ਮੁੰਬਈ: ਫੋਰਬਸ ਇੰਡੀਆ ਨੇ 2019 ਦੀ 100 ਨਾਮੀ ਹਸਤੀਆਂ ਦੀ ਸੂਚੀ ਜਾਰੀ ਕੀਤੀ ਹੈ ਜਿਸ ’ਚ ਕ੍ਰਿਕਟ ਖਿਡਾਰੀ ਵਿਰਾਟ ਕੋਹਲੀ ਪਹਿਲੇ ਸਥਾਨ ’ਤੇ ਰਹੇ ਹਨ। ਸੂਚੀ ’ਚ ਬਾਲੀਵੁੱਡ ਅਦਾਕਾਰ ਅਕਸ਼ੈ ਕੁਮਾਰ ਨੂੰ ਦੂਜਾ ਅਤੇ ਸਲਮਾਨ ਖ਼ਾਨ ਨੂੰ ਤੀਜਾ ਸਥਾਨ ਮਿਲਿਆ ਹੈ। ਪਹਿਲੇ 10 ਸਥਾਨਾਂ ’ਚ ਸਿਰਫ਼ ਦੋ ਔਰਤਾਂ ਆਲੀਆ ਭੱਟ ਅਤੇ ਦੀਪਿਕਾ ਪਾਦੂਕੋਣ ਸ਼ਾਮਲ ਹਨ।

ਇਹ ਲਿਸਟ ਪਹਿਲੀ ਅਕਤੂਬਰ 2018 ਤੋਂ 30 ਸਤੰਬਰ 2019 'ਚ ਮਸ਼ਹੂਰ ਹਸਤੀਆਂ ਦੀ ਅੰਦਾਜਨ ਕਮਾਈ ਅਤੇ ਉਨ੍ਹਾਂ ਦੀ ਮਸ਼ਹੂਰੀ ’ਤੇ ਆਧਾਰਤ ਹੈ। ਇਪ ‘ਚ ਭਾਰਤੀ ਕ੍ਰਿਕਟ ਟੀਮ ਦੇ ਕਪਤਾਨ ਵਿਰਾਟ ਕੋਹਲੀ ਨੇ 252.72 ਕਰੋੜ ਰੁਪਏ ਦੀ ਕਮਾਈ ਕੀਤੀ ਹੈ। ਉਂਝ ਅਕਸ਼ੈ ਕੁਮਾਰ 293.25 ਕਰੋੜ ਰੁਪਏ ਦੀ ਕਮਾਈ ਨਾਲ ਅੱਵਲ ਰਹੇ ਪਰ ਫੋਰਬਸ ਦੀ ਸੂਚੀ ’ਚ ਉਨ੍ਹਾਂ ਨੂੰ ਦੂਜਾ ਸਥਾਨ ਮਿਲਿਆ ਹੈ।

ਪਿਛਲੇ ਸਾਲ ਦੇ ਮੁਕਾਬਲੇ ਉਨ੍ਹਾਂ ਦੀ ਆਮਦਨ ’ਚ 58.51 ਫ਼ੀਸਦੀ ਦਾ ਵਾਧਾ ਦਰਜ ਹੋਇਆ ਹੈ। ਸਲਮਾਨ ਖ਼ਾਨ 229.25 ਕਰੋੜ ਰੁਪਏ ਦੀ ਕਮਾਈ ਨਾਲ ਤੀਜੇ ਸਥਾਨ ’ਤੇ ਰਹੇ। ਸੁਪਰਸਟਾਰ ਅਮਿਤਾਭ ਬੱਚਨ (239.25 ਕਰੋੜ) ਚੌਥੇ, ਕ੍ਰਿਕਟਰ ਐੱਮ ਐੱਸ ਧੋਨੀ (135.93 ਕਰੋੜ) ਪੰਜਵੇਂ, ਸ਼ਾਹਰੁਖ ਖ਼ਾਨ (124.38 ਕਰੋੜ) ਛੇਵੇਂ, ਰਣਵੀਰ ਸਿੰਘ (118.2 ਕਰੋੜ) ਸੱਤਵੇਂ, ਆਲੀਆ ਭੱਟ (59.21 ਕਰੋੜ) ਅੱਠਵੇਂ, ਸਚਿਨ ਤੇਂਦੁਲਕਰ (76.96 ਕਰੋੜ) ਨੌਵੇਂ ਅਤੇ ਦੀਪਿਕਾ ਪਾਦੂਕੋਣ (48 ਕਰੋੜ) 10ਵੇਂ ਸਥਾਨ ’ਤੇ ਰਹੇ।