ਮੋਹਾਲੀ ਦੇ ਮਟੌਰ ਪਿੰਡ ਦੇ ਰਿਹਾਇਸ਼ੀ ਇਲਾਕੇ ਵਿਚ ਮੋਮੋਜ਼ ਅਤੇ ਨੂਡਲਜ਼ ਬਣਾਉਣ ਵਾਲੀ ਇੱਕ ਐਸੀ ਫੈਕਟਰੀ ਬੇਨਕਾਬ ਹੋਈ ਹੈ, ਜਿੱਥੇ ਬਾਥਰੂਮ ਅਤੇ ਗੰਦਗੀ ਵਿਚ ਹੀ ਮੋਮੋਜ਼, ਨੂਡਲਜ਼ ਅਤੇ ਹੋਰ ਖਾਣ-ਪੀਣ ਦੀਆਂ ਚੀਜ਼ਾਂ ਤਿਆਰ ਕੀਤੀਆਂ ਜਾਂਦੀਆਂ ਸਨ। ਫੈਕਟਰੀ ਦੇ ਫ੍ਰਿਜ 'ਚੋਂ ਇੱਕ ਜਾਨਵਰ ਦਾ ਸਿਰ ਵੀ ਮਿਲਿਆ ਹੈ, ਜੋ ਕਿ ਪੱਗ ਕੁੱਤੇ ਵਰਗਾ ਲੱਗ ਰਿਹਾ ਹੈ। ਇਸ ਵੀਡੀਓ ਤੋਂ ਬਾਅਦ ਲੋਕਾਂ ਦੇ ਵਿੱਚ ਸਹਿਮ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ।
ਫੈਕਟਰੀ ਦੇ ਲੋਕ ਹੋਏ ਫਰਾਰ
ਹਾਲਾਂਕਿ, ਸਿਹਤ ਵਿਭਾਗ ਦੀਆਂ ਟੀਮਾਂ ਨੇ ਸਾਰੀਆਂ ਚੀਜ਼ਾਂ ਦੇ ਸੈਂਪਲ ਲੈ ਕੇ ਜਾਂਚ ਲਈ ਭੇਜ ਦਿੱਤੇ ਹਨ। ਜਾਨਵਰ ਦਾ ਸਿਰ ਵੀ ਕਬਜ਼ੇ 'ਚ ਲੈ ਲਿਆ ਗਿਆ ਹੈ। ਫੈਕਟਰੀ ਦਾ ਮਾਲਕ ਅਤੇ ਹੋਰ ਸਾਰੇ ਕਰਮਚਾਰੀ ਫਿਲਹਾਲ ਫਰਾਰ ਦੱਸੇ ਜਾ ਰਹੇ ਹਨ। ਇਸ ਮਾਮਲੇ 'ਚ ਪ੍ਰਸ਼ਾਸਨ ਸਖ਼ਤ ਕਾਰਵਾਈ ਦੀ ਤਿਆਰੀ ਵਿਚ ਹੈ।
ਮੋਹਾਲੀ ਦੇ ਸਹਾਇਕ ਖਾਦ ਸੁਰੱਖਿਆ ਕਮਿਸ਼ਨਰ ਡਾ. ਅੰਮ੍ਰਿਤ ਵਾਰਿੰਗ ਨੇ ਦੱਸਿਆ ਕਿ ਫੈਕਟਰੀ ਚਲਾਣ ਵਾਲਿਆਂ ਵਿਰੁੱਧ ਕਾਰਵਾਈ ਲਈ ਪੁਲਿਸ ਨੂੰ ਵੀ ਸੂਚਨਾ ਦੇ ਦਿੱਤੀ ਗਈ ਹੈ। ਸੈਂਪਲ ਭਰੇ ਗਏ ਹਨ ਤੇ ਜਲਦੀ ਹੀ ਰਿਪੋਰਟ ਆਵੇਗੀ।
ਫੈਕਟਰੀ ਦੀ ਵੀਡੀਓ ਸੋਸ਼ਲ ਮੀਡੀਆ ਉੱਤੇ ਵਾਇਰਲ
ਇਹ ਮਾਮਲਾ ਸ਼ਨਿੱਚਰਵਾਰ ਨੂੰ ਤਦ ਸਾਹਮਣੇ ਆਇਆ ਜਦੋਂ ਪਿੰਡ ਵਾਸੀਆਂ ਨੇ ਫੈਕਟਰੀ ਦੀ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ 'ਤੇ ਵਾਇਰਲ ਕਰ ਦਿੱਤੀ। ਇਸ ਤੋਂ ਬਾਅਦ ਸਿਹਤ ਵਿਭਾਗ ਦੀ ਟੀਮ ਨੇ ਸੁਣਵਾਈ ਲਈ ਖੁਦ ਹੀ ਨੋਟਿਸ ਲੈਂਦੇ ਹੋਏ ਛਾਪਾ ਮਾਰਿਆ ਅਤੇ ਮੌਕੇ 'ਤੇ ਮੌਜੂਦ ਸਮਾਨ ਨੂੰ ਨਸ਼ਟ ਕਰਵਾਇਆ। ਵੀਡੀਓ ਵਿੱਚ ਸਾਫ਼ ਦਿਖਾਈ ਦੇ ਰਿਹਾ ਸੀ ਕਿ ਗੰਦੀ ਗੋਭੀ ਮੋਮੋਜ਼ ਬਣਾਉਣ ਲਈ ਰੱਖੀ ਹੋਈ ਸੀ। ਇਸ ਤੋਂ ਇਲਾਵਾ, ਬਾਥਰੂਮ ਵਿੱਚ ਵੀ ਖਾਣ-ਪੀਣ ਦਾ ਸਮਾਨ ਰੱਖਿਆ ਗਿਆ ਸੀ।
ਫੈਕਟਰੀ ਵਿੱਚ ਗੰਦਾ ਤੇਲ ਵਰਤਿਆ ਜਾ ਰਿਹਾ ਸੀ। ਹਾਲਾਂਕਿ ਪਿੰਡ ਵਾਸੀਆਂ ਨੇ ਇਸ ਕਾਰਵਾਈ ਨੂੰ ਸਿਰਫ਼ ਰਸਮੀ ਦੱਸਿਆ। ਇਸ ਤੋਂ ਬਾਅਦ ਸੋਮਵਾਰ ਨੂੰ ਟੀਮਾਂ ਨੇ ਦੁਬਾਰਾ ਮਟੌਰ ਪਿੰਡ ਪਹੁੰਚ ਕੇ ਤਲਾਸ਼ੀ ਅਭਿਆਨ ਚਲਾਇਆ। ਹਾਲਾਂਕਿ ਬਾਅਦ ਵਿੱਚ ਜਦੋਂ ਲੋਕਾਂ ਨੇ ਖੁਦ ਫ੍ਰਿਜ ਖੋਲ੍ਹਿਆ ਤਾਂ ਇੱਕ ਜਾਨਵਰ ਦਾ ਸਿਰ ਬਰਾਮਦ ਹੋਇਆ। ਹੁਣ ਜ਼ਿਲ੍ਹਾ ਪ੍ਰਸ਼ਾਸਨ ਇਸ ਮਾਮਲੇ ਵਿੱਚ ਸਖ਼ਤ ਕਾਰਵਾਈ ਦੀ ਯੋਜਨਾ ਬਣਾ ਰਿਹਾ ਹੈ।