ਲੁਧਿਆਣਾ 'ਚ ਖੂਨੀ ਖੇਡ, ਧਨਾਢ ਕਿਸਾਨ ਪਰਿਵਾਰ ਦੇ 4 ਜੀਅ ਕਤਲ

ਲੁਧਿਆਣਾ: ਸ਼ਹਿਰ 'ਚ ਦਿਲ ਦਹਿਲਾਉਣ ਵਾਲੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਗਿਆ ਹੈ। ਸਥਾਨਕ ਬੀਆਰਐਸ ਪੌਸ਼ ਇਲਾਕੇ 'ਚ ਇੱਕੋ ਪਰਿਵਾਰ ਦੇ 4 ਮੈਂਬਰਾਂ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ ਹੈ। ਮਰਨ ਵਾਲਿਆਂ 'ਚ ਕਿਸਾਨ ਪਰਿਵਾਰ ਦਾ ਮੁਖੀ, ਉਸ ਦੀ ਮਾਂ, ਪਤਨੀ ਤੇ 15 ਸਾਲਾ ਮਾਸੂਮ ਧੀ ਸ਼ਾਮਲ ਹਨ। ਵਾਰਦਾਤ ਦਾ ਅੱਜ ਸਵੇਰੇ ਪਤਾ ਲੱਗਾ ਹੈ। ਪੁਲਿਸ ਮੌਕੇ 'ਤੇ ਪਹੁੰਚ ਕੇ ਜਾਂਚ ਕਰ ਰਹੀ ਹੈ।     ਜਾਣਕਾਰੀ ਮੁਤਾਬਕ ਕਿਸਾਨ ਸੰਦੀਪ ਸਿੰਘ ਮਾਂਗਟ ਆਪਣੀ ਮਾਂ ਬਚਨ ਕੌਰ, ਪਤਨੀ ਅਮਨ ਕੌਰ ਤੇ 15 ਸਾਲਾ ਮਾਸੂਮ ਬੇਟੀ ਧਨਾਜ ਸਮੇਤ ਸ਼ਹਿਰ ਦੇ ਬੀਆਰਐਸ ਨਗਰ 'ਚ ਰਹਿ ਰਿਹਾ ਸੀ। ਸਭ ਕੁੱਝ ਠੀਕ-ਠਾਕ ਚੱਲ ਰਿਹਾ ਸੀ। ਪਰ ਅੱਜ ਸਵੇਰੇ ਜਦ ਉਨ੍ਹਾਂ ਦੀ ਘਰੇਲੂ ਨੌਕਰਾਣੀ ਕੰਮ ਕਰਨ ਲਈ ਪਹੁੰਚੀ ਤਾਂ ਸਭ ਕੁੱਝ ਬਦਲ ਚੁੱਕਾ ਸੀ। ਘਰ ਅੰਦ ਪੂਰੇ ਪਰਿਵਾਰ ਦੀਆਂ ਲਾਸ਼ਾਂ ਮੌਜੂਦ ਸਨ। ਤੁਰੰਤ ਪੁਲਿਸ ਨੂੰ ਇਸ ਵਾਰਦਾਤ ਦੀ ਜਾਣਕਾਰੀ ਦਿੱਤੀ ਗਈ। ਪੁਲਿਸ ਤੁਰੰਤ ਮੌਕੇ 'ਤੇ ਪਹੁੰਚੀ ਤੇ ਮਾਂਮਲੇ ਦੀ ਜਾਂਚ 'ਚ ਲੱਗ ਗਈ ਹੈ।     ਸ਼ੁਰੂਆਤੀ ਜਾਂਚ ਤੋਂ ਬਾਅਦ ਪੁਲਿਸ ਨੇ ਜਾਣਕਾਰੀ ਦਿੱਤੀ ਹੈ ਕਿ ਹਮਲਾਵਰਾਂ ਨੇ ਇਹਨਾਂ 'ਤੇ ਤੇਜ਼ਧਾਰ ਹਥਿਆਰਾਂ ਤੇ 315 ਬੋਰ ਰਾਈਫਲ ਨਾਲ ਹਮਲਾ ਕੀਤਾ। ਘਰ ਅੰਦਰੋਂ ਲਹੂ ਲੁਹਾਣ ਲਾਸ਼ਾਂ ਕੋਲੋਂ 315 ਬੋਰ ਦੇ 4 ਖੋਲ੍ਹ ਵੀ ਮਿਲੇ ਹਨ। ਫਿਲਹਾਲ ਪੁਲਿਸ ਹਰ ਪਹਿਲੂ ਤੋਂ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਹਨਾਂ ਦਾ ਕਿਸੇ ਨਾਲ ਜਮੀਨੀ ਵਿਵਾਦ ਵੀ ਚੱਲ ਰਿਹਾ ਸੀ। ਪੁਲਿਸ ਮਾਮਲੇ ਦੀ ਜਾਣਕਾਰੀ ਦੇਣ ਵਾਲੀ ਨੌਕਰਾਣੀ ਤੋਂ ਵੀ ਪੁੱਛਗਿੱਛ ਕਰ ਰਹੀ ਹੈ।