ਸਰਦੀਆਂ ਆਉਂਦੇ ਹੀ ਅਕਸਰ ਚਾਹ ਪੀਣ ਦਾ ਮਨ ਬਣ ਜਾਂਦਾ ਹੈ। ਠੰਢੇ ਮੌਸਮ ਵਿੱਚ ਇੱਕ ਕੱਪ ਗਰਮ ਚਾਹ ਸਰੀਰ ਨੂੰ ਗਰਮੀ ਦਿੰਦੀ ਹੈ, ਥਕਾਵਟ ਘਟਾਉਂਦੀ ਹੈ ਅਤੇ ਮਨ ਨੂੰ ਤਾਜ਼ਗੀ ਮਹਿਸੂਸ ਕਰਵਾਉਂਦੀ ਹੈ।

ਪਰ ਜੇ ਚਾਹ ਹੱਦ ਤੋਂ ਵੱਧ ਪੀਤੀ ਜਾਵੇ ਤਾਂ ਇਹ ਸਿਹਤ ਲਈ ਨੁਕਸਾਨਦਾਇਕ ਵੀ ਸਾਬਤ ਹੋ ਸਕਦੀ ਹੈ। ਇਸ ਲਈ ਸਰਦੀਆਂ ਵਿੱਚ ਚਾਹ ਸੰਤੁਲਿਤ ਮਾਤਰਾ ਵਿੱਚ ਪੀਣੀ ਹੀ ਠੀਕ ਰਹਿੰਦੀ ਹੈ।

ਚਾਹ 'ਚ ਮੌਜੂਦ ਐਂਟੀਆਕਸੀਡੈਂਟ ਸਰੀਰ ਨੂੰ ਮਜ਼ਬੂਤ ਬਣਾਉਂਦੇ ਹਨ ਅਤੇ ਰੋਗ-ਪ੍ਰਤੀਰੋਧਕ ਤਾਕਤ ਵਧਾਉਂਦੇ ਹਨ।

ਗਰਮ ਚਾਹ ਸਰੀਰ ਨੂੰ ਗਰਮ ਰੱਖਦੀ ਹੈ, ਸਰਦੀ-ਜ਼ੁਕਾਮ ਤੋਂ ਬਚਾਅ ਕਰਦੀ ਹੈ ਅਤੇ ਥਕਾਵਟ ਦੂਰ ਕਰਦੀ ਹੈ।

ਅਦਰਕ ਜਾਂ ਇਲਾਇਚੀ ਵਾਲੀ ਚਾਹ ਸਰਦੀਆਂ 'ਚ ਖ਼ਾਸ ਤੌਰ ‘ਤੇ ਫਾਇਦੇਮੰਦ ਮੰਨੀ ਜਾਂਦੀ ਹੈ, ਜੋ ਗਲੇ ਦੀ ਖਰਾਸ਼ ਅਤੇ ਖੰਘ 'ਚ ਰਾਹਤ ਦਿੰਦੀ ਹੈ। ਮਾਹਿਰਾਂ ਦੇ ਅਨੁਸਾਰ ਰੋਜ਼ਾਨਾ 2–3 ਕੱਪ ਚਾਹ ਪੀਣ ਨਾਲ ਦਿਲ ਦੀ ਸਿਹਤ ਠੀਕ ਰਹਿੰਦੀ ਹੈ ਅਤੇ ਤਣਾਅ ਘੱਟ ਹੁੰਦਾ ਹੈ।

ਸਿਹਤ ਮਾਹਿਰ ਮੁਤਾਬਕ ਇਕ ਦਿਨ 'ਚ 3 ਤੋਂ 4 ਕੱਪ ਚਾਹ ਜ਼ਿਆਦਾਤਰ ਲੋਕਾਂ ਲਈ ਸੁਰੱਖਿਅਤ ਹੁੰਦੀ ਹੈ। ਇਕ ਕੱਪ ਦਾ ਮਤਲਬ ਲਗਭਗ 200–250 ਮਿ.ਲੀ. ਹੈ।

ਸਰਦੀਆਂ 'ਚ ਕਈ ਲੋਕ 5–6 ਕੱਪ ਜਾਂ ਇਸ ਤੋਂ ਵੀ ਵੱਧ ਚਾਹ ਪੀ ਲੈਂਦੇ ਹਨ, ਜੋ ਸਿਹਤ ਲਈ ਠੀਕ ਨਹੀਂ।

ਹੱਦ ਤੋਂ ਵੱਧ ਚਾਹ ਪੀਣ ਨਾਲ ਕੈਫੀਨ ਦੇ ਕਾਰਨ ਨੀਂਦ ਨਾ ਆਉਣਾ, ਬੇਚੈਨੀ ਅਤੇ ਸਿਰ ਦਰਦ ਹੋ ਸਕਦਾ ਹੈ। ਚਾਹ 'ਚ ਟੈਨਿਨ ਹੁੰਦਾ ਹੈ, ਜੋ ਸਰੀਰ 'ਚ ਆਇਰਨ ਦੇ ਸ਼ੋਸ਼ਣ ਨੂੰ ਰੋਕਦਾ ਹੈ, ਜਿਸ ਨਾਲ ਖੂਨ ਦੀ ਕਮੀ (ਅਨੀਮੀਆ) ਹੋ ਸਕਦੀ ਹੈ।

ਇਸ ਤੋਂ ਇਲਾਵਾ ਪੇਟ 'ਚ ਜਲਣ, ਕਬਜ਼ ਅਤੇ ਐਸਿਡਿਟੀ ਦੀ ਸਮੱਸਿਆ ਵੀ ਵੱਧ ਸਕਦੀ ਹੈ। ਸਰਦੀਆਂ 'ਚ ਜ਼ਿਆਦਾ ਚਾਹ ਪੀਣ ਨਾਲ ਡੀਹਾਈਡ੍ਰੇਸ਼ਨ ਦਾ ਖ਼ਤਰਾ ਵੀ ਬਣ ਜਾਂਦਾ ਹੈ।

ਲੰਬੇ ਸਮੇਂ ਤੱਕ ਜ਼ਿਆਦਾ ਚਾਹ ਪੀਣ ਨਾਲ ਹੱਡੀਆਂ ਕਮਜ਼ੋਰ ਹੋਣ ਅਤੇ ਪੇਟ ਦੀਆਂ ਦਿੱਕਤਾਂ ਵਧਣ ਦੀ ਸੰਭਾਵਨਾ ਰਹਿੰਦੀ ਹੈ। ਦੁੱਧ ਅਤੇ ਖੰਡ ਵਾਲੀ ਚਾਹ ਭਾਰ ਵੀ ਵਧਾ ਸਕਦੀ ਹੈ।