ਨਵੀਂ ਦਿੱਲੀ: ਏਅਰਕ੍ਰਾਫਟ ਐਕਸੀਡੈਂਟ ਇਨਵੈਸਟੀਗੇਸ਼ਨ ਬਿਊਰੋ (ਏਏਆਈਬੀ) ਦੀ ਇੱਕ ਰਿਪੋਰਟ 'ਚ ਹੈਰਾਨ ਕਰਨ ਵਾਲਾ ਖੁਲਾਸਾ ਹੋਇਆ ਹੈ। ਰਿਪੋਰਟ ਅਨੁਸਾਰ ਏਅਰ ਏਸ਼ੀਆ ਇੰਡੀਆ ਦੀ ਅਹਿਮਦਾਬਾਦ-ਚੇਨਈ ਫਲਾਈਟ ਤੇ ਇੰਡੀਗੋ ਦੀ ਬੰਗਲੁਰੂ-ਵਡੋਦਰਾ ਫਲਾਈਟ 29 ਜਨਵਰੀ ਨੂੰ ਇੱਕ-ਦੂਜੇ ਨਾਲ ਟਕਰਾਉਣ ਤੋਂ ਵਾਲ-ਵਾਲ ਬਚੇ ਸਨ। ਦੋਵੇਂ ਜਹਾਜ਼ 8 ਕਿਲੋਮੀਟਰ ਦੇ ਘੇਰੇ 'ਚ ਆ ਗਏ ਸਨ। ਮੁੰਬਈ ਹਵਾਈ ਖੇਤਰ ਦੇ ਉੱਪਰ ਉਨ੍ਹਾਂ ਦੀ ਲੰਬਕਾਰੀ ਦੂਰੀ 300 ਫੁੱਟ ਤਕ ਰਹਿ ਗਈ ਸੀ।
ਇਸੇ ਮਹੀਨੇ ਜਾਰੀ ਕੀਤੀ ਗਈ ਜਾਂਚ ਰਿਪੋਰਟ ਅਨੁਸਾਰ ਇਸ 'ਗੰਭੀਰ ਚੂਕ' ਦਾ ਸੰਭਾਵੀ ਕਾਰਨ ਏਅਰ ਟ੍ਰੈਫਿਕ ਕੰਟਰੋਲਰ ਦੀ ਸਥਿਤੀ ਬਾਰੇ ਜਾਗਰੂਕਤਾ ਦੀ ਘਾਟ ਸੀ। ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਇੱਕ ਹੋਰ ਸੰਭਵ ਕਾਰਨ ਇਹ ਸੀ ਕਿ ਮੁੰਬਈ ਹਵਾਈ ਅੱਡੇ 'ਤੇ ਸਥਿਤੀ ਦਾ ਮੁਲਾਂਕਣ ਕੰਟਰੋਲਰ ਦੁਆਰਾ ਪਹਿਲਾਂ ਤੋਂ ਮਨ 'ਚ ਕੋਈ ਵਿਚਾਰ ਬਣਾ ਕੇ ਕੀਤਾ ਗਿਆ ਸੀ।
ਘਟਨਾ ਦਾ ਹਵਾਲਾ ਦਿੰਦੇ ਹੋਏ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਅਹਿਮਦਾਬਾਦ ਤੋਂ ਦੱਖਣ ਭਾਰਤ ਲਈ ਜ਼ਿਆਦਾਤਰ ਉਡਾਣਾਂ ਭਾਵਨਗਰ ਦੇ ਉੱਤੇ ਹੋ ਕੇ ਜਾਂਦੀਆਂ ਹਨ। ਹਾਲਾਂਕਿ 29 ਜਨਵਰੀ ਨੂੰ ਏਅਰ ਏਸ਼ੀਆ ਇੰਡੀਆ ਦੀ ਉਡਾਣ ਆਮ ਤੌਰ 'ਤੇ ਮੁੰਬਈ ਹਵਾਈ ਅੱਡੇ 'ਤੇ ਉਤਰਨ ਵਾਲੇ ਜਹਾਜ਼ਾਂ ਦੁਆਰਾ ਵਰਤੀ ਜਾਂਦੀ ਸੀ।
ਰੂਟ ਬਦਲਣ ਕਾਰਨ ਬਣਿਆ ਸੀ ਖਤਰਾ
ਏਅਰ ਏਸ਼ੀਆ ਇੰਡੀਆ ਦੇ ਜਹਾਜ਼ਾਂ ਦੁਆਰਾ ਰੂਟ 'ਚ ਬਦਲਾਅ ਅਤੇ ਇੰਡੀਗੋ ਦੀ ਉਡਾਣ ਸਿੱਧੇ ਰੂਟ 'ਤੇ ਹੋਣ ਕਾਰਨ ਇਹ ਹਾਲਾਤ ਪੈਦਾ ਹੋਏ ਸਨ। ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਜਦੋਂ ਕਾਫ਼ੀ ਦੂਰੀ ਬਣੀ ਹੋਈ ਸੀ, ਏਅਰ ਟ੍ਰੈਫਿਕ ਕੰਟਰੋਲਰ ਦੀ ਸਵੈਚਾਲਤ ਪ੍ਰਣਾਲੀ ਨੇ ਭਵਿੱਖਬਾਣੀ ਕਰਨ ਵਾਲੀ ਚੇਤਾਵਨੀ ਜਾਰੀ ਕੀਤੀ।
ਹਾਲਾਂਕਿ ਕੰਟਰੋਲਰ ਨੇ ਵਿਜੁਅਲ ਅਨੁਮਾਨਤ ਚੇਤਾਵਨੀ ਵੱਲ ਧਿਆਨ ਨਹੀਂ ਦਿੱਤਾ। ਇਸ 'ਚ ਅੱਗੇ ਕਿਹਾ ਗਿਆ ਹੈ ਕਿ ਕੰਟਰੋਲਰ ਆਪਣੇ ਪਿਛਲੇ ਤਜ਼ਰਬੇ ਦੇ ਆਧਾਰ 'ਤੇ ਇਹ ਮੰਨ ਰਿਹਾ ਸੀ ਕਿ ਏਅਰ ਏਸ਼ੀਆ ਇੰਡੀਆ ਦੀ ਉਡਾਣ ਭਾਵਨਗਰ ਤੋਂ ਆਪਣੇ ਆਮ ਮਾਰਗ 'ਤੇ ਸੀ। ਇਸ ਲਈ ਕੰਟਰੋਲਰ ਨੇ ਸੋਚਿਆ ਕਿ ਏਅਰ ਏਸ਼ੀਆ ਇੰਡੀਆ ਦੀ ਉਡਾਣ ਇੰਡੀਗੋ ਦੀ ਉਡਾਣ ਦੇ ਬਹੁਤ ਨੇੜੇ ਨਹੀਂ ਹੈ।
ਇੰਝ ਟਲਿਆ ਹਾਦਸਾ
ਜਦੋਂ ਕੰਟਰੋਲਰ ਨੂੰ ਸਥਿਤੀ ਦਾ ਅਹਿਸਾਸ ਹੋਇਆ, ਏਅਰ ਏਸ਼ੀਆ ਇੰਡੀਆ ਦੀ ਉਡਾਣ 38,008 ਫੁੱਟ ਦੀ ਉਚਾਈ 'ਤੇ ਪਹੁੰਚ ਚੁੱਕੀ ਸੀ, ਜਦਕਿ ਇੰਡੀਗੋ ਦੀ ਉਡਾਣ 38,000 ਫੁੱਟ ਦੀ ਉਚਾਈ 'ਤੇ ਉੱਡ ਰਹੀ ਸੀ। ਏਅਰ ਏਸ਼ੀਆ ਇੰਡੀਆ ਦੀ ਉਡਾਣ ਉੱਚੀ ਹੋ ਗਈ, ਕਿਉਂਕਿ ਇਸ ਦੇ ਟ੍ਰੈਫਿਕ ਟਕਰਾਅ ਤੋਂ ਬਚਣ ਦੀ ਪ੍ਰਣਾਲੀ (ਟੀਸੀਏਐਸ) ਨੇ ਪਾਇਲਟਾਂ ਨੂੰ ਚੇਤਾਵਨੀ ਜਾਰੀ ਕੀਤੀ। ਇਸ ਦੇ ਨਾਲ ਹੀ ਇੰਡੀਗੋ ਦੀ ਉਡਾਣ 38,000 ਫੁੱਟ ਦੀ ਉਚਾਈ 'ਤੇ ਬਣੀ ਰਹੀ।