ਸੋਮਵਾਰ ਨੂੰ ਇਨ੍ਹਾਂ ਸਾਰਿਆਂ ਨੇ ਮੌਨੀ ਮੱਸਿਆ ਦੇ ਮੌਕੇ ’ਤੇ ਸ਼ਾਹੀ ਡੁਬਕੀ ਲਾਈ। ਸੰਤਾਂ ਤੇ ਮਹਾਂਮੰਡਲੇਸ਼ਵਰਾਂ ਦੀ ਮਦਦ ਨਾਲ ਨਵੇਂ ਬਣੇ ਨਾਗਾ ਸੰਨਿਆਸੀਆਂ ਵਿੱਚ ਡੁਬਕੀ ਲਾਉਣ ਲਈ ਜ਼ਿਆਦਾ ਉਤਸੁਕਤਾ ਸੀ। ਨਾਗਾ ਸੰਨਿਆਸੀਆਂ ਨੇ ਧੂਣੇ ਦੇ ਸਾਹਮਣੇ ਬੈਠ ਕੇ ਓਮ ਮਨੋ ਸ਼ਿਵਾਏ ਦਾ ਜਾਪ ਕਰਦਿਆਂ ਪਵਿੱਤਰ ਭਭੂਤੀ ਤਿਆਰ ਕੀਤੀ। ਇਸ ਦੇ ਨਾਲ ਹੀ ਉਨ੍ਹਾਂ ਗੁਰੂ ਮੰਤਰ ਦਾ ਵੀ ਜਾਪ ਕੀਤਾ।
ਇਸ ਸਖ਼ਤ ਜੀਵਨ ਲਈ ਕਰੀਬ 10 ਹਜ਼ਾਰ ਮਹਿਲਾਵਾਂ ਤੇ ਪੁਰਸ਼ਾਂ ਨੇ ਦੀਕਸ਼ਾ ਲਈ ਹੈ। ਇਹ ਸਾਰੇ ਅਖਿਲ ਭਾਰਤੀ ਅਖਾੜਾ ਪਰਿਸ਼ਦ (ਏਬੀਏਪੀ) ਨੇ ਅਧੀਨ ਨਾਗਾ ਸਾਧੂ ਬਣੇ। ਇਹ ਪਰਿਸ਼ਦ ਭਾਰਤ ਵਿੱਚ ਹਿੰਦੂ ਸੰਤਾਂ ਤੇ ਸਾਧੂਆਂ ਦਾ ਸਭ ਤੋਂ ਉੱਚਾ ਸੰਗਠਨ ਹੈ। ਦੱਸਿਆ ਜਾਂਦਾ ਹੈ ਕਿ ਕਈ ਮੁਸਲਿਮ, ਈਸਾਈ ਤੇ ਹੋਰ ਧਰਮਾਂ ਦੇ ਲੋਕ ਵੀ ਨਾਗਾ ਸਾਧੂ ਬਣਨ ਲਈ ਸਵੀਕਾਰੇ ਗਏ ਹਨ। ਇਨ੍ਹਾਂ ਵਿੱਚੋਂ ਕੁਝ ਲੋਕ ਪਹਿਲਾਂ ਡਾਕਟਰ ਤੇ ਇੰਜਨੀਅਰ ਰਹਿ ਚੁੱਕੇ ਹਨ।