ਹੁਣ ਘਰ ਬੈਠੇ ਹੀ ਨਕਸ਼ੇ ਹੋਣਗੇ ਪਾਸ

ਜਲੰਧਰ : ਨਗਰ ਨਿਗਮ 'ਚ ਸਤੰਬਰ ਮਹੀਨੇ ਤੋਂ ਭਵਨ ਨਿਰਮਾਣ ਲਈ ਨਕਸ਼ਾ ਪਾਸ ਕਰਨ ਲਈ ਚੱਕਰ ਨਹੀਂ ਲਾਉਣੇ ਪੈਣਗੇ। ਘਰ ਬੈਠੇ ਹੀ ਆਨਲਾਈਨ ਨਕਸ਼ੇ ਪਾਸ ਕੀਤੇ ਜਾਣਗੇ। ਸਥਾਨਕ ਸਰਕਾਰਾਂ ਮੰਤਰਾਲਾ ਨੇ ਇਸ ਦੀ ਪੂਰੀ ਤਿਆਰੀ ਕਰ ਲਈ ਹੈ। ਨਵੇਂ ਸਿਸਟਮ ਨੂੰ ਲੈ ਕੇ ਸਰਕਾਰਾਂ ਬਾਰੇ ਮੰਤਰੀ ਨਵਜੋਤ ਸਿੰਘ ਸਿੱਧੂ ਵੱਲੋਂ 27 ਅਗਸਤ ਨੂੰ ਚੰਡੀਗੜ੍ਹ 'ਚ ਇਕ ਬੈਠਕ ਬੁਲਾਈ ਗਈ ਹੈ। ਇਸ ਬੈਠਕ 'ਚ ਸੂਬੇ ਦੀਆਂ ਸਾਰੀਆਂ ਨਗਰ ਨਿਗਮਾਂ 'ਚ ਤੈਨਾਤ ਅਸਿਸਟੈਂਟ ਟਾਊਨ ਪਲਾਨਰ ਤੇ ਉਨ੍ਹਾਂ ਤੋਂ ਉੱਪਰ ਬਿਲਡਿੰਗ ਬ੍ਰਾਂਚ ਦੇ ਅਧਿਕਾਰੀਆਂ ਤੇ ਨਿਗਮ ਕਮਿਸ਼ਨਰਾਂ ਨੂੰ ਸ਼ਾਮਿਲ ਹੋਣ ਲਈ ਕਿਹਾ ਗਿਆ ਹੈ। ਇਸ ਸਬੰਧਤ ਇਕ ਪੱਤਰ ਨਗਰ ਨਿਗਮ ਜਲੰਧਰ ਨੂੰ ਵੀ ਭੇਜਿਆ ਗਿਆ ਹੈ। ਬੈਠਕ 'ਚ ਆਨਲਾਈਨ ਬਿਲਡਿੰਗ ਪਲਾਨ ਮੈਨੇਜਮੈਂਟ ਸਿਸਟਮ ਦੇ ਅਲੱਗ ਅਲੱਗ ਪਹਿਲੁਆਂ 'ਤੇ ਇੰਡੀਅਨ ਇੰਸਟੀਚਿਊਟ ਆਫ ਆਰਕੀਟੈਕਟ ਇੰਜੀਨੀਅਰਿੰਗ ਦੇ ਨੁਮਾਇੰਦੇ ਬਿਲਡਿੰਗ ਪਲਾਨ ਦੀਆਂ ਬਰੀਕੀਆਂ ਬਾਰੇ ਸਮਝਾਉਣਗੇ। ਇਸ ਬੈਠਕ 'ਚ ਆਨਲਾਈਨ ਨਕਸ਼ੇ ਪਾਸ ਕਰਨ ਲਈ ਕੀ-ਕੀ ਪ੍ਰਬੰਧ ਕਿਸ ਤਰ੍ਹਾਂ ਆਨਲਾਈਨ ਕੀਤੇ ਜਾਣੇ ਹਨ, ਬਾਰੇ ਚਰਚਾ ਕੀਤੀ ਜਾਵੇਗੀ। ਪਹਿਲਾਂ ਇਹ ਮੀਟਿੰਗ 20 ਅਗਸਤ ਨੂੰ ਕੀਤੀ ਜਾਣੀ ਸੀ ਪਰ ਕੁਝ ਕਾਰਨਾਂ ਕਰਕੇ ਇਸ ਮੀਟਿੰਗ ਨੂੰ ਮੁਲਤਵੀ ਕਰ ਦਿੱਤਾ ਗਿਆ। ਜ਼ਿਕਰਯੋਗ ਹੈ ਕਿ ਸਤੰਬਰ ਮਹੀਨੇ 'ਚ ਨਗਰ ਨਿਗਮ 'ਚ ਆਨਲਾਈਨ ਬਿਲਡਿੰਗ ਪਲਾਨ ਮੈਨੇਜਮੈਂਟ ਸਿਸਟਮ ਲਾਗੂ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਇਸ ਦੀ ਜ਼ਿੰਮੇਵਾਰੀ ਜਲੰਧਰ ਤੇ ਫਗਵਾੜਾ ਲਈ ਸਾਫਟਵੇਅਰ ਕੰਪਨੀ ਟੈੱਕ ਮਹਿੰਦਰਾ ਨੂੰ ਦਿੱਤਾ ਗਿਆ ਹੈ।