵਿੱਚ ਤਿੰਨ ਸਿਹਤਮੰਦ ਵਾਲੰਟੀਅਰਾਂ ਨੂੰ ਪਹਿਲੀ ਖੁਰਾਕ ਦਿੱਤੀ ਗਈ ਹੈ। ਇਸ ਦਵਾਈ ਦਾ ਤਿੰਨਾਂ ਦੀ ਸਿਹਤ 'ਤੇ ਕੋਈ ਮਾੜਾ ਪ੍ਰਭਾਵ ਨਹੀਂ ਪਿਆ। ਦੱਸ ਦਈਏ ਕਿ ਡਰੱਗ ਰੈਗੂਲੇਟਰ ਨੇ ਡੀਜੀਸੀਆਈ ਦੇ ਪਹਿਲੇ ਤੇ ਦੂਜੇ ਪੜਾਅ ਲਈ ਮਨੁੱਖੀ ਅਜ਼ਮਾਇਸ਼ਾਂ ਦੀ ਆਗਿਆ ਦੇ ਦਿੱਤੀ ਹੈ। ਟ੍ਰਾਇਲ ਦੀ ਆਗਿਆ ਹਰਿਆਣਾ ਦੇ ਰੋਹਤਕ ਪੀਜੀਆਈ ਸਣੇ ਦੇਸ਼ ਭਰ ਦੇ 13 ਕੇਂਦਰਾਂ ਨੂੰ ਦਿੱਤੀ ਗਈ ਹੈ। ਇਹ ਟੀਕਾ ਹੈਦਰਾਬਾਦ ਦੀ ਫਾਰਮਾ ਕੰਪਨੀ ਭਾਰਤ ਬਾਇਓਟੈਕ ਵੱਲੋਂ ਤਿਆਰ ਕੀਤਾ ਗਿਆ ਹੈ। ਕੋਰੋਨਾ ਵੈਕਸੀਨ ਦੇ ਟ੍ਰਾਈਲ ਬਾਰੇ ਜਾਣਕਾਰੀ ਖੁਦ ਹਰਿਆਣਾ ਦੇ ਸਿਹਤ ਮੰਤਰੀ ਅਨਿਲ ਵਿੱਜ ਨੇ ਟਵੀਟ ਕਰਕੇ ਦਿੱਤੀ ਹੈ। ਉਨ੍ਹਾਂ ਲਿਖਿਆ ਕਿ ਭਾਰਤ ਬਾਇਓਟੈਕ ਦੀ ਕੋਰੋਨਾ ਵੈਕਸਿਨ (ਕੋਵੈਕਸਿਨ) ਦੀ ਮਨੁੱਖੀ ਅਜ਼ਮਾਇਸ਼ ਅੱਜ ਪੀਜੀਆਈ ਰੋਹਤਕ ਵਿਖੇ ਸ਼ੁਰੂ ਹੋਈ ਹੈ। ਅੱਜ ਇਸ ਦਾ ਟੈਸਟ ਤਿੰਨ ਲੋਕਾਂ 'ਤੇ ਕੀਤਾ ਗਿਆ। ਸਾਰਿਆਂ ਨੇ ਟੀਕੇ ਨੂੰ ਬਹੁਤ ਚੰਗੀ ਤਰ੍ਹਾਂ ਬਰਦਾਸ਼ਤ ਕੀਤਾ। ਇਸ ਦੇ ਕੋਈ ਮਾੜੇ ਪ੍ਰਭਾਵ ਨਹੀਂ ਹੋਏ।