ਅੱਜਕੱਲ ਦੀ ਦੌੜ-ਭੱਜ ਭਰੀ ਜ਼ਿੰਦਗੀ ਵਿੱਚ ਬਹੁਤ ਸਾਰੀਆਂ ਔਰਤਾਂ ਆਟਾ ਪਹਿਲਾਂ ਤੋਂ ਗੁੰਨ ਕੇ ਫਰਿੱਜ 'ਚ ਰੱਖ ਲੈਂਦੀਆਂ ਹਨ। ਪਰ ਜਦੋਂ ਇਹ ਆਟਾ ਫਰਿੱਜ ਤੋਂ ਕੱਢਿਆ ਜਾਂਦਾ ਹੈ ਤਾਂ ਇਹ ਸਖਤ ਹੀ ਨਹੀਂ ਹੁੰਦਾ, ਸਗੋਂ ਇਸ ਦੀਆਂ ਰੋਟੀਆਂ ਵੀ ਕਾਲੀਆਂ ਬਣਦੀਆਂ ਹਨ।

ਗੁੰਨਿਆ ਹੋਇਆ ਆਟਾ ਨਰਮ ਵੀ ਰਹੇ ਤੇ ਕਾਲਾ ਵੀ ਨਾ ਪਵੇ, ਤਾਂ ਇਹ ਟਿੱਪਸ ਤੁਹਾਡੇ ਲਈ ਬਹੁਤ ਫਾਇਦੇਮੰਦ ਸਾਬਤ ਹੋਣਗੀਆਂ।

ਜਦੋਂ ਵੀ ਤੁਸੀਂ ਗੁੰਨਿਆ ਹੋਇਆ ਆਟਾ ਫਰਿੱਜ ਵਿੱਚ ਸਟੋਰ ਕਰਨਾ ਚਾਹੋ, ਤਾਂ ਗੁੰਨਣ ਤੋਂ ਬਾਅਦ ਆਟੇ ਦੀ ਉੱਪਰੀ ਪਰਤ 'ਤੇ ਹਲਕਾ ਜਿਹਾ ਤੇਲ ਜ਼ਰੂਰ ਲਗਾਓ।

ਤੇਲ ਦੀ ਇਹ ਪਰਤ ਆਟੇ ਨੂੰ ਕਾਲਾ ਪੈਣ ਤੋਂ ਵੀ ਰੋਕੇਗੀ ਅਤੇ ਸਖਤ ਹੋਣ ਤੋਂ ਵੀ ਬਚਾਏਗੀ।

ਜਦੋਂ ਵੀ ਗੁੰਨਿਆ ਹੋਇਆ ਆਟਾ ਡੱਬੇ ਵਿੱਚ ਰੱਖਣਾ ਹੋਵੇ, ਤਾਂ ਹਮੇਸ਼ਾ ਉਸਨੂੰ ਏਅਰ ਟਾਈਟ ਕੰਟੇਨਰ ਵਿੱਚ ਹੀ ਰੱਖੋ।

ਇਸ ਤਰੀਕੇ ਨਾਲ ਫਰਿੱਜ ਦੀ ਠੰਡੀ ਹਵਾ ਆਟੇ ਵਿੱਚ ਦਾਖਲ ਨਹੀਂ ਹੋ ਸਕਦੀ। ਇਹ ਨਾ ਸਿਰਫ਼ ਆਟੇ ਨੂੰ ਸਖਤ ਹੋਣ ਤੋਂ ਬਚਾਉਂਦਾ ਹੈ, ਸਗੋਂ ਕਾਲਾ ਪੈਣ ਤੋਂ ਵੀ ਰੋਕਦਾ ਹੈ।

ਜੇ ਤੁਸੀਂ ਰੋਟੀ ਬਣਾਉਣ ਲਈ ਗੁੰਨਿਆ ਹੋਇਆ ਆਟਾ ਫਰਿੱਜ 'ਚ ਰੱਖਣਾ ਚਾਹੁੰਦੇ ਹੋ, ਤਾਂ ਆਟੇ ਨੂੰ ਨਾ ਤਾਂ ਬਹੁਤ ਸਖਤ ਅਤੇ ਨਾ ਹੀ ਬਹੁਤ ਨਰਮ ਗੁੰਨੋ।

ਕਿਉਂਕਿ ਜਦੋਂ ਤੁਸੀਂ ਨਰਮ ਆਟੇ ਨੂੰ ਫਰਿੱਜ ਤੋਂ ਕੱਢ ਕੇ ਵਰਤੋਗੇ, ਤਾਂ ਉਹ ਚਿਪਚਿਪਾ ਹੋ ਜਾਂਦਾ ਹੈ ਅਤੇ ਰੋਟੀ ਬਣਾਉਣ ਵਿੱਚ ਮੁਸ਼ਕਲ ਆਉਂਦੀ ਹੈ। ਇਸ ਲਈ ਆਟਾ ਥੋੜ੍ਹਾ ਨਰਮ ਪਰ ਥੋੜ੍ਹਾ ਸਖਤ ਹੀ ਗੁੰਨੋ, ਤਾਂ ਜੋ ਰੋਟੀਆਂ ਚੰਗੀਆਂ ਬਣ ਸਕਣ।

ਜੇ ਤੁਸੀਂ ਆਟੇ ਨੂੰ ਸਖਤ ਹੋਣ ਜਾਂ ਕਾਲਾ ਪੈਣ ਤੋਂ ਬਚਾਉਣਾ ਚਾਹੁੰਦੇ ਹੋ, ਤਾਂ ਤੁਸੀਂ ਗੁੰਨੇ ਹੋਏ ਆਟੇ ਨੂੰ ਐਲੂਮੀਨੀਅਮ ਫੋਇਲ ਵਿੱਚ ਲਪੇਟ ਕੇ ਵੀ ਰੱਖ ਸਕਦੇ ਹੋ।

ਇਹ ਤਰੀਕਾ ਆਟੇ ਨੂੰ ਨਰਮ ਰੱਖਣ ਵਿੱਚ ਮਦਦ ਕਰਦਾ ਹੈ।

ਜਦੋਂ ਤੁਸੀਂ ਫ੍ਰੀਜ਼ਰ ਤੋਂ ਆਟਾ ਕੱਢੋ, ਤਾਂ ਸਿੱਧਾ ਰੋਟੀ ਨਾ ਬਣਾਉ, ਪਹਿਲਾਂ ਆਟੇ ਨੂੰ ਵਧੀਆ ਤਰੀਕੇ ਨਾਲ ਫੇਰ ਤੋਂ ਗੁੰਨ ਲਵੋ, ਤਾਂ ਜੋ ਆਟਾ ਪੂਰੀ ਤਰ੍ਹਾਂ ਨਰਮ ਹੋ ਜਾਏ।

ਇਸ ਤੋਂ ਬਾਅਦ ਸਾਰੇ ਆਟੇ ਦੀਆਂ ਲੋਈਆਂ ਬਣਾਕੇ ਰੱਖ ਲਵੋ ਅਤੇ ਰੋਟੀ ਬਣਾਉਣ ਸਮੇਂ ਹਰ ਲੋਈ ਨੂੰ ਹੱਥਾਂ ਨਾਲ ਥੋੜ੍ਹਾ ਜਿਹਾ ਘੁੰਮਾ ਲਵੋ।

ਇਸ ਤਰੀਕੇ ਨਾਲ ਰੋਟੀਆਂ ਨਰਮ ਅਤੇ ਸਫੈਦ ਬਣਦੀਆਂ ਹਨ।