ਜੇਕਰ ਤੁਸੀਂ ਵੀ ਆਪਣੇ ਬੱਚਿਆਂ ਨੂੰ Nestle ਦਾ ਫੂਡ ਖਵਾਉਂਦੇ ਹੋ ਤਾਂ ਸਾਵਧਾਨ ਹੋ ਜਾਓ। ਜੀ ਹਾਂ ਰਿਪੋਰਟ ਦੇ ਵਿੱਚ ਹੈਰਾਨੀਜਨਕ ਖੁਲਾਸੇ ਹੋਏ ਹਨ।

FMCG ਕੰਪਨੀ ਨੈਸਲੇ ਵਿਕਾਸਸ਼ੀਲ ਦੇਸ਼ਾਂ 'ਚ ਵਿਕਣ ਵਾਲੇ ਬੇਬੀ ਦੁੱਧ ਅਤੇ ਸੇਰੇਲੈਕ ਵਰਗੇ ਭੋਜਨ ਉਤਪਾਦਾਂ ਵਿੱਚ ਖੰਡ ਅਤੇ ਸ਼ਹਿਦ ਸ਼ਾਮਲ ਕਰਦੀ ਹੈ।

ਜੀ ਹਾਂ ਹੈਰਾਨ ਕਰਨ ਵਾਲਾ ਇਹ ਖੁਲਾਸਾ ਜ਼ਿਊਰਿਖ ਸਥਿਤ ਪਬਲਿਕ ਆਈ ਅਤੇ ਇੰਟਰਨੈਸ਼ਨਲ ਬੇਬੀ ਫੂਡ ਐਕਸ਼ਨ ਨੈੱਟਵਰਕ ਨੇ ਆਪਣੀ ਰਿਪੋਰਟ 'ਚ ਕੀਤਾ ਹੈ।

ਰਿਪੋਰਟ ਦੇ ਅਨੁਸਾਰ, ਏਸ਼ੀਆ, ਲਾਤੀਨੀ ਅਮਰੀਕਾ ਅਤੇ ਅਫਰੀਕਾ ਵਿੱਚ ਵਿਕਣ ਵਾਲੇ 6 ਮਹੀਨਿਆਂ ਤੱਕ ਦੇ ਬੱਚਿਆਂ ਲਈ ਲਗਭਗ ਸਾਰੇ ਕਣਕ ਅਧਾਰਤ ਬੇਬੀ ਫੂਡ ਵਿੱਚ ਔਸਤਨ 4 ਗ੍ਰਾਮ ਚੀਨੀ ਪ੍ਰਤੀ ਕਟੋਰਾ ਪਾਈ ਗਈ।

ਪਬਲਿਕ ਆਈ ਨੇ ਬੈਲਜੀਅਮ ਸਥਿਤ ਇੱਕ ਲੈਬ ਵਿੱਚ ਇਨ੍ਹਾਂ ਦੇਸ਼ਾਂ ਵਿੱਚ ਕੰਪਨੀ ਦੇ 150 ਉਤਪਾਦਾਂ ਦੀ ਜਾਂਚ ਕੀਤੀ।

WHO ਦੇ ਦਿਸ਼ਾ-ਨਿਰਦੇਸ਼ਾਂ ਦੇ ਅਨੁਸਾਰ, 3 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਦੇ ਭੋਜਨ 'ਚ ਕੋਈ ਵੀ ਚੀਨੀ ਜਾਂ ਮਿੱਠੇ ਪਦਾਰਥਾਂ ਦੀ ਵਰਤੋਂ ਨਹੀਂ ਕੀਤੀ ਜਾਣੀ ਚਾਹੀਦੀ।

ਇਸ ਦੇ ਨਾਲ ਹੀ ਰਿਪੋਰਟ ਵਿੱਚ ਦੱਸਿਆ ਗਿਆ ਹੈ ਕਿ ਨੈਸਲੇ ਭਾਰਤ 'ਚ ਲਗਭਗ ਸਾਰੇ ਬੇਬੀ ਸੇਰੇਲੈਕ ਉਤਪਾਦਾਂ ਦੀ ਹਰੇਕ ਸੇਵਾ ਵਿੱਚ ਔਸਤਨ 3 ਗ੍ਰਾਮ ਸ਼ੂਗਰ ਮਿਲਾਉਂਦਾ ਹੈ।

ਇਸ ਦੇ ਨਾਲ ਹੀ, 6 ਮਹੀਨੇ ਤੋਂ 24 ਮਹੀਨਿਆਂ ਦੇ ਬੱਚਿਆਂ ਲਈ ਵੇਚੇ ਜਾਣ ਵਾਲੇ 100 ਗ੍ਰਾਮ ਸੇਰੇਲੈਕ ਵਿੱਚ ਕੁੱਲ 24 ਗ੍ਰਾਮ ਸ਼ੂਗਰ ਹੁੰਦੀ ਹੈ।

ਰਿਪੋਰਟ 'ਚ ਨੈਸਲੇ 'ਤੇ ਦੋਸ਼ ਲਗਾਇਆ ਗਿਆ ਹੈ ਕਿ ਇਹ ਆਪਣੇ ਉਤਪਾਦਾਂ 'ਚ ਮੌਜੂਦ ਵਿਟਾਮਿਨ, ਖਣਿਜ ਅਤੇ ਹੋਰ ਪੋਸ਼ਕ ਤੱਤਾਂ ਨੂੰ ਪ੍ਰਮੁੱਖਤਾ ਨਾਲ ਉਜਾਗਰ ਕਰਦਾ ਹੈ ਪਰ ਕੰਪਨੀ ਸ਼ੂਗਰ ਦੇ ਮਿਸ਼ਰਣ ਦੇ ਮਾਮਲੇ 'ਚ ਪਾਰਦਰਸ਼ੀ ਨਹੀਂ ਹੈ।

ਨੈਸਲੇ ਦੇ ਬੁਲਾਰੇ ਨੇ ਕਿਹਾ, ਬੇਬੀ ਫੂਡ ਬਹੁਤ ਜ਼ਿਆਦਾ ਨਿਯੰਤਰਿਤ ਸ਼੍ਰੇਣੀ 'ਚ ਆਉਂਦੇ ਹਨ। ਅਸੀਂ ਜਿੱਥੇ ਵੀ ਕੰਮ ਕਰਦੇ ਹਾਂ ਅਸੀਂ ਸਥਾਨਕ ਕਾਨੂੰਨਾਂ ਅਤੇ ਅੰਤਰਰਾਸ਼ਟਰੀ ਮਾਪਦੰਡਾਂ ਦੀ ਪਾਲਣਾ ਕਰਦੇ ਹਾਂ।