ਸਿੱਧੂ ਮੂਸੇਵਾਲਾ ਕਤਲ ਕੇਸ 'ਚ ਪੁਲਿਸ ਨੇ ਚੁੱਕਿਆ ਗੋਲਡੀ ਬਰਾੜ ਦਾ ਜੀਜਾ

ਸਿੱਧੂ ਮੂਸੇਵਾਲਾ ਕਤਲ ਕੇਸ 'ਚ ਪੁਲਿਸ ਨੇ ਚੁੱਕਿਆ ਗੋਲਡੀ ਬਰਾੜ ਦਾ ਜੀਜਾ 

ਹੁਸ਼ਿਆਰਪੁਰ: ਸਿੱਧੂ ਮੂਸੇਵਾਲਾ ਕਤਲ ਮਾਮਲੇ 'ਚ ਪੁਲਿਸ ਨੇ ਕੱਲ੍ਹ ਹੁਸ਼ਿਆਰਪੁਰ ਤੋਂ ਲਾਰੈਂਸ ਬਿਸ਼ਨੋਈ ਦੇ ਸਾਥੀ ਗੁਰਵਿੰਦਰ ਸਿੰਘ ਉਰਫ਼ ਗੋਰਾ ਤੋਂ ਪੁੱਛਗਿੱਛ ਕੀਤੀ ਹੈ। ਗੋਰਾ (ਗੁਰਵਿੰਦਰ ਸਿੰਘ) ਗੋਲਡੀ ਬਰਾੜ ਦਾ ਜੀਜਾ ਹੈ। ਪੁਲਿਸ ਨੇ ਗੋਰੇ ਤੋਂ ਪੁੱਛਗਿੱਛ ਲਈ ਬੀਤੀ ਰਾਤ ਅਦਾਲਤ ਤੋਂ 2 ਦਿਨ ਦਾ ਰਿਮਾਂਡ ਲਿਆ ਹੈ। ਗੁਰਵਿੰਦਰ ਸਿੰਘ ਉਰਫ ਗੋਰਾ ਫਰੀਦਕੋਟ ਦਾ ਰਹਿਣ ਵਾਲਾ ਹੈ।

ਹਾਸਲ ਜਾਣਕਾਰੀ ਅਨੁਸਾਰ ਇਸ ਉੱਪਰ ਐਨਡੀਪੀਐਸ ਸਮੇਤ ਸੱਤ ਕੇਸ ਦਰਜ ਹਨ। ਗੋਰਾ ਇਸ ਤੋਂ ਪਹਿਲਾਂ ਫਰੀਦਕੋਟ ਜੇਲ੍ਹ ਵਿੱਚ ਬੰਦ ਸੀ। ਫ਼ਿਲਹਾਲ ਉਹ ਲੰਬੇ ਸਮੇਂ ਤੋਂ ਹੁਸ਼ਿਆਰਪੁਰ ਦੀ ਕੇਂਦਰੀ ਜੇਲ੍ਹ ਵਿੱਚ ਬੰਦ ਸੀ। ਇੱਕ ਹੋਰ ਸਾਥੀ ਨਰੇਸ਼ ਲਾਡੀ ਨੂੰ ਵੀ ਪੁੱਛਗਿੱਛ ਲਈ ਮੁਹਾਲੀ ਦੇ ਖਰੜ ਵਿੱਚ ਲਿਆਂਦਾ ਗਿਆ। ਨਰੇਸ਼ ਲਾਡੀ ਹੁਸ਼ਿਆਰਪੁਰ ਦਾ ਰਹਿਣ ਵਾਲਾ ਹੈ, ਲਾਡੀ 'ਤੇ ਕਤਲ ਦਾ ਮਾਮਲਾ ਦਰਜ ਹੈ। ਨਰੇਸ਼ ਲਾਡੀ ਖ਼ਿਲਾਫ਼ ਕੁੱਲ 13 ਕੇਸ ਦਰਜ ਹਨ। ਹੁਣ ਦੋਵਾਂ ਨੂੰ ਵਾਪਸ ਹੁਸ਼ਿਆਰਪੁਰ ਜੇਲ੍ਹ ਲਿਆਂਦਾ ਗਿਆ ਹੈ।