ਅਜੀਤ ਡੋਵਾਲ ਪਹਿਲਾਂ ਉੱਤਰ-ਪੂਰਬੀ ਜ਼ਿਲ੍ਹਾ ਡੀਸੀਪੀ ਦਫਤਰ ਪਹੁੰਚੇ ਤੇ ਤਕਰੀਬਨ ਇੱਕ ਘੰਟਾ ਦਿੱਲੀ ਪੁਲਿਸ ਦੇ ਉੱਚ ਅਧਿਕਾਰੀਆਂ ਨਾਲ ਮੀਟਿੰਗ ਕੀਤੀ। ਇਸ ਤੋਂ ਬਾਅਦ ਡੋਵਾਲ ਪੁਲਿਸ ਕਮਿਸ਼ਨਰ ਅਮੂਲਿਆ ਪਟਨਾਇਕ ਦੀ ਗੱਡੀ 'ਤੇ ਸਵਾਰ ਹੋਏ ਤੇ ਪੂਰੇ ਕਾਫਲੇ ਨਾਲ ਉੱਤਰ ਪੂਰਬੀ ਜ਼ਿਲ੍ਹੇ ਦੇ ਉਨ੍ਹਾਂ ਖੇਤਰਾਂ 'ਚ ਗਏ ਜਿੱਥੇ ਦੰਗੇ ਹੋਏ ਸੀ।
ਪਹਿਲਾਂ ਉਹ ਜ਼ਫ਼ਰਾਬਾਦ ਗਏ। ਉੱਥੋਂ ਉਹ ਮੌਜਪੁਰ ਪਹੁੰਚੇ ਤੇ ਫੇਰ ਮੌਜਪੁਰ ਤੋਂ ਕਬੀਰ ਨਗਰ ਤੇ ਕਾਰਦਮਪੁਰੀ ਗਏ। ਇਸ ਤੋਂ ਬਾਅਦ, ਉਹ ਗੋਕੁਲਪੁਰੀ ਹੁੰਦੇ ਹੋਏ ਭਜਨਪੁਰਾ ਤੇ ਉੱਥੋਂ ਕਰਾਵਲ ਨਗਰ, ਚਾਂਦਬਾਗ ਦਾ ਦੌਰਾ ਕੀਤਾ ਤੇ ਵਾਪਸ ਸੀਲਮਪੁਰ ਵਿਖੇ ਡੀਸੀਪੀ ਦਫ਼ਤਰ ਚਲੇ ਗਏ।
ਮੰਗਲਵਾਰ ਰਾਤ ਨੂੰ ਦਿੱਲੀ ਫਾਇਰ ਸਰਵਿਸ ਨੂੰ ਉੱਤਰ ਪੂਰਬੀ ਜ਼ਿਲ੍ਹੇ ਦੇ ਵੱਖ-ਵੱਖ ਇਲਾਕਿਆਂ ਤੋਂ ਫਾਇਰ ਕਾਲ ਵੀ ਆਈਆਂ। ਫਾਇਰ ਸਰਵਿਸ ਦੇ ਸੂਤਰ ਦੱਸਦੇ ਹਨ ਕਿ ਜ਼ਿਆਦਾਤਰ ਕਾਲ ਬ੍ਰਹਮਾਪੁਰੀ, ਮੁਸਤਫਾਬਾਦ, ਸ਼ਿਵ ਵਿਹਾਰ ਆਦਿ ਇਲਾਕਿਆਂ ਤੋਂ ਆਈਆਂ ਜਿੱਥੇ ਫਾਇਰ ਸਰਵਿਸ ਦੇ ਵਾਹਨ ਵੀ ਭੇਜੇ ਗਏ।