Joe Root Century: ਇੰਗਲੈਂਡ ਦੇ ਬੱਲੇਬਾਜ਼ ਜੋ ਰੂਟ ਨੇ ਸ਼੍ਰੀਲੰਕਾ ਖ਼ਿਲਾਫ਼ ਟੈਸਟ ਸੀਰੀਜ਼ ਦੇ ਦੂਜੇ ਮੈਚ 'ਚ ਆਪਣੇ ਕਰੀਅਰ ਦਾ 33ਵਾਂ ਸੈਂਕੜਾ ਲਗਾਇਆ। ਉਸ ਨੇ 143 ਦੌੜਾਂ ਦੀ ਪਾਰੀ ਖੇਡੀ। ਪਹਿਲਾਂ ਹੀ ਚਰਚਾ ਹੈ ਕਿ ਜੋ ਰੂਟ ਟੈਸਟ ਕ੍ਰਿਕਟ ਵਿੱਚ ਸਚਿਨ ਤੇਂਦੁਲਕਰ ਦਾ ਸਭ ਤੋਂ ਵੱਧ ਦੌੜਾਂ ਬਣਾਉਣ ਦਾ ਰਿਕਾਰਡ ਤੋੜ ਦੇਵੇਗਾ।
144 ਟੈਸਟ ਮੈਚਾਂ 'ਚ 12,131 ਦੌੜਾਂ ਬਣਾਉਣ ਵਾਲੇ ਰੂਟ ਹੁਣ ਸਚਿਨ ਤੇਂਦੁਲਕਰ ਤੋਂ 3,790 ਦੌੜਾਂ ਪਿੱਛੇ ਹਨ। ਜਦੋਂ ਸਚਿਨ ਸੰਨਿਆਸ ਲੈ ਗਏ ਤਾਂ ਉਨ੍ਹਾਂ ਦੇ ਰਿਕਾਰਡ ਅਟੁੱਟ ਮੰਨੇ ਜਾਂਦੇ ਸਨ। ਹਾਲਾਂਕਿ, ਵਨਡੇ ਵਿਸ਼ਵ ਕੱਪ 'ਚ ਆਪਣਾ 50ਵਾਂ ਵਨਡੇ ਸੈਂਕੜਾ ਲਗਾ ਕੇ ਵਿਰਾਟ ਕੋਹਲੀ ਨੇ ਦਿਖਾਇਆ ਕਿ ਰਿਕਾਰਡ ਬਣਦੇ ਹੀ ਟੁੱਟਣ ਲਈ ਹਨ।
ਜੋ ਰੂਟ ਨੇ ਇਸ ਸਮੇਂ 144 ਟੈਸਟਾਂ (ਸ਼੍ਰੀਲੰਕਾ ਦੇ ਖਿਲਾਫ ਪਹਿਲੇ ਟੈਸਟ ਤੱਕ) 50.33 ਦੀ ਔਸਤ ਨਾਲ 12,131 ਦੌੜਾਂ ਬਣਾਈਆਂ ਹਨ ਤੇ ਆਪਣੇ ਕਰੀਅਰ ਦੇ ਇਸ ਪੜਾਅ 'ਤੇ ਸਚਿਨ ਤੋਂ ਅੱਗੇ ਹਨ। ਆਪਣੇ ਕਰੀਅਰ ਦੇ 144 ਟੈਸਟ ਮੈਚਾਂ ਤੋਂ ਬਾਅਦ, ਸਚਿਨ ਨੇ 11,532 ਦੌੜਾਂ ਬਣਾਈਆਂ ਸਨ।
ਸਚਿਨ ਨੇ 200 ਮੈਚਾਂ ਵਿੱਚ 15,921 ਦੌੜਾਂ ਬਣਾ ਕੇ ਆਪਣੇ ਕਰੀਅਰ ਦਾ ਅੰਤ ਕੀਤਾ। ਅਜਿਹੇ 'ਚ ਜੇ ਅਸੀਂ ਇਹ ਮੰਨ ਲਈਏ ਕਿ ਰੂਟ ਆਪਣੇ ਕਰੀਅਰ ਨੂੰ 200 ਟੈਸਟ ਮੈਚਾਂ ਤੱਕ ਵਧਾ ਸਕਦੇ ਹਨ ਅਤੇ ਮੌਜੂਦਾ ਔਸਤ 'ਤੇ ਉਹ ਹਰ ਪਾਰੀ 'ਚ ਲਗਭਗ 50 ਦੌੜਾਂ ਬਣਾ ਸਕਦੇ ਹਨ ਤਾਂ ਉਹ ਅਗਲੀਆਂ 75 ਪਾਰੀਆਂ, ਯਾਨੀ ਲਗਭਗ 38 ਟੈਸਟ ਮੈਚਾਂ 'ਚ ਸਚਿਨ ਦਾ ਰਿਕਾਰਡ ਤੋੜ ਸਕਦੇ ਹਨ। ਇਹ ਉਸ ਦੇ ਕਰੀਅਰ ਦਾ 182ਵਾਂ ਟੈਸਟ ਹੋਵੇਗਾ। ਰੂਟ ਕੋਲ ਅਰਧ ਸੈਂਕੜੇ ਵਿੱਚ ਵੀ ਸਚਿਨ ਨੂੰ ਪਿੱਛੇ ਛੱਡਣ ਦਾ ਮੌਕਾ ਹੈ। ਰੂਟ ਨੇ 64 ਅਰਧ ਸੈਂਕੜੇ ਲਗਾਏ ਹਨ। ਉਹ ਸਚਿਨ 68 ਤੋਂ ਸਿਰਫ਼ 4 ਕਦਮ ਦੂਰ ਹੈ।
ਭਾਵੇਂ ਰੂਟ ਸਚਿਨ ਦੇ ਸਭ ਤੋਂ ਵੱਧ ਮੈਚਾਂ ਅਤੇ ਦੌੜਾਂ ਦੇ ਰਿਕਾਰਡ ਨੂੰ ਤੋੜਨ ਦੇ ਨੇੜੇ ਹਨ, ਪਰ ਉਨ੍ਹਾਂ ਦੇ 51 ਸੈਂਕੜੇ ਦੇ ਰਿਕਾਰਡ ਨੂੰ ਤੋੜਨਾ ਮੁਸ਼ਕਲ ਹੋ ਸਕਦਾ ਹੈ। ਰੂਟ ਇਸ ਸਮੇਂ 32 ਸੈਂਕੜਿਆਂ 'ਤੇ ਹੈ ਤੇ ਹਰ 4.5 ਮੈਚਾਂ 'ਚ ਔਸਤ ਨਾਲ ਸੈਂਕੜਾ ਬਣਾ ਰਿਹਾ ਹੈ। ਇਸ ਦਰ 'ਤੇ ਸਚਿਨ ਨੂੰ ਪਿੱਛੇ ਛੱਡਣ ਲਈ ਉਸ ਨੂੰ 90 ਮੈਚ ਖੇਡਣੇ ਪੈ ਸਕਦੇ ਹਨ ਅਤੇ ਅਜਿਹੇ 'ਚ ਉਸ ਦੇ ਕਰੀਅਰ ਨੂੰ ਕਰੀਬ 8 ਸਾਲ ਤੱਕ ਖਿੱਚਣਾ ਪਵੇਗਾ।