IND vs SL: ਵਿਰਾਟ ਦੀ ਕਪਤਾਨੀ ਵਿੱਚ ਭਾਰਤ ਲਗਾਤਾਰ 8ਵੀਂ ਟੈਸਟ ਸੀਰੀਜ਼ ਜਿੱਤਿਆ

ਸ਼੍ਰੀਲੰਕਾ ਦੀ ਟੀਮ ਪਹਿਲੀ ਪਾਰੀ ਵਿੱਚ 183 ਦੌੜਾਂ ਹੀ ਬਣਾ ਸਕੀ, ਜਿਸ ਵਿੱਚ ਨਿਰੋਸ਼ਨ ਡਿਕਵੇਲਾ ਨੇ ਸਭ ਤੋਂ ਜ਼ਿਆਦਾ 51 ਦੌੜਾਂ ਬਣਾਈਆਂ। ਪਹਿਲੀ ਪਾਰੀ ਵਿੱਚ ਭਾਰਤ ਦੇ ਅਸ਼ਵਿਨ ਨੇ 5 ਤੇ ਜਡੇਜਾ ਤੇ ਸ਼ਮੀ ਨੇ 2-2 ਵਿਕੇਟਾਂ ਹਾਸਲ ਕੀਤੀਆਂ।

ਐਤਵਾਰ ਨੂੰ ਫਾਲੋਆਨ ਖੇਡਦੇ ਹੋਏ ਮੇਜ਼ਬਾਨ ਟੀਮ ਦੂਜੀ ਇਨਿੰਗਜ਼ ਵਿੱਚ 116.5 ਓਵਰਾਂ ਵਿੱਚ 386 ਦੌੜਾਂ 'ਤੇ ਆਲਆਊਟ ਹੋ ਗਈ। ਪਹਿਲੀ ਇਨਿੰਗਜ਼ ਵਿੱਚ ਭਾਰਤ ਨੂੰ 439 ਦੌੜਾਂ ਦੀ ਲੀਡ ਮਿਲੀ ਸੀ। ਇਸ ਤੋਂ ਬਾਅਦ ਭਾਰਤੀ ਟੀਮ ਨੇ ਇਹ ਮੈਚ ਇੱਕ ਇਨਿੰਗਜ਼ ਅਤੇ 53 ਦੌੜਾਂ 'ਤੇ ਜਿੱਤ ਲਿਆ।

ਭਾਰਤ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਤੇ 9 ਵਿਕੇਟ 'ਤੇ 622 ਦੌੜਾਂ ਬਣਾ ਕੇ ਪਹਿਲੀ ਪਾਰੀ ਦਾ ਐਲਾਨ ਕਰ ਦਿੱਤਾ। ਪਹਿਲੀ ਪਾਰੀ ਵਿੱਚ ਪੁਜਾਰਾ ਨੇ 133 ਤੇ ਰਹਾਣੇ ਨੇ 132 ਰਣ ਬਣਾਏ। ਜਦਕਿ ਜਡੇਜਾ (70), ਸਾਹਿਆ (67), ਰਾਹੁਲ (57) ਅਤੇ ਅਸ਼ਵਿਨ (54) ਨੇ ਫਿਫਟੀ ਲਾਈ।

ਇਸ ਜਿੱਤ ਦੇ ਨਾਲ ਹੀ ਵਿਰਾਟ ਕੋਹਲੀ ਦੀ ਕਪਤਾਨੀ ਵਿੱਚ ਭਾਰਤੀ ਟੀਮ ਨੇ ਲਗਾਤਾਰ 8ਵੀਂ ਟੈਸਟ ਸੀਰੀਜ਼ ਵੀ ਜਿੱਤ ਲਈ ਹੈ। ਹਾਲਾਂਕਿ, ਬਤੌਰ ਬੱਲੇਬਾਜ਼ ਕਪਤਾਨ ਕੋਹਲੀ ਕੁਝ ਖਾਸ ਪ੍ਰਰਦਸ਼ਨ ਨਹੀਂ ਕਰ ਸਕੇ ਤੇ ਪਹਿਲੀ ਪਾਰੀ ਵਿੱਚ 13 ਦੌੜਾਂ ਬਣਾ ਕੇ ਹੀ ਪੈਵੇਲੀਅਨ ਪਰਤ ਗਏ।

ਸ਼੍ਰੀਲੰਕਾ ਦੇ ਸਿੰਹਲੀ ਸਪੋਰਟਸ ਕਲੱਬ ਮੈਦਾਨ 'ਤੇ ਖੇਡੇ ਗਏ ਦੂਜੇ ਟੈਸਟ ਮੁਕਾਬਲੇ ਦੇ ਚੌਥੇ ਦਿਨ ਰਵਿੰਦਰ ਜਡੇਜਾ ਨੇ ਆਪਣੀ ਗੇਂਦਬਾਜ਼ੀ ਦਾ ਚੰਗਾ ਨਮੂਨਾ ਪੇਸ਼ ਕੀਤਾ ਅਤੇ ਸ਼੍ਰੀਲੰਕਾਈ ਟੀਮ ਦੀ ਟੈਸਟ ਡਰਾਅ ਕਰਨ ਦੀਆਂ ਉਮੀਦਾਂ 'ਤੇ ਬੁਰੀ ਤਰ੍ਹਾਂ ਨਾਲ ਪਾਣੀ ਫੇਰ ਦਿੱਤਾ। ਮੈਚ ਵਿੱਚ ਅਸ਼ਵਿਨ ਤੇ ਜਡੇਜਾ ਨੇ 7-7 ਵਿਕਟ ਝਟਕਾਏ।

ਕੋਲੰਬੋ: ਚੇਤੇਸ਼ਵਰ ਪੁਜਾਰਾ-ਅਜਿੰਕੇ ਰਹਾਣੇ ਦੇ ਸੈਂਕੜਿਆ ਤੋਂ ਬਾਅਦ ਰਵਿੰਦਰ ਜਡੇਜਾ ਤੇ ਆਰ. ਆਸ਼ਵਿਨ ਦੀ ਚੰਗੀ ਗੇਂਦਬਾਜ਼ੀ ਸਦਕਾ ਭਾਰਤ ਨੇ ਸ਼੍ਰੀਲੰਕਾ ਨੂੰ ਪਾਰੀ ਤੇ 53 ਰਨਾਂ ਨਾਲ ਮਾਤ ਦੇ ਕੇ 3 ਟੈਸਟ ਮੈਚਾਂ ਦੀ ਸੀਰੀਜ਼ 'ਤੇ 2-0 ਨਾਲ ਕਬਜ਼ਾ ਕਰ ਲਿਆ।