ਅਦਾਕਾਰ, ਮਾਡਲ ਆਦਿਤਿਆ ਸਿੰਘ ਰਾਜਪੂਤ ਸੋਮਵਾਰ ਨੂੰ ਆਪਣੇ ਘਰ ਦੇ ਬਾਥਰੂਮ ਵਿੱਚ ਮ੍ਰਿਤਕ ਪਾਇਆ ਗਿਆ। ਇਸ ਦੇ ਨਾਲ ਹੀ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਪੁਲਿਸ ਨੂੰ ਕਈ ਜਾਣਕਾਰੀਆਂ ਮਿਲੀਆਂ ਹਨ।

ਪੁਲਿਸ ਨੇ ਸ਼ੁਰੂਆਤੀ ਤੌਰ 'ਤੇ ਮੰਨਿਆ ਹੈ ਕਿ ਆਦਿਤਿਆ ਸਿੰਘ ਰਾਜਪੂਤ ਦੀ ਮੌਤ ਉਸਦੇ ਅੰਧੇਰੀ ਅਪਾਰਟਮੈਂਟ ਵਿੱਚ ਕਥਿਤ ਤੌਰ 'ਤੇ ਫਿਸਲਣ ਅਤੇ ਬਾਥਰੂਮ ਵਿੱਚ ਡਿੱਗਣ ਨਾਲ ਹੋਈ ਸੀ।

ਦੂਜੇ ਪਾਸੇ ਪੁਲਿਸ ਸੂਤਰ ਨੇ ਦੱਸਿਆ ਕਿ ਮਰਹੂਮ ਅਭਿਨੇਤਾ ਰਾਜਪੂਤ ਦੇ ਕੰਨ ਅਤੇ ਸਿਰ 'ਤੇ ਕੱਟ ਦੇ ਦੋ ਜ਼ਖ਼ਮ ਸਨ, ਜਿਸ ਤੋਂ ਡਿੱਗਣ ਦਾ ਖ਼ਦਸ਼ਾ ਹੈ। ਦਿੱਲੀ ਦੀ ਰਹਿਣ ਵਾਲੀ ਰਾਜਪੂਤ ਦੀ ਮਾਂ ਸੋਮਵਾਰ ਨੂੰ ਮੁੰਬਈ ਲਈ ਰਵਾਨਾ ਹੋਈ ਸੀ।

ਆਦਿਤਿਆ ਦਾ ਇੱਕ ਰੂਮਮੇਟ ਕੁਝ ਦਿਨਾਂ ਤੋਂ ਘਰ ਨਹੀਂ ਗਿਆ ਸੀ ਅਤੇ ਦੂਜਾ ਸਵੇਰੇ ਕੰਮ 'ਤੇ ਜਾਂਦਾ ਸੀ ਅਤੇ ਦੇਰ ਰਾਤ ਵਾਪਸ ਆਉਂਦਾ ਸੀ।

ਪੁਲਿਸ ਨੇ ਦੱਸਿਆ ਕਿ ਰਾਜਪੂਤ ਦੀ ਪਿਛਲੇ ਕੁਝ ਦਿਨਾਂ ਤੋਂ ਤਬੀਅਤ ਠੀਕ ਨਹੀਂ ਸੀ। ਨੌਕਰਾਣੀ ਨੇ ਪੁਲਿਸ ਨੂੰ ਦੱਸਿਆ ਕਿ ਅਭਿਨੇਤਾ ਨੂੰ ਖੰਘ, ਜ਼ੁਕਾਮ ਅਤੇ ਉਲਟੀਆਂ ਆ ਰਹੀਆਂ ਸਨ, ਆਦਿਤਿਆ ਨੇ ਐਤਵਾਰ ਨੂੰ ਵੀ ਪਾਰਟੀ ਰੱਖੀ ਸੀ।

ਉਕਤ ਨੌਕਰਾਣੀ ਦੇ ਬਿਆਨ ਮੁਤਾਬਕ ਸੋਮਵਾਰ ਨੂੰ ਆਦਿਤਿਆ ਸਵੇਰੇ 11 ਵਜੇ ਉੱਠਿਆ ਅਤੇ ਨਾਸ਼ਤੇ 'ਚ ਪਰਾਠਾ ਖਾਧਾ। ਉਲਟੀਆਂ ਆਉਣ ਤੋਂ ਬਾਅਦ ਉਸ ਨੇ ਰਸੋਈਏ ਨੂੰ ਉਸ ਲਈ ਖਿਚੜੀ ਬਣਾਉਣ ਲਈ ਕਿਹਾ।

ਦੁਪਹਿਰ 2 ਤੋਂ 2.30 ਵਜੇ ਦੇ ਦਰਮਿਆਨ ਆਦਿਤਿਆ ਬਾਥਰੂਮ ਗਿਆ। ਉਸ ਦੇ ਘਰ ਦੇ ਨੌਕਰ ਨੇ ਜ਼ੋਰਦਾਰ ਡਿੱਗਣ ਦੀ ਆਵਾਜ਼ ਸੁਣੀ ਅਤੇ ਜਦੋਂ ਉਸ ਨੇ ਦੌੜ ਕੇ ਦੇਖਿਆ ਤਾਂ ਉਹ ਜ਼ਮੀਨ 'ਤੇ ਡਿੱਗ ਪਿਆ ਸੀ ਅਤੇ ਉਸ ਨੂੰ ਮਾਮੂਲੀ ਸੱਟ ਵੀ ਲੱਗੀ ਸੀ।

ਚੌਕੀਦਾਰ ਦੇ ਬਿਆਨਾਂ ਅਨੁਸਾਰ ਜਦੋਂ ਉਸ ਨੇ ਜਾ ਕੇ ਦੇਖਿਆ ਤਾਂ ਬਾਥਰੂਮ ਦੀਆਂ ਕੁਝ ਟਾਈਲਾਂ ਵੀ ਟੁੱਟੀਆਂ ਪਈਆਂ ਸਨ, ਘਰ ਦਾ ਸਹਾਇਕ ਹੇਠਾਂ ਵੱਲ ਨੂੰ ਭੱਜਿਆ ਅਤੇ ਚੌਕੀਦਾਰ ਤੋਂ ਮਦਦ ਮੰਗੀ।

ਚੌਕੀਦਾਰ ਉੱਪਰ ਗਿਆ ਅਤੇ ਬੇਹੋਸ਼ ਰਾਜਪੂਤ ਨੂੰ ਚੁੱਕ ਲਿਆ ਗਿਆ। ਇਸ ਤੋਂ ਬਾਅਦ ਉਸ ਨੂੰ ਬੈੱਡ 'ਤੇ ਲੇਟਾ ਦਿੱਤਾ ਗਿਆ। ਸੁਸਾਇਟੀ ਦੇ ਬਾਹਰ ਸਥਿਤ ਹਸਪਤਾਲ ਤੋਂ ਵੀ ਡਾਕਟਰ ਨੂੰ ਬੁਲਾਇਆ ਗਿਆ।

ਇਸ ਦੇ ਨਾਲ ਹੀ ਡਾਕਟਰਾਂ ਨੇ ਉਸ ਨੂੰ ਤੁਰੰਤ ਹਸਪਤਾਲ ਸ਼ਿਫਟ ਕਰਨ ਦਾ ਸੁਝਾਅ ਦਿੱਤਾ। ਇਸ ਤੋਂ ਬਾਅਦ ਆਦਿਤਿਆ ਦੀ ਇੱਕ ਮਹਿਲਾ ਦੋਸਤ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ।