Income Tax Refund: ਆਮਦਨ ਕਰ ਵਿਭਾਗ (Income Tax Department ) ਵਿੱਤੀ ਸਾਲ 2022-23 ਅਤੇ ਮੁਲਾਂਕਣ ਸਾਲ 2023-24 ਲਈ ਲਗਾਤਾਰ ਰਿਫੰਡ ਜਾਰੀ ਕਰ ਰਿਹਾ ਹੈ। ਹੁਣ ਵਿਭਾਗ ਆਈਟੀ ਰਿਫੰਡ ਲਈ ਸਮਾਂ ਸੀਮਾ ਵਿੱਚ ਵੱਡੇ ਬਦਲਾਅ ਕਰਨ ਜਾ ਰਿਹਾ ਹੈ। ਬਿਜ਼ਨਸ ਸਟੈਂਡਰਡ ਵਿੱਚ ਪ੍ਰਕਾਸ਼ਿਤ ਹੋਈ ਇੱਕ ਰਿਪੋਰਟ ਦੇ ਅਨੁਸਾਰ, ਮਾਲ ਵਿਭਾਗ ਰਿਫੰਡ (Revenue Department Refund) ਜਾਰੀ ਕਰਨ ਦੀ ਪ੍ਰਕਿਰਿਆ ਨੂੰ ਤੇਜ਼ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ ਅਤੇ ਇਸ ਨੂੰ 16 ਦਿਨਾਂ ਤੋਂ ਘਟਾ ਕੇ 10 ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਦੱਸਣਯੋਗ ਹੈ ਕਿ ਵਿਭਾਗ ਇਸ ਪ੍ਰਕਿਰਿਆ ਨੂੰ ਚਾਲੂ ਵਿੱਤੀ ਸਾਲ ਵਿੱਚ ਮਾਰਚ ਤੱਕ ਲਾਗੂ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਅਜਿਹੇ 'ਚ IT ਵਿਭਾਗ ਦੇ ਫੈਸਲੇ ਦਾ ਸਿੱਧਾ ਅਸਰ ਟੈਕਸਦਾਤਾਵਾਂ 'ਤੇ ਪਵੇਗਾ ਅਤੇ ਉਨ੍ਹਾਂ ਨੂੰ ITR ਫਾਈਲ ਕਰਨ ਦੇ 10 ਦਿਨਾਂ 'ਚ ਹੀ ਰਿਫੰਡ ਮਿਲੇਗਾ।
ਹੁਣ ਤੱਕ ਜਾਰੀ ਹੋਇਆ ਇੰਨਾ ਰਿਫੰਡ
ਇਨਕਮ ਟੈਕਸ ਵਿਭਾਗ ਵੱਲੋਂ ਜਾਰੀ ਕੀਤੇ ਗਏ ਅੰਕੜਿਆਂ ਅਨੁਸਾਰ 1 ਅਪ੍ਰੈਲ ਤੋਂ 21 ਅਗਸਤ 2023 ਦਰਮਿਆਨ ਆਈਟੀ ਵਿਭਾਗ ਨੇ ਕੁੱਲ 72,215 ਕਰੋੜ ਰੁਪਏ ਦਾ ਰਿਫੰਡ ਜਾਰੀ ਕੀਤਾ ਹੈ। ਇਸ ਵਿੱਚੋਂ ਕੰਪਨੀਆਂ ਨੂੰ 37,775 ਕਰੋੜ ਰੁਪਏ ਦਾ ਰਿਫੰਡ ਤੇ ਵਿਅਕਤੀਗਤ ਟੈਕਸਦਾਤਾਵਾਂ ਨੂੰ 34,406 ਕਰੋੜ ਰੁਪਏ ਦਾ ਰਿਫੰਡ ਜਾਰੀ ਕੀਤਾ ਗਿਆ ਹੈ। ਰਿਫੰਡ ਜਾਰੀ ਕਰਨ ਤੋਂ ਬਾਅਦ, ਆਈਟੀ ਵਿਭਾਗ ਕੋਲ 5.88 ਲੱਖ ਕਰੋੜ ਰੁਪਏ ਦਾ ਟੈਕਸ ਇਕੱਠਾ ਹੋਇਆ ਹੈ।
ਟੈਕਸਦਾਤਾਵਾਂ ਨੂੰ ਹੋਵੇਗਾ ਫਾਇਦਾ
ਬਿਜ਼ਨਸ ਸਟੈਂਡਰਡ 'ਚ ਪ੍ਰਕਾਸ਼ਿਤ ਰਿਪੋਰਟ ਮੁਤਾਬਕ ਇਸ ਮਾਮਲੇ 'ਤੇ ਜਾਣਕਾਰੀ ਦਿੰਦੇ ਹੋਏ ਇਕ ਸੀਨੀਅਰ ਅਧਿਕਾਰੀ ਨੇ ਕਿਹਾ, ਇਸ ਫੈਸਲੇ ਤੋਂ ਬਾਅਦ ਸਾਨੂੰ ਉਮੀਦ ਹੈ ਕਿ ITR ਪ੍ਰੋਸੈਸਿੰਗ 'ਚ ਘੱਟ ਸਮਾਂ ਲੱਗੇਗਾ ਤੇ ਜਲਦ ਤੋਂ ਜਲਦ ਰਿਫੰਡ ਜਾਰੀ ਕੀਤਾ ਜਾ ਸਕੇਗਾ। ਇਸ ਨਾਲ ਹੀ ਉਨ੍ਹਾਂ ਦੱਸਿਆ ਕਿ ਹੁਣ ਰਿਫੰਡ ਜਾਰੀ ਕਰਨ ਦੀ ਪ੍ਰਕਿਰਿਆ ਪੂਰੀ ਤਰ੍ਹਾਂ ਇਲੈਕਟ੍ਰਾਨਿਕ ਹੋ ਗਈ ਹੈ। ਅਜਿਹੇ 'ਚ ਇਨਕਮ ਟੈਕਸ ਵਿਭਾਗ ਬਿਨਾਂ ਕਿਸੇ ਪਰੇਸ਼ਾਨੀ ਦੇ ਆਸਾਨੀ ਨਾਲ ਰਿਫੰਡ ਦੇਣ 'ਚ ਸਮਰੱਥ ਹੈ।
ਕਿਵੇਂ ਕਰੀਏ ਰਿਫੰਡ ਸਥਿਤੀ ਦੀ ਜਾਂਚ-
ਜੇ ਤੁਸੀਂ ਵੀ ਆਪਣੀ ਇਨਕਮ ਟੈਕਸ ਰਿਫੰਡ ਸਥਿਤੀ ਜਾਣਨਾ ਚਾਹੁੰਦੇ ਹੋ, ਤਾਂ ਸਭ ਤੋਂ ਪਹਿਲਾਂ ਇਨਕਮ ਟੈਕਸ ਵਿਭਾਗ ਦੇ ਈ-ਫਾਈਲਿੰਗ ਪੋਰਟਲ 'ਤੇ ਜਾਓ। ਇੱਥੇ ਆਪਣੀ ਯੂਜ਼ਰ ਆਈਡੀ ਜਿਵੇਂ ਕਿ ਪੈਨ ਨੰਬਰ ਅਤੇ ਪਾਸਵਰਡ ਦਰਜ ਕਰੋ। ਲੌਗਇਨ ਕਰਨ ਤੋਂ ਬਾਅਦ, ਮਾਈ ਅਕਾਉਂਟ ਵਿਕਲਪ 'ਤੇ ਜਾਓ ਅਤੇ ਰਿਫੰਡ ਸਥਿਤੀ 'ਤੇ ਕਲਿੱਕ ਕਰੋ। ਆਪਣਾ ਪੈਨ ਨੰਬਰ, ਮੁਲਾਂਕਣ ਸਾਲ ਦਰਜ ਕਰਕੇ ਜਾਂਚ ਕਰੋ। ਤੁਹਾਨੂੰ ਰਿਫੰਡ ਸਥਿਤੀ ਬਾਰੇ ਤੁਰੰਤ ਜਾਣਕਾਰੀ ਮਿਲੇਗੀ।