ਮੂਲੀ ਦਾ ਸੇਵਨ ਪੂਰੇ ਉੱਤਰ ਭਾਰਤ ਵਿੱਚ ਸਰਦੀਆਂ ਵਿੱਚ ਬਹੁਤ ਜ਼ਿਆਦਾ ਕੀਤਾ ਜਾਂਦਾ ਹੈ। ਇਹ ਫਾਈਬਰ ਅਤੇ ਵਿਟਾਮਿਨ ਸੀ ਵਰਗੇ ਪੌਸ਼ਟਿਕ ਤੱਤਾਂ ਨਾਲ ਭਰਪੂਰ ਹੁੰਦੀ ਹੈ। ਕੁਝ ਲੋਕ ਇਸ ਨੂੰ ਕੱਚਾ ਖਾਣਾ ਪਸੰਦ ਕਰਦੇ ਹਨ ਅਤੇ ਸਬਜ਼ੀ ਦੇ ਰੂਪ 'ਚ ਵੀ। ਜਿੱਥੇ ਮੂਲੀ ਖਾਣ ਦੇ ਫਾਇਦੇ ਨੇ ਤਾਂ ਕੁੱਝ ਲਈ ਇਸ ਦਾ ਸੇਵਨ ਨੁਕਸਾਨਦਾਇਕ ਸਾਬਿਤ ਹੋ ਸਕਦਾ ਹੈ। ਮੂਲੀ ਦੇ ਕਾਰਨ ਗੈਸ ਦੀ ਸਮੱਸਿਆ ਬਹੁਤ ਆਮ ਹੈ। ਇਸ ਲਈ ਮੂਲੀ ਦੇ ਨਾਲ ਕੁੱਝ ਚੀਜ਼ਾਂ ਨੂੰ ਨਹੀਂ ਖਾਣਾ ਚਾਹੀਦਾ ਹੈ। ਨਹੀਂ ਤਾਂ ਸਰੀਰ ਉੱਤੇ ਮਾੜਾ ਪ੍ਰਭਾਵ ਪੈਂਦਾ ਹੈ। ਮੂਲੀ ਦੇ ਨਾਲ ਕੇਲਾ ਖਾਣਾ ਵੀ ਨੁਕਸਾਨਦੇਹ ਹੈ। ਦੋਵਾਂ ਦਾ ਇਕੱਠੇ ਸੇਵਨ ਕਰਨ ਨਾਲ ਸਰੀਰ 'ਚ ਐਸੀਡਿਟੀ ਵਧਦੀ ਹੈ, ਜਿਸ ਨਾਲ ਪੇਟ 'ਚ ਜਲਨ ਹੋ ਸਕਦੀ ਹੈ। ਇਹ ਇੱਕ ਅਜੀਬ ਮਿਸ਼ਰਣ ਹੈ, ਜੋ ਸਰੀਰ ਲਈ ਚੰਗਾ ਨਹੀਂ ਹੈ। ਮੂਲੀ ਦੇ ਨਾਲ ਦੁੱਧ ਜਾਂ ਡੇਅਰੀ ਉਤਪਾਦਾਂ ਦਾ ਸੇਵਨ ਨਹੀਂ ਕਰਨਾ ਚਾਹੀਦਾ। ਮੂਲੀ ਅਤੇ ਦੁੱਧ ਦੇ ਪ੍ਰੋਟੀਨ ਵਿੱਚ ਮੌਜੂਦ ਰਸਾਇਣਕ ਤੱਤਾਂ ਦਾ ਮਿਸ਼ਰਣ ਗੈਸ, ਪੇਟ ਫੁੱਲਣਾ ਅਤੇ ਹੋਰ ਪਾਚਨ ਸਮੱਸਿਆਵਾਂ ਦਾ ਕਾਰਨ ਬਣ ਸਕਦਾ ਹੈ। ਜੇਕਰ ਤੁਸੀਂ ਮੂਲੀ ਖਾ ਰਹੇ ਹੋ ਤਾਂ ਕੁਝ ਘੰਟਿਆਂ ਦੇ ਅੰਤਰਾਲ ਬਾਅਦ ਡੇਅਰੀ ਉਤਪਾਦਾਂ ਦਾ ਸੇਵਨ ਕਰੋ। ਮੂਲੀ ਦੇ ਨਾਲ ਨਿੰਬੂ, ਸੰਤਰਾ ਅਤੇ ਅੰਗੂਰ ਵਰਗੇ ਖੱਟੇ ਫਲ ਖਾਣਾ ਵੀ ਸੁਰੱਖਿਅਤ ਨਹੀਂ ਹੈ। ਇਸ ਨਾਲ ਪਾਚਨ ਕਿਰਿਆ ਵਿਚ ਮੁਸ਼ਕਲ ਆਉਂਦੀ ਹੈ ਅਤੇ ਐਸੀਡਿਟੀ ਵਧ ਸਕਦੀ ਹੈ। ਖੱਟੇ ਫਲਾਂ ਅਤੇ ਮੂਲੀ ਦਾ ਸੇਵਨ ਕਰਨ ਨਾਲ ਪੇਟ ਵਿੱਚ ਜਲਨ ਅਤੇ ਗੈਸ ਹੋ ਸਕਦੀ ਹੈ। ਇਸ ਲਈ, ਵੱਖ-ਵੱਖ ਸਮੇਂ 'ਤੇ ਇਨ੍ਹਾਂ ਦਾ ਸੇਵਨ ਕਰਨਾ ਸਭ ਤੋਂ ਵਧੀਆ ਹੈ। ਆਲੂ ਅਤੇ ਮੂਲੀ ਦਾ ਮਿਸ਼ਰਣ ਪਾਚਨ ਪ੍ਰਣਾਲੀ ਲਈ ਅਨੁਕੂਲ ਨਹੀਂ ਹੈ। ਦੋਵਾਂ ਭੋਜਨਾਂ ਵਿੱਚ ਵੱਖ-ਵੱਖ ਤਰ੍ਹਾਂ ਦੇ ਕਾਰਬੋਹਾਈਡਰੇਟ ਹੁੰਦੇ ਹਨ, ਜੋ ਇਕੱਠੇ ਪਾਚਨ ਵਿੱਚ ਮੁਸ਼ਕਲ ਪੈਦਾ ਕਰ ਸਕਦੇ ਹਨ। ਇਸ ਨਾਲ ਪੇਟ ਖਰਾਬ ਅਤੇ ਗੈਸ ਦੀ ਸਮੱਸਿਆ ਹੋ ਸਕਦੀ ਹੈ।