ਨੈਨੀਤਾਲ: ਉੱਤਰਾਖੰਡ ਸੂਬੇ ਦੇ ਜ਼ਿਲ੍ਹੇ ਨੈਨੀਤਾਲ ’ਚ ਪੈਂਦੇ ਰਾਮਨਗਰ ’ਚ ਭਰਾ ਤੋਂ ਬਦਲਾ ਲੈਣ ਲਈ ਸਕੇ ਭਰਾ ਨੇ ਅਜਿਹੀ ਸਾਜ਼ਿਸ਼ ਰਚੀ ਕਿ ਸਾਰੇ ਹੈਰਾਨ ਹੋ ਗਏ। ਦੋ ਭਰਾਵਾਂ ਸੁਰਜੀਤ ਤੇ ਕੁਲਦੀਪ ਵਿਚਾਲੇ ਕਾਫ਼ੀ ਸਮੇਂ ਤੋਂ ਵਿਵਾਦ ਚੱਲ ਰਿਹਾ ਹੈ। ਇਸੇ ਮਹੀਨੇ ਸੁਰਜੀਤ ਦੇ ਪੁੱਤਰ ਦਾ ਵਿਆਹ ਹੋਇਆ; ਜਿਸ ਵਿੱਚ ਕੁਲਦੀਪ ਨੇ ਅਜਿਹੀ ਖੇਡ ਰਚੀ ਕਿ ਦੂਜਾ ਭਰਾ ਕਾਨੂੰਨੀ ਚੱਕਰ ’ਚ ਫਸ ਗਿਆ। ਸੁਰਜੀਤ ਨੇ ਆਪਣੇ ਪੁੱਤਰ ਦੇ ਵਿਆਹ ਲਈ ਸਿਰਫ਼ 80 ਕਾਰਡ ਹੀ ਛਪਵਾ ਕੇ ਵੰਡੇ ਸਨ ਪਰ ਉਸ ਦੇ ਭਰਾ ਨੇ ਚੋਰੀ-ਛਿਪੇ 100 ਕਾਰਡ ਹੋਰ ਛਪਵਾ ਕੇ ਮਜ਼ਦੂਰਾਂ ’ਚ ਵੰਡ ਦਿੱਤੇ।
ਨਾਥਪੁਰ ਛੋਈ ਨਿਵਾਸੀ ਸੁਰਜੀਤ ਦੇ ਪੁੱਤਰ ਪਰਵਿੰਦਰ ਸਿੰਘ ਦਾ ਵਿਆਹ ਕੈਨੇਡਾ ਦੀ ਕੁੜੀ ਕਿਰਨਦੀਪ ਨਾਲ ਤਿੰਨ ਦਸੰਬਰ ਨੂੰ ਹੋਇਆ। ਪੁਲਿਸ ਮੁਤਾਬਕ ਸੁਰਜੀਤ ਸਿੰਘ ਤੇ ਉਸ ਦੇ ਭਰਾ ਕੁਲਦੀਪ ਮਾਨ ਵਿਚਾਲੇ ਪੁਰਾਣਾ ਜ਼ਮੀਨੀ ਝਗੜਾ ਚੱਲਿਆ ਆ ਰਿਹਾ ਹੈ; ਜਿਸ ਕਾਰਨ ਕੁਲਦੀਪ ਰੰਜਿਸ਼ ਰੱਖਦਾ ਹੈ। ਸੁਰਜੀਤ ਨੇ ਤਾਂ ਕੋਵਿਡ ਦੇ ਨਿਯਮਾਂ ਦੀ ਪਾਲਣਾ ਕਰਦਿਆਂ 80 ਕਾਰਡ ਹੀ ਛਪਵਾ ਕੇ ਵੰਡੇ ਸਨ ਪਰ ਉਸ ਦੇ ਭਰਾ ਕੁਲਦੀਪ ਨੇ ਅੰਦਰਖਾਤੇ ਸਾਜ਼ਿਸ਼ ਰਚ ਦਿੱਤੀ।
ਖਾਣੇ ਵੇਲੇ ਅਣਜਾਣ ਲੋਕਾਂ ਤੇ ਮਜ਼ਦੂਰਾਂ ਨੂੰ ਵੇਖ ਕੇ ਸੁਰਜੀਤ ਸਿੰਘ ਕੁਝ ਹੈਰਾਨ ਹੋਏ। ਪੁੱਛਣ ’ਤੇ ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਉਹ ਕਾਰਡ ਘਰ ਆਉਣ ’ਤੇ ਹੀ ਵਿਆਹ ’ਚ ਆਏ ਹਨ। ਤਦ ਮਾਮਲਾ ਥਾਣੇ ਪੁੱਜ ਗਿਆ। ਪੁਲਿਸ ਮੁਤਾਬਕ ਸਾਜ਼ਿਸ਼ ਰਚਣ ਵਾਲੇ ਵਿਰੁੱਧ ਕਾਨੂੰਨੀ ਕਾਰਵਾਈ ਹੋਵੇਗੀ। ਇਸ ਬਹੁ-ਚਰਚਿਤ ਵਿਆਹ ’ਚ ਕਈ ਅਣਜਾਣ ਲੋਕ ਤੇ ਮਜ਼ਦੂਰ ਨਾ ਸਿਰਫ਼ ਉੱਥੇ ਪੁੱਜੇ, ਸਗੋਂ ਉਹ ਕਾਫ਼ੀ ਸਾਰਾ ਖਾਣਾ ਪੈਕ ਕਰਵਾ ਕੇ ਆਪਣੇ ਘਰਾਂ ਨੂੰ ਵੀ ਲੈ ਗਏ।