Inderjit Nikku Enjoys 5911 Pizza In Adelaide: ਪੰਜਾਬੀ ਗਾਇਕ ਇੰਦਰਜੀਤ ਨਿੱਕੂ ਇੰਨੀਂ ਪੰਜਾਬੀ ਇੰਡਸਟਰੀ ‘ਚ ਆਪਣੀ ਦੂਜੀ ਪਾਰੀ ਦਾ ਆਨੰਦ ਮਾਣਦੇ ਨਜ਼ਰ ਆ ਰਹੇ ਹਨ। ਨਿੱਕੂ ਦੇ ਇੱਕ ਤੋਂ ਬਾਅਦ ਇੱਕ ਨਵੇਂ ਗੀਤ ਆ ਰਹੇ ਹਨ। ਹੁਣ ਗਾਇਕ ਆਸਟਰੇਲੀਆ ਦੀ ਸਰਜ਼ਮੀਨ ‘ਤੇ ਪਹੁੰਚਿਆ ਹੈ। ਦਰਅਸਲ, 12 ਨਵੰਬਰ ਨੂੰ ਐਡੀਲੇਡ ‘ਚ ਨਿੱਕੂ ਦਾ ਮਿਊਜ਼ਿਕ ਕੰਸਰਟ ਹੈ। ਜਿਸ ਕਰਕੇ ਨਿੱਕੂ ਆਪਣੇ ਪਰਿਵਾਰ ਸਮੇਤ ਇੱਥੇ ਪਹੁੰਚੇ ਹਨ। ਇਸ ਤੋਂ ਬਾਅਦ ਨਿੱਕੂ ਨੇ ਇੰਸਟਾਗ੍ਰਾਮ ‘ਤੇ ਲਾਈਵ ਹੋ ਕੇ ਆਪਣੇ ਫ਼ੈਨਜ਼ ਦਾ ਧੰਨਵਾਦ ਕੀਤਾ।
ਇਸ ਦੌਰਾਨ ਇੰਦਰਜੀਤ ਨਿੱਕੂ ਐਡੀਲੇਡ ਦੇ ਇੱਕ ਪੰਜਾਬੀ ਰੈਸਟੋਰੈਂਟ ‘ਚ ਬੈਠੇ ਨਜ਼ਰ ਆਏ। ਲਾਈਵ ਦੌਰਾਨ ਨਿੱਕੂ ਦੇ 5911 ਪੀਜ਼ੇ ਨੇ ਸਭ ਦਾ ਧਿਆਨ ਆਪਣੇ ਵੱਲ ਖਿੱਚ ਲਿਆ। ਨਿੱਕੂ ਨੇ ਦੱਸਿਆ ਕਿ ਐਡੀਲੇਡ ਦੇ ਸੈਕਟਰ-17 ਵਿਖੇ ਇੱਕ ਪੰਜਾਬੀ ਹੋਟਲ ਹੈ, ਜਿਸ ਵਿੱਚ 5911 ਪੀਜ਼ਾ ਮਿਲਦਾ ਹੈ, ਜਿਸ ਦਾ ਸਵਾਦ ਬਹੁਤ ਲਾਜਵਾਬ ਹੁੰਦਾ ਹੈ। ਆਪਣੇ ਲਾਈਵ ਦੌਰਾਨ ਨਿੱਕੂ ਨੇ 5911 ਪੀਜ਼ੇ ਦੀਆਂ ਤਸਵੀਰਾਂ ਵੀ ਦਿਖਾਈਆਂ। ਉਨ੍ਹਾਂ ਨੇ ਦੱਸਿਆ ਕਿ ਸਾਈਜ਼ ‘ਚ ਕਾਫ਼ੀ ਵੱਡਾ ਤੇ ਖਾਣ ‘ਚ ਲਜ਼ੀਜ਼ ਇਹ ਪੀਜ਼ਾ ਸਭ ਨੂੰ ਇੱਕ ਵਾਰ ਜ਼ਰੂਰ ਟੇਸਟ ਕਰਨਾ ਚਾਹੀਦਾ ਹੈ। ਇਹ ਪੀਜ਼ਾ ਸਿੱਧੂ ਮੂਸੇਵਾਲਾ ਦੀ ਯਾਦ ‘ਚ ਬਣਾਇਆ ਜਾਂਦਾ ਹੈ।
ਪੀਜ਼ਾ ਖਾਣ ਦੌਰਾਨ ਨਿੱਕੂ ਮੂਸੇਵਾਲਾ ਨੂੰ ਯਾਦ ਕਰ ਕਾਫ਼ੀ ਭਾਵੁਕ ਹੋ ਗਏ। ਉਨ੍ਹਾਂ ਕਿਹਾ ਕਿ ਮੂਸੇਵਾਲਾ ਵਰਗਾ ਕੋਈ ਦੂਜਾ ਗਾਇਕ ਨਹੀਂ ਆਉਣਾ। ਉਹ ਆਪਣੇ ਗੀਤਾਂ ਰਾਹੀਂ ਜੱਗ ‘ਤੇ ਅਮਰ ਹੋ ਗਿਆ। ਹਾਲੇ ਵੀ ਉਸ ਦੇ ਮਰਨ ਤੋਂ ਬਾਅਦ ਕਈ ਗਾਣੇ ਪੈਂਡਿੰਗ ਹਨ। ਉਸ ਦੇ ਫ਼ੈਨਜ਼ ਮੂਸੇਵਾਲਾ ਦੇ ਗਾਣੇ ਰਿਲੀਜ਼ ਹੋਣ ਦਾ ਇੰਤਜ਼ਾਰ ਕਰ ਰਹੇ ਹਨ। ਦੇਖੋ ਨਿੱਕੂ ਦਾ ਵੀਡੀਓ
ਕਾਬਿਲੇਗ਼ੌਰ ਹੈ ਕਿ ਇੰਦਰਜੀਤ ਨਿੱਕੂ ਦਾ ਅਗਸਤ ਮਹੀਨੇ ‘ਚ ਇੱਕ ਵੀਡੀਓ ਕਾਫ਼ੀ ਵਾਇਰਲ ਹੋਇਆ ਸੀ। ਇਸ ਵੀਡੀਓ ‘ਚ ਨਿੱਕੂ ਇੱਕ ਬਾਬੇ ਦੇ ਦਰਬਾਰ ‘ਚ ਆਪਣੀ ਪਤਨੀ ਨਾਲ ਨਜ਼ਰ ਆਏ ਸੀ। ਉਹ ਆਪਣੀਆਂ ਸਮੱਸਿਆਵਾਂ ਲੈਕੇ ਬਾਬੇ ਦੇ ਦਰਬਾਰ ਪਹੁੰਚੇ ਸੀ। ਇਸ ਦੌਰਾਨ ਬਾਬੇ ਨੂੰ ਆਪਣੀਆਂ ਸਮੱਸਿਆ ਸੁਣਾਉਂਦੇ ਹੋਏ ਨਿੱਕੂ ਕਾਫ਼ੀ ਭਾਵੁਕ ਹੋ ਗਏ ਸੀ। ਇਹ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਸਭ ਨੂੰ ਪਤਾ ਲੱਗਿਆ ਸੀ ਕਿ ਨਿੱਕੂ ਬੁਰੇ ਦੌਰ ਵਿੱਚੋਂ ਲੰਘ ਰਹੇ ਹਨ। ਇਸ ਤੋਂ ਬਾਅਦ ਪੂਰਾ ਪੰਜਾਬ ਅਤੇ ਨਾਲ ਨਾਲ ਪੰਜਾਬੀ ਇੰਡਸਟਰੀ ਵੀ ਨਿੱਕੂ ਦੇ ਸਮਰਥਨ ‘ਚ ਅੱਗੇ ਆਈ ਸੀ।