ਹਰਿਆਣਾ ਸਰਕਾਰ ਦੀ ਡੇਰਾ ਸਿਰਸਾ ਖਿਲਾਫ ਵੱਡੀ ਕਾਰਵਾਈ

ਚੰਡੀਗੜ੍ਹ: ਬਲਾਤਕਾਰੀ ਰਾਮ ਰਹੀਮ ਦੇ ਜੇਲ੍ਹ ਜਾਣ ਮਗਰੋਂ ਹਰਿਆਣਾ ਪੁਲਿਸ ਨੇ ਡੇਰਾ ਸਿਰਸਾ ਖਿਲਾਫ ਸਖਤੀ ਤੇਜ਼ ਕਰ ਦਿੱਤੀ ਹੈ। ਹਰਿਆਣਾ ਪੁਲਿਸ ਨੇ ਅੱਜ ਵੱਡੀ ਕਾਰਵਾਈ ਕਰਦਿਆਂ ਡੇਰੇ ਦੇ ਦੋ ਬੁਲਾਰਿਆਂ ਸਣੇ ਪੰਜ ਵਿਅਕਤੀਆਂ ਖਿਲਾਫ ਕੇਸ ਦਰਜ ਕਰ ਲਿਆ ਹੈ। ਇਨ੍ਹਾਂ ਮੁਲਜ਼ਮਾਂ ਵਿੱਚ ਰਾਮ ਰਹੀਮ ਦੇ ਖਾਮ-ਮ-ਖਾਸ ਅਦਿੱਤਿਆ ਇੰਸਾ ਤੇ ਧੀਮਾਨ ਇੰਸਾ ਸ਼ਾਮਲ ਹਨ। ਇਨ੍ਹਾਂ ਖਿਲਾਫ ਸ਼ਰਧਾਲੂਆਂ ਨੂੰ ਹਿੰਸਾ ਲਈ ਭੜਕਾਉਣ ਦੇ ਇਲਜ਼ਾਮ ਹਨ। ਅੱਜ ਹਰਿਆਣਾ ਦੇ ਡੀਜੀਪੀ ਬੀਐਸ ਸੰਧੂ ਨੇ ਅੱਜ ਪ੍ਰੈੱਸ ਕਾਨਫਰੰਸ ਕਰਕੇ ਦੱਸਿਆ ਕਿ ਅਦਿੱਤਿਆ ਇੰਸਾ ਤੇ ਧੀਮਾਨ ਇੰਸਾ ਸਣੇ ਡੇਰੇ ਦੇ ਪੰਜ ਪ੍ਰਬੰਧਕਾਂ ਖਿਲਾਫ ਕੇਸ ਦਰਜ ਕੀਤਾ ਹੈ। ਇਨ੍ਹਾਂ ਉਪਰ ਸ਼ਰਧਾਲੂਆਂ ਨੂੰ ਹਿੰਸਾ ਲਈ ਭੜਕਾਉਣ ਬਾਰੇ ਮੀਡੀਆ ਰਿਪੋਰਟਾਂ ਤੋਂ ਮਗਰੋਂ ਹਾਈਕੋਰਟ ਨੇ ਹੁਕਮ ਦਿੱਤਾ ਸੀ। ਰਾਮ ਰਹੀਮ ਤੋਂ ਬਾਅਦ ਇਹ ਪੰਜੇ ਡੇਰਾ ਸਿਰਸਾ ਦੇ ਕਰਤਾ-ਧਰਤਾ ਹਨ। ਸਰਕਾਰ ਦੀ ਇਸ ਕਾਰਵਾਈ ਤੋਂ ਸਪਸ਼ਟ ਹੈ ਕੇ ਹੁਣ ਡੇਰੇ ਦਾ ਕਾਰੋਬਾਰ ਠੱਪ ਹੋਣ ਜਾ ਰਿਹਾ ਹੈ। ਡੀਜੀਪੀ ਸੰਧੂ ਨੇ ਦੱਸਿਆ ਕਿ ਹਿੰਸਾ ਵਿੱਚ ਹੁਣ ਤੱਕ 38 ਮੌਤਾਂ ਹੋ ਗਈਆਂ ਹਨ। ਇਨ੍ਹਾਂ ਵਿੱਚ 32 ਪੰਚਕੂਲਾ ਤੇ ਛੇ ਸਿਰਸਾ ਵਿੱਚ ਹੋਈਆਂ ਹਨ। ਪੁਲਿਸ ਨੇ 52 ਕੇਸ ਦਰਜ ਕੀਤੇ ਹਨ ਤੇ 926 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਅਜੇ ਪੜਤਾਲ ਚੱਲ ਰਹੀ ਹੈ ਤੇ ਸ਼ਨਾਖਤ ਮਗਰੋਂ ਹੋਰ ਦੋਸ਼ੀਆਂ ਨੂੰ ਫੜਿਆ ਜਾਏਗਾ।