ਨਵੀਂ ਦਿੱਲੀ: ਸ਼੍ਰੋਮਣੀ ਅਕਾਲੀ ਦਲ ਦੀ ਸੰਸਦ ਮੈਂਬਰ ਅਤੇ ਸਾਬਕਾ ਮੰਤਰੀ ਹਰਸਿਮਰਤ ਕੌਰ ਬਾਦਲ ਨੇ ਸੰਸਦ ਵਿੱਚ ਕਿਸਾਨਾਂ ਦਾ ਮੁੱਦਾ ਚੁੱਕਿਆ। ਉਨ੍ਹਾਂ ਕਿਹਾ ਕਿ ਸਰਕਾਰ ਸੁਣਨਾ ਨਹੀਂ ਚਾਹੁੰਦੀ, ਅਸੀਂ ਅਡਜਰਨਮੈਂਟ ਮੋਸ਼ਨ ਦਿੰਦੇ ਹਾਂ ਕਿ ਕਿਸਾਨਾਂ 'ਤੇ ਚਰਚਾ ਕੀਤੀ ਜਾਵੇ, ਕਿਸਾਨਾਂ ਦੀ ਗੱਲ ਸੁਣੀ ਜਾਵੇ। ਪਰ ਇਹ ਸਰਕਾਰ ਆਪਣੀ ਤਾਕਤ ਵਿਚ ਹੈ। ਦੇਸ਼ ਵਿਚ ਕਿਸੇ ਦੀ ਕੋਈ ਸੁਣਵਾਈ ਨਹੀਂ ਹੋ ਰਹੀ। ਮੈਂ ਦੂਸਰੀਆਂ ਵਿਰੋਧੀ ਪਾਰਟੀਆਂ ਨਾਲ ਵੀ ਗੱਲ ਕੀਤੀ ਹੈ ਅਤੇ ਮਾਰੇ ਗਏ ਕਿਸਾਨਾਂ ਲਈ ਜੇਪੀਸੀ ਬਣਾਉਣ ਦੀ ਗੱਲ ਕੀਤੀ ਹੈ।
ਹਰਸਿਮਰਤ ਬਾਦਲ ਨੇ ਕਿਹਾ ਮੈਂ ਵਿਰੋਧੀ ਪਾਰਟੀਆਂ ਦੇ ਸੰਸਦ ਮੈਂਬਰਾਂ ਨੂੰ ਅਪੀਲ ਕਰਦੀ ਹਾਂ ਕਿ ਜੇ ਤੁਸੀਂ ਲੋਕ ਅੱਗੇ ਵੱਧਦੇ ਹੋ ਤਾਂ ਅਸੀਂ ਵੀ ਤੁਹਾਡੇ ਮਗਰ ਲੱਗਣ ਲਈ ਤਿਆਰ ਹਾਂ। ਪਰ ਅੰਨਦਾਤਾ ਦੀ ਆਵਾਜ਼ ਸੁਣੋ। ਅੰਨਦਾਤਾ ਪਿਛਲੇ 8 ਮਹੀਨਿਆਂ ਤੋਂ ਸੜਕਾਂ 'ਤੇ ਹੈ। ਪਰ ਇਹ ਸਰਕਾਰ ਇਹ ਸੁਣਨ ਲਈ ਸਹਿਮਤ ਨਹੀਂ ਹੈ ਕਿ ਅਜਿਹਾ ਲੱਗਦਾ ਹੈ ਕਿ ਅਸੀਂ ਕਿਤੇ ਚੀਨ ਤਾਂ ਨਹੀਂ ਬਣਨ ਜਾ ਰਹੇ, ਜਿਥੇ ਹਰ ਕਿਸੇ ਦੀ ਆਵਾਜ਼ ਨੂੰ ਦਬਾ ਦਿੱਤਾ ਜਾਂਦਾ ਹੈ। ਸਾਡੀ ਪਾਰਟੀ ਦਾ ਦਰਵਾਜਾ ਦਿੱਲੀ ਤੋਂ ਨਹੀਂ ਚਲਦਾ। ਅਸੀਂ ਦੋ ਲੋਕ ਹੋ ਸਕਦੇ ਹਾਂ ਪਰ ਅਸੀਂ ਨਿਰੰਤਰ ਆਪਣੀ ਆਵਾਜ਼ ਬੁਲੰਦ ਕਰ ਰਹੇ ਹਾਂ ਅਤੇ ਨਾ ਹੀ ਮੈਂ ਕੋਈ ਡਰਾਮਾ ਕਰਨਾ ਚਾਹੁੰਦੀ ਹਾਂ ਜਿਵੇਂ ਕੁਝ ਲੋਕ ਘਰ ਦੇ ਅੰਦਰ ਸੌਣ ਦਾ ਦਿਖਾਵਾ ਕਰਦੇ ਸਨ।
ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ ਸਮੇਤ 8 ਰਾਜਨੀਤਿਕ ਪਾਰਟੀਆਂ ਦੇ ਨਾਲ ਮਿਲ ਕੇ 31 ਤਰੀਕ ਨੂੰ 12 ਵਜੇ ਰਾਸ਼ਟਰਪਤੀ ਨਾਲ ਮੁਲਾਕਾਤ ਕਰਾਂਗੇ। ਇਹੀ ਗੱਲ ਉਨ੍ਹਾਂ ਨੇ ਕਾਂਗਰਸ ਦੀ ਸੰਸਦ ਰਵਨੀਤ ਸਿੰਘ ਬਿੱਟੂ ਬਾਰੇ ਕਹੀ ਕਿ ਜਿਸ ਨੇ ਸੰਸਦ ਭਵਨ ਵਿਚ ਰਾਤ ਕੱਟਣ ਦਾ ਡਰਾਮਾ ਕੀਤਾ, ਉਹ 8 ਵਜੇ ਫੋਟੋਆਂ ਖਿੱਚ ਕੇ ਆਪਣੇ ਘਰ ਚਲੇ ਗਏ। ਵਿਰੋਧੀ ਧਿਰ ਦੇ ਸਭ ਤੋਂ ਜ਼ਿਆਦਾ ਸਾਂਸਦ ਕਾਂਗਰਸ ਦੇ ਹਨ, ਪਰ ਕਿਸਾਨਾਂ ਲਈ ਪ੍ਰਦਰਸ਼ਨ ਸਿਰਫ ਪੰਜਾਬ ਕਾਂਗਰਸ ਦੇ ਸਾਂਸਦ ਹੀ ਕਰਦੇ ਹਨ। ਕਾਂਗਰਸ ਆਪਣੇ ਖੁਦ ਦੇ ਸੰਸਦ ਮੈਂਬਰ ਇਕੱਠੇ ਕਰਨ ਦੇ ਯੋਗ ਨਹੀਂ ਹੈ।