ਗੇਂਦਬਾਜ਼ਾਂ ਸਦਕਾ ਦੱਖਣੀ ਅਫਰੀਕਾ ਵੱਡੀ ਲੀਡ ਬਣਾਉਣ 'ਚ ਅਸਫਲ

ਨਵੀਂ ਦਿੱਲੀ: ਤੀਜੇ ਟੈਸਟ ਮੈਚ ਦੇ ਦੂਜੇ ਦਿਨ ਭਾਰਤ ਲਈ ਮਜ਼ਬੂਤ ਹਾਲਤ ਦੀ ਆਸਾਂ ਨੂੰ ਗੇਂਦਬਾਜ਼ਾਂ ਨੇ ਬੂਰ ਪਾ ਦਿੱਤਾ ਹੈ। ਦੱਖਣੀ ਅਫਰੀਕਾ ਦੀ ਪੂਰੀ ਟੀਮ ਨੂੰ ਭਾਰਤੀ ਗੇਂਦਬਾਜ਼ਾਂ ਨੇ 194 ਦੌੜਾਂ 'ਤੇ ਡੱਕ ਲਿਆ। ਮੇਜ਼ਬਾਨ ਟੀਮ 7 ਦੌੜਾਂ ਦੀ ਲੀਡ ਹੀ ਬਣਾ ਸਕੀ। ਭਾਰਤ ਨੇ ਦੂਜੀ ਪਾਰੀ ਦਾ ਆਗ਼ਾਜ਼ ਕਰ ਦਿੱਤਾ ਹੈ। ਮੁਰਲੀ ਵਿਜੇ ਤੇ ਪਾਰਥਿਵ ਪਟੇਲ ਬੱਲੇਬਾਜ਼ੀ ਕਰ ਰਹੇ ਹਨ ਤੇ ਟੀਮ ਦਾ ਸਕੋਰ ਬਿਨਾ ਕਿਸੇ ਨੁਕਸਾਨ 'ਤੇ 4 ਰਨ ਹੋ ਚੁੱਕਾ ਹੈ। ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਨੇ ਸ਼ਾਨਦਾਰ ਗੇਂਦਬਾਜ਼ੀ ਕਰਦਿਆਂ ਵਿਰੋਧੀ ਟੀਮ ਦੇ 5 ਖਿਡਾਰੀ ਆਊਟ ਕੀਤੇ। ਭਾਰਤੀ ਗੇਂਦਬਾਜ਼ ਸ਼ੁਰੂ ਤੋਂ ਹੀ ਮੇਜ਼ਬਾਨ ਟੀਮ ‘ਤੇ ਦਬਾਅ ਬਣਾ ਕੇ ਖੇਡ ਰਹੇ ਸਨ। ਭੁਵਨੇਸ਼ਵਰ ਕੁਮਾਰ ਨੇ ਨਾ ਸਿਰਫ ਕਫਾਇਤੀ ਗੇਂਦਬਾਜ਼ੀ ਕੀਤੀ ਬਲਕਿ 34 ਦੌੜਾਂ ਦੇ ਕੇ 3 ਵਿਕਟਾਂ ਵੀ ਝਟਕਾਈਆਂ। ਜਸਪ੍ਰੀਤ ਬੁਮਰਾਹ ਤੇ ਈਸ਼ਾਂਤ ਸ਼ਰਮਾ ਨੇ ਇੱਕ-ਇੱਕ ਵਿਕਟ ਹਾਸਲ ਕੀਤੀ। ਭਾਰਤੀ ਬੱਲੇਬਾਜ਼ ਅਫਰੀਕਾ ਦੇ ਪੂਰੇ ਦੌਰੇ ਦੌਰਾਨ ਆਪਣਾ ਖਾਸ ਜਲਵਾ ਵਿਖਾ ਨਹੀਂ ਸਕੇ। ਤੀਜੇ ਟੈਸਟ ਦੀ ਪਹਿਲੀ ਪਾਰੀ ਵਿੱਚ ਕਪਤਾਨ ਵਿਰਾਟ ਕੋਹਲੀ ਤੇ ਚਿਤੇਸ਼ਵਰ ਪੁਜਾਰਾ ਨੇ ਅਰਧ ਸੈਂਕੜੇ ਲਾਏ। ਇਨ੍ਹਾਂ ਦੇ ਨਾਲ ਭੁਵਨੇਸ਼ਵਰ ਕੁਮਾਰ ਤੋਂ ਬਿਨਾ ਹੋ ਕੋਈ ਵੀ ਭਾਰਤੀ ਖਿਡਾਰੀ ਦੂਹਰਾ ਅੰਕੜਾ ਪਾਰ ਨਹੀਂ ਕਰ ਸਕਿਆ। ਚਾਰ ਖਿਡਾਰੀ ਤਾਂ ਬਿਨਾ ਖਾਤਾ ਖੋਲ੍ਹੇ ਹੀ ਪੈਵੇਲੀਅਨ ਪਰਤ ਗਏ। 76.4 ਓਵਰਾਂ ਵਿੱਚ ਭਾਰਤ ਨੇ 187 ਦੌੜਾਂ ਹੀ ਬਣਾਈਆਂ।