ਅਲੀਗੜ੍ਹ (ਉੱਤਰ ਪ੍ਰਦੇਸ਼): ਉੱਤਰ ਪ੍ਰਦੇਸ਼ ਦੀ ਅਲੀਗੜ੍ਹ ਮੁਸਲਿਮ ਯੂਨੀਵਰਸਿਟੀ (AMU) ’ਚ ਇਨ੍ਹੀਂ ਦਿਨੀਂ ਕੋਰੋਨਾ ਵਾਇਰਸ ਨਾਲ ਹੋ ਰਹੀਆਂ ਮੌਤਾਂ ਨੇ ਹਰੇਕ ਨੂੰ ਸਦਮਾ ਦਿੱਤਾ ਹੈ। ਸ਼ੁੱਕਰਵਾਰ ਨੂੰ ਦੋ ਫ਼ੈਕਲਟੀ ਮੈਂਬਰਾਂ ਦੀ ਮੌਤ ਹੋ ਗਈ। 20 ਦਿਨਾਂ ਅੰਦਰ ਇਸ ਯੂਨੀਵਰਸਿਟੀ ’ਚ 16 ਵਰਕਿੰਗ ਤੇ 10 ਰਿਟਾਇਰਡ ਫ਼ੈਕਲਟੀ ਮੈਂਬਰਾਂ ਨੂੰ ਕੋਰੋਨਾ ਨੇ ਨਿਗਲ ਲਿਆ। ਚਾਂਸਲਰ ਤਾਰਿਕ ਮਨਸੂਰ ਦੇ ਵੱਡੇ ਭਰਾ ਦੀ ਵੀ ਕੋਰੋਨਾ ਵਾਇਰਸ ਦੀ ਲਪੇਟ ’ਚ ਆਉਣ ਕਾਰਨ ਮੌਤ ਹੋ ਗਈ ਹੈ।
ਯੂਨੀਵਰਸਿਟੀ ਦੇ ਜਵਾਹਰਲਾਲ ਨਹਿਰੂ ਮੈਡੀਕਲ ਕਾਲਜ (JNMC) ਦੇ ਕੋਵਿਡ ਵਾਰਡ ’ਚ ਫ਼ੈਕਲਟੀ ਮੈਂਬਰਾਂ ਸਮੇਤ 16 ਵਿਅਕਤੀਆਂ ਦਾ ਇਲਾਜ ਚੱਲ ਰਿਹਾ ਹੈ। ਉਨ੍ਹਾਂ ਵਿੱਚੋਂ ਕੁਝ ਦੀ ਹਾਲਤ ਗੰਭੀਰ ਹੈ। AMU ਦੇ ਬੁਲਾਰੇ ਸ਼ੈਫ਼ਈ ਕਿਦਵਾਈ ਨੇ ਦੱਸਿਆ ਕਿ ਮੈਡੀਕਲ ਵਿਭਾਗ ਦੇ ਮੁਖੀ ਪ੍ਰੋਫ਼ੈਸਰ ਸ਼ਾਦਾਬ ਖ਼ਾਨ (58) ਤੇ ਕੰਪਿਊਟਰ ਵਿਗਿਆਨ ਵਿਭਾਗ ਦੇ ਪ੍ਰੋਫ਼ੈਸਰ ਰਫ਼ੀਕੁਲ ਜਮਾਲ ਖ਼ਾਨ (55) ਨੇ ਸ਼ੁੱਕਰਵਾਰ ਨੂੰ ਵਾਇਰਸ ਕਾਰਨ ਦਮ ਤੋੜ ਦਿੱਤਾ।
ਬੁਲਾਰੇ ਅਨੁਸਾਰ ਵਾਈਸ ਚਾਂਸਲਰ ਮਨਸੂਰ ਦੇ ਭਰਾ ਉਮਰ ਫ਼ਾਰੂਕ (75) ਦੀ ਵੀ ਕੋਰੋਨਾ ਕਾਰਣ ਮੌਤ ਹੋ ਗਈ। ਉਹ ਯੂਨੀਵਰਸਿਟੀ ਕੋਰਟ ਦੇ ਸਾਬਕਾ ਮੈਂਬਰ ਤੇ ਮੁਹੰਮਡਨ ਐਜੂਕੇਸ਼ਨਲ ਕਾਨਫ਼ਰੰਸ ਦੇ ਮੈਂਬਰ ਸਨ। ਮਨਸੂਰ ਨੇ ਕਿਹਾ ਕਿ ਉਹ ਸਭ ਨੂੰ ਟੀਕਾਕਰਣ ਤੇ ਸਭ ਨੂੰ ਕੋਵਿਡ 19 ਪ੍ਰੋਟੋਕੋਲ ਦੀ ਪਾਲਣਾ ਕਰਨ ਦੀ ਅਪੀਲ ਕਰਦੇ ਹਨ। ਬੁੱਧਵਾਰ ਨੂੰ ਸੰਸਕ੍ਰਿਤ ਦੇ ਪ੍ਰਸਿੱਧ ਵਿਦਵਾਨ ਤੇ ਸੰਸਕ੍ਰਿਤ ਵਿਭਾਗ ਦੇ ਸਾਬਕਾ ਮੁਖੀ ਪ੍ਰੋ. ਖ਼ਾਲਿਦ ਬਿਨ ਯੂਸਫ਼ (56) ਦਾ ਦੇਹਾਂਤ ਹੋ ਗਿਆ ਸੀ। ਉਹ ਰਿੱਗਵੇਦ ’ਚ ਡਾਕਟਰੇਟ ਕਰਨ ਵਾਲੇ ਪਹਿਲੇ ਮੁਸਲਿਮ ਵਿਦਵਾਨ ਸਨ।
ਇਸ ਮਹੀਨੇ ਦੇ ਸ਼ੁਰੂ ’ਚ ਪੋਸਟ ਹਾਰਵੈਸਟ ਇੰਜਨੀਅਰਿੰਗ ਵਿਭਾਗ ਦੇ ਪ੍ਰੋ. ਅਲੀ ਖ਼ਾਨ (60) ਦੀ ਜਾਨ ਵੀ ਕੋਰੋਨਾ ਨੇ ਲੈ ਲਈ ਸੀ। ਉਨ੍ਹਾਂ ਤੋਂ ਇਲਾਵਾ ਪੋਲਿਟੀਕਲ ਸਾਇੰਸ ਦੇ ਪ੍ਰੋ. ਕਾਜ਼ੀ ਮੁਹੰਮਦ ਜਮਸ਼ੇਦ (55), ਮਨੋਵਿਗਿਆਨ ਵਿਭਾਗ ਦੇ ਮੁਖੀ ਪ੍ਰੋ. ਸਾਜਿਦ ਅਲੀ ਖ਼ਾਨ (63), ਅਜਾਇਬਘਰ ਵਿਭਾਗ ਦੇ ਮੁਖੀ ਮੁਹੰਮਦ ਇਰਫ਼ਾਨ (62), ਮਹਿਲਾ ਅਧਿਐਨ ਕੇਂਦਰ ਦੇ ਡਾ. ਅਜ਼ੀਜ਼ ਫ਼ੈਸਲ (40), ਇਤਿਹਾਸ ਵਿਭਾਗ ਦੇ ਡਾ. ਜ਼ਿਬਰਾਇਲ (51), ਅੰਗ੍ਰੇਜ਼ੀ ਵਿਭਾਗ ਦੇ ਡਾ. ਮੁਹੰਮਦ ਯੂਸਫ਼ ਅਨਸਾਰੀ (46), ਉਰਦੂ ਵਿਭਾਗ ਦੇ ਡਾ. ਮੁਹੰਮਦ ਫ਼ੁਰਕਾਨ ਸੰਭਲੀ (43) ਅਤੇ ਜ਼ੂਆਲੋਜੀ ਵਿਭਾਗ ਦੇ ਪ੍ਰੋਫ਼ੈਸਰ ਸਈਅਦ ਇਰਫ਼ਾਨ ਅਹਿਮਦ (62) ਸ਼ਾਮਲ ਹਨ।
ਪਿਛਲੇ ਮਹੀਨੇ ਉਰਦੂ ਵਿਭਾਗ ਦੇ ਪ੍ਰਸਿੱਧ ਆਲੋਚਕ ਤੇ ਸੀਨੀਅਰ ਫ਼ੈਕਲਟੀ ਮੈਂਬਰ ਪ੍ਰੋ. ਮੌਲਾ ਬਖ਼ਸ਼ ਅਨਸਾਰੀ (58) ਤੇ ਯੂਨੀਵਰਸਿਟੀ ਪੌਲੀਟੈਕਨੀਕ AMU ਸਈਦ ’ਚ ਚਮੜੇ ਤੇ ਜੁੱਤਿਆਂ ਦੇ ਸੈਕਸ਼ਨ ਦੇ ਇੰਚਾਰਜ ਉਜਮਨ (51) ਦੀ ਵੀ ਕੋਰੋਨਾ ਕਾਰਣ ਮੌਤ ਹੋ ਗਈ ਸੀ।