ਨਵੀਂ ਦਿੱਲੀ: ਜਾਂਚ ਏਜੰਸੀਆਂ ਨੇ ਮੈਚ ਫਿਕਸਿੰਗ ਮਾਮਲੇ 'ਚ ਲੰਡਨ ਤੋਂ ਲਿਆਂਦੇ ਬੁੱਕੀ ਸੰਜੀਵ ਚਾਵਲਾ 'ਤੇ ਆਪਣੀ ਪਕੜ ਹੋਰ ਕੱਸਣੀ ਸ਼ੁਰੂ ਕਰ ਦਿੱਤੀ ਹੈ। ਸੰਜੀਵ ਚਾਵਲਾ ਨੇ ਕੁਝ ਖਿਡਾਰੀਆਂ ਦਾ ਨਾਂ ਵੀ ਲਏ ਹਨ। ਜਲਦੀ ਹੀ ਇਸ ਮਾਮਲੇ ਵਿਚ ਖੇਡ ਜਗਤ ਦੇ ਕੁਝ ਲੋਕਾਂ ਨੂੰ ਪੁੱਛਗਿੱਛ ਲਈ ਬੁਲਾਇਆ ਜਾ ਸਕਦਾ ਹੈ। ਜਾਂਚ ਏਜੰਸੀ ਕੋਲ 2000 ਵਿਚ ਭਾਰਤ-ਦੱਖਣੀ ਅਫਰੀਕਾ ਦੇ 5 ਵਨਡੇ ਅਤੇ ਤਿੰਨ ਟੈਸਟ ਮੈਚ ਫਿਕਸਿੰਗ ਕਰਨ ਦੇ ਸਬੂਤ ਦੇ ਤੌਰ 'ਤੇ ਦੱਖਣੀ ਅਫਰੀਕਾ ਦੇ ਸਾਬਕਾ ਕਪਤਾਨ ਹਾਂਸੀ ਕ੍ਰੋਨਿਏ ਅਤੇ ਸੰਜੀਵ ਚਾਵਲਾ ਦੀ ਗੱਲਬਾਤ ਦੇ ਰਿਕਾਰਡ ਹਨ।

ਪੁਲਿਸ ਸੂਤਰਾਂ ਅਨੁਸਾਰ ਸੰਜੀਵ ਚਾਵਲਾ ਨੇ ਮੁਢਲੀ ਪੁੱਛਗਿੱਛ ਦੌਰਾਨ ਇਹ ਕਹਿ ਕੇ ਕੇਸ ਮੁਲਤਵੀ ਕਰਨ ਦੀ ਕੋਸ਼ਿਸ਼ ਕੀਤੀ ਕਿ ਉਸਨੂੰ ਜ਼ਿਆਦਾ ਯਾਦ ਨਹੀਂ ਹੈ। ਸੂਤਰਾਂ ਨੇ ਦੱਸਿਆ ਕਿ ਇਸ 'ਤੇ ਚਾਵਲਾ ਆਪਣੇ ਅਤੇ ਦੱਖਣੀ ਅਫਰੀਕਾ ਦੇ ਕਪਤਾਨ ਹਾਂਸੀ ਵਿਚਕਾਰ ਗੱਲਬਾਤ ਸੁਣਨ ਗਏ। ਇਸ ਗੱਲਬਾਤ ਦੌਰਾਨ ਇਹ ਪੂਰੀ ਤਰ੍ਹਾਂ ਸਾਫ਼ ਹੋਇਆ ਕਿ ਮੈਚ ਫਿਕਸਿੰਗ ਕਿਵੇਂ ਕੀਤੀ ਜਾਵੇਗੀ।

ਜਾਂਚ ਨਾਲ ਜੁੜੇ ਇੱਕ ਉੱਚ ਅਧਿਕਾਰੀ ਨੇ ਦੱਸਿਆ ਕਿ ਟੇਪ 'ਚ ਮੌਜੂਦ ਆਵਾਜ਼ ਸੰਜੀਵ ਚਾਵਲਾ ਦੀ ਹੈ। ਇਸ ਨਾਲ ਮੇਲ ਕਰਨ ਲਈ, ਉਸਦੀ ਆਵਾਜ਼ ਦਾ ਨਮੂਨਾ ਲਿਆ ਜਾਵੇਗਾ ਅਤੇ ਫਿਰ ਇਸਨੂੰ ਫੋਰੈਂਸਿਕ ਪ੍ਰਯੋਗਸ਼ਾਲਾ 'ਚ ਭੇਜਿਆ ਜਾਵੇਗਾ।

ਅਧਿਕਾਰੀ ਨੇ ਕਿਹਾ ਕਿ ਇਹ ਆਵਾਜ਼ ਚਾਵਲਾ ਲਈ ਫਾਂਸੀ ਦਾ ਫਾਹਾ ਬਣ ਜਾਵੇਗੀ, ਕਿਉਂਕਿ ਸੰਜੀਵ ਚਾਵਲਾ ਅਤੇ ਹਾਂਸੀ ਕ੍ਰੋਨਿਏ ਇਸ ਗੱਲਬਾਤ 'ਚ ਦੱਖਣੀ ਅਫਰੀਕਾ ਦੀ ਟੀਮ ਦੇ ਹੋਰ ਖਿਡਾਰੀਆਂ ਦੇ ਨਾਂ ਲੈ ਰਹੇ ਹਨ। ਇਲਜ਼ਾਮਾਂ ਮੁਤਾਬਕ ਹਰ ਖਿਡਾਰੀ ਨੂੰ 25 ਦੇਣ ਦੀ ਗੱਲ ਕੀਤੀ ਜਾ ਰਹੀ ਹੈ। ਕ੍ਰਾਈਮ ਬ੍ਰਾਂਚ ਨੇ ਸੱਟੇਬਾਜ਼ ਸੰਜੀਵ ਚਾਵਲਾ ਨੂੰ 12 ਦਿਨਾਂ ਦੇ ਰਿਮਾਂਡ 'ਤੇ ਲਿਆ ਹੈ।