ਬਰਨਾਲਾ: ਇੱਥੋਂ ਦੇ ਰਹਿਣ ਵਾਲੇ ਭਾਰਤੀ ਫ਼ੌਜ ਦੇ ਜਵਾਨ ਜਗਦੀਪ ਸਿੰਘ ਦੀ ਕੋਰੋਨਾ ਨਾਲ ਇਲਾਜ਼ ਦੌਰਾਨ ਹੋਈ ਮੌਤ ਹੋ ਗਈ। ਸਾਲ 2016 ਵਿੱਚ ਕਾਰਗਿਲ ਦੇ ਸਿਆਚਨ ਇਲਾਕੇ ਵਿੱਚ ਬਰਫ਼ 'ਚ ਜਗਦੀਪ ਗੰਭੀਰ ਜਖ਼ਮੀ ਹੋ ਗਿਆ ਸੀ।ਉਹ 4 ਸਾਲਾਂ ਤੋਂ ਸਰੀਰ 'ਚ ਖੂਨ ਜੰਮਣ ਦੀ ਬੀਮਾਰੀ ਨਾਲ ਜੂਝ ਰਿਹਾ ਸੀ। ਜਗਦੀਪ ਦੀ ਜਲੰਧਰ ਵਿਖੇ ਕੋਰੋਨਾ ਰਿਪੋਰਟ ਪੌਜੇਟਿਵ ਆਈ ਸੀ। ਅੰਤਿਮ ਸੰਸਕਾਰ ਮੌਕੇ ਨਾ ਤਾਂ ਜ਼ਿਲ੍ਹੇ ਦਾ ਕੋਈ ਅਧਿਕਾਰੀ ਪਹੁੰਚਿਆ ਅਤੇ ਨਾ ਹੀ ਸਲਾਮੀ ਦਿੱਤੀ ਗਈ।
ਸਿਰਫ਼ ਮ੍ਰਿਤਕ ਫ਼ੌਜੀ ਦੀ ਰੈਜੀਮੈਂਟ ਦੇ ਸਾਥੀਆਂ ਵੱਲੋਂ ਸਲਾਮੀਨਦਿੱਤੀ ਗਈ। ਪਰਿਵਾਰ ਅਤੇ ਰਿਸ਼ਤੇਦਾਰਾਂ ਨੇ ਸਲਾਮੀ ਨਾ ਦਿੱਤੇ ਜਾਣ 'ਤੇ ਸਰਕਾਰ ਅਤੇ ਜ਼ਿਲ੍ਹਾ ਪ੍ਰਸ਼ਾਸ਼ਨ ਖਿਲਾਫ ਰੋਸ ਜ਼ਾਹਰ ਕੀਤਾ। ਮ੍ਰਿਤਕ ਫੌਜੀ ਜਵਾਨ ਦੇ ਪਿਤਾ ਰਿਟਾ ਫ਼ੌਜੀ ਨਛੱਤਰ ਸਿੰਘ ਨੇ ਸਰਕਾਰ ਅਤੇ ਫ਼ੌਜ 'ਤੇ ਲਗਾਏ ਸਹੀ ਇਲਾਜ਼ ਨਾ ਦੇਣ ਦਾ ਇਲਜ਼ਾਮ ਲਾਇਆ।
ਪਰਿਵਾਰ ਆਪਣੇ ਪੱਧਰ 'ਤੇ ਇਲਾਜ਼ ਕਰਵਾ ਰਿਹਾ ਸੀ। ਮ੍ਰਿਤਕ ਫੌਜੀ ਜਵਾਨ ਦੋ ਛੋਟੀਆਂ ਧੀਆਂ ਦੀ ਪਿਤਾ ਸੀ। ਜਗਦੀਪ ਦੇ ਪਿਤਾ ਨਛੱਤਰ ਸਿੰਘ ਨੇ ਕਿਹਾ ਕਿ ਉਸਦਾ ਪੁੱਤਰ ਭਾਰਤੀ ਫੌਜ ਵਿੱਚ ਬਰਫੀਲੀਆਂ ਪਹਾੜੀਆਂ ਵਿੱਚ ਆਪਣੀ ਡਿਊਟੀ ਕਰ ਰਿਹਾ ਸੀ। ਜਿੱਥੇ ਉਸ ਦੀਆਂ ਲੱਤਾਂ ਬਰਫ ਵਿੱਚ ਫਸ ਗਈਆਂ ਸਨ। ਜਿਸਦੇ ਬਾਅਦ ਉਸਦੇ ਬੇਟੇ ਨੂੰ ਡੀਵੀਟੀ ਨਾਮ ਦੀ ਖ਼ੂਨ ਦੀ ਬੀਮਾਰੀ ਨੇ ਘੇਰ ਲਿਆ।
ਪਿਛਲੇ 4 ਸਾਲ ਤੋਂ ਉਹ ਆਪਣੇ ਬੇਟੇ ਦੇ ਇਲਾਜ ਲਈ ਦਰ-ਦਰ ਭਟਕ ਰਿਹਾ ਸੀ। ਉਨ੍ਹਾਂ ਨੇ ਕਿਹਾ ਕਿ ਉਹ ਆਪਣੇ ਫੌਜੀ ਜਵਾਨ ਬੇਟੇ ਜਗਦੀਪ ਦਾ ਇਲਾਜ ਆਪਣੇ ਪੱਧਰ ਉੱਤੇ ਕਰਵਾ ਰਿਹਾ ਸੀ। ਪ੍ਰਾਈਵੇਟ ਹਸਪਤਾਲ ਨੇ ਬੇਟੇ ਦੇ ਇਲਾਜ ਲਈ ਲੱਖਾਂ ਦਾ ਖਰਚ ਦੱਸਿਆ ਸੀ। ਇਹ ਇਲਾਜ ਆਰਮੀ ਹਸਪਤਾਲ ਵਿੱਚ ਵੀ ਹੋ ਸਕਦਾ ਸੀ, ਪਰ ਉੱਥੇ ਉਸਦੇ ਬੇਟੇ ਦਾ ਠੀਕ ਤਰ੍ਹਾਂ ਕੋਈ ਇਲਾਜ ਨਹੀਂ ਹੋਇਆ।
ਉਨ੍ਹਾਂ ਦੱਸਿਆ ਕਿ ਜਲੰਧਰ ਹਸਪਤਾਲ ਵਿੱਚ ਇਲਾਜ ਦੌਰਾਨ ਉਸਨੂੰ ਕੋਰੋਨਾ ਹੋ ਗਿਆ ਅਤੇ ਉਸਦੀ ਮੌਤ ਹੋ ਗਈ। ਉਨ੍ਹਾਂ ਨੇ ਕਿਹਾ ਕਿ ਸਰਕਾਰ ਅਤੇ ਭਾਰਤੀ ਫੌਜ ਨੂੰ ਆਪਣੇ ਜਵਾਨਾਂ ਦੀ ਸੁਰੱਖਿਆ ਲਈ ਚੰਗੇ ਕਦਮ ਚੁੱਕਣ ਦੀ ਜ਼ਰੂਰਤ ਹੈ ਅਤੇ ਜ਼ਰੂਰਤ ਅਨੁਸਾਰ ਸਾਮਾਨ ਉਨ੍ਹਾਂ ਨੂੰ ਪਹੁੰਚਾਇਆ ਜਾਣਾ ਚਾਹੀਦਾ ਹੈ। ਜਿਸ ਤਰ੍ਹਾਂ ਉਸਦੇ ਫੌਜੀ ਜਵਾਨ ਬੇਟੇ ਦੇ ਨਾਲ ਹੋਇਆ, ਅਜਿਹਾ ਹੋਰ ਕਿਸੇ ਦੇ ਨਾਲ ਨਹੀਂ ਹੋਣਾ ਚਾਹੀਦਾ। ਉਨ੍ਹਾਂ ਸਰਕਾਰ ਕੋਲੋਂ ਆਪਣੇ ਮ੍ਰਿਤਕ ਬੇਟੇ ਦੀ ਪਤਨੀ ਲਈ ਸਰਕਾਰੀ ਨੌਕਰੀ ਦੀ ਮੰਗ ਕੀਤੀ ਹੈ ਤਾਂਕਿ ਉਹ ਆਪਣੀਆਂ ਛੋਟੀ ਬੱਚੀਆਂ ਦੀ ਚੰਗੀ ਪਰਵਰਿਸ਼ ਕਰ ਸਕੇ।
ਇਸ ਮੌਕੇ ਜਗਦੀਪ ਸਿੰਘ ਦੀ ਡੇਡ ਬਾਡੀ ਲੈ ਕੇ ਪੁੱਜੇ ਉਸਦੀ ਰੇਜੀਮੇਂਟ ਦੇ ਸਾਥੀਆਂ ਨੇ ਕਿਹਾ ਕਿ ਜਗਦੀਪ ਸਿਆਚਿਨ ਵਿੱਚ ਬਰਫੀਲੇ ਪਹਾੜਾਂ ਵਿੱਚ ਧਸਣ ਕਾਰਨ ਜ਼ਖਮੀ ਹੋ ਗਿਆ ਸੀ। ਜਿਸਦੇ ਬਾਅਦ ਉਸਦਾ ਇਲਾਜ ਚੱਲ ਰਿਹਾ ਸੀ ਅਤੇ ਉਸਦੀ ਕੋਰੋਨਾ ਰਿਪੋਰਟ ਪਾਜਿਟਿਵ ਆ ਗਈ ਅਤੇ ਉਸਦੀ ਮੌਤ ਹੋ ਗਈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਰੇਜੀਮੇਂਟ ਵੱਲੋਂ ਜਗਦੀਪ ਨੂੰ ਸਲਾਮੀ ਦਿੱਤੀ ਗਈ ਹੈ, ਜਦੋਂ ਕਿ ਜ਼ਿਲ੍ਹਾ ਪੱਧਰ ਉੱਤੇ ਪ੍ਰਸ਼ਾਸਨ ਦੁਆਰਾ ਕੋਈ ਵੀ ਜਗਦੀਪ ਨੂੰ ਸਲਾਮੀ ਦੇਣ ਨਹੀਂ ਪਹੁੰਚਿਆ।