ਅਸ਼ਰਫ ਢੁੱਡੀ
ਅੱਜ ਜਦੋਂ ਪੀਐਮ ਮੋਦੀ ਨੇ ਖੇਤੀ ਕਾਨੂੰਨ ਵਾਪਸ ਲੈਣ ਦਾ ਐਲਾਨ ਕੀਤਾ ਤਾਂ ਪੂਰੇ ਪੰਜਾਬ 'ਚ ਹਲਚਲ ਮਚ ਗਈ। ਇਕ ਪਾਸੇ ਕਿਸਾਨ ਖੁਸ਼ੀ 'ਚ ਨੱਚਦੇ ਤੇ ਲੱਡੂ ਵੰਡਦੇ ਦੇਖੇ ਗਏ। ਪਰ ਦੂਜੇ ਪਾਸੇ ਜੇਕਰ ਮਾਨਸਾ ਦੇ ਪਰਿਵਾਰ ਦੀ ਗੱਲ ਕਰੀਏ ਤਾਂ ਇਨ੍ਹਾਂ ਨੂੰ ਸ਼ਾਇਦ ਖੇਤੀ ਕਾਨੂੰਨ ਦੇ ਰੱਦ ਹੋਣ 'ਤੇ ਖੁਸ਼ੀ ਹੈ ਪਰ ਇਸ ਸੰਘਰਸ਼ ਦੌਰਾਨ ਇਸ ਪਰਿਵਾਰ ਦੇ ਕਿਸਾਨ ਦੀ ਮੌਤ ਹੋ ਗਈ ਹੈ ਜਿਨ੍ਹਾਂ ਦਾ ਉਨ੍ਹਾਂ ਨੂੰ ਦੁੱਖ ਹੈ।
ਪੰਜਾਬ ਦੇ ਜ਼ਿਲ੍ਹਾ ਮਾਨਸਾ ਦੇ ਪਿੰਡ ਖਿਆਲੀ ਚਹਿਲਾਂ ਦੇ ਕਿਸਾਨ ਧੰਨਾ ਸਿੰਘ ਦਾ ਪਰਿਵਾਰ ਤਰਸਯੋਗ ਹਾਲਾਤ 'ਚ ਜ਼ਿੰਦਗੀ ਬਤੀਤ ਕਰ ਰਿਹਾ ਹੈ। ਧੰਨਾ ਸਿੰਘ 26 ਨਵੰਬਰ 2020 ਨੂੰ ਸੜਕ ਰਾਹੀਂ ਦਿੱਲੀ ਲਈ ਰਵਾਨਾ ਹੋਇਆ ਸੀ। 27 ਨਵੰਬਰ ਨੂੰ ਇਕ ਹਾਦਸੇ 'ਚ ਉਸਦੀ ਮੌਤ ਹੋ ਗਈ ਸੀ। ਧੰਨਾ ਸਿੰਘ ਦੇ ਦੋ ਬੱਚੇ ਹਨ ਤੇ ਇਕ ਵਿਧਵਾ ਪਤਨੀ। ਮ੍ਰਿਤਕ ਕਿਸਾਨ ਦੀ ਪਤਨੀ ਮਨਜੀਤ ਕੌਰ ਨੇ ਦੱਸਿਆ ਕਿ ਇਸ ਅੰਦੋਲਨ 'ਚ ਸੈਂਕੜੇ ਕਿਸਾਨ ਆਪਣੀ ਜਾਨ ਗੁਆ ਚੁੱਕੇ ਹਨ। ਬੱਚਿਆਂ ਦੇ ਸਿਰਾਂ ਤੋਂ ਮਾਪਿਆਂ ਦਾ ਪਰਛਾਵਾਂ ਉੱਠ ਗਿਆ ਹੈ। ਇਸ ਲਈ ਕੌਣ ਜ਼ਿੰਮੇਵਾਰ ਹੈ।
ਜੇਕਰ ਕੇਂਦਰ ਸਰਕਾਰ ਇਸ ਨੂੰ ਪਹਿਲਾਂ ਰੱਦ ਕਰ ਦਿੰਦੀ ਤਾਂ ਸੈਂਕੜੇ ਪਰਿਵਾਰਾਂ 'ਚ ਸੋਗ ਦੀ ਲਹਿਰ ਨਹੀਂ ਸੀ ਹੋਣੀ। ਮਨਜੀਤ ਕੌਰ ਨੇ ਕਿਹਾ ਕਿ ਬੇਸ਼ੱਕ ਪੰਜਾਬ ਸਰਕਾਰ ਨੇ ਦਰਜਾ ਚਾਰ ਦੀ ਨੌਕਰੀ ਦੇ ਕੇ ਪਰਿਵਾਰ ਦਾ ਗੁਜ਼ਾਰਾ ਚਲਾਉਣ ਦੇ ਯੋਗ ਬਣਾਇਆ ਹੈ। ਸਰਕਾਰ ਨੂੰ ਸ਼ਹੀਦ ਕਿਸਾਨਾਂ ਦੇ ਬੱਚਿਆਂ ਦੀ ਉਚੇਰੀ ਸਿੱਖਿਆ ਲਈ ਮਦਦ ਕਰਨੀ ਚਾਹੀਦੀ ਹੈ।
ਬਲਕਾਰ ਸਿੰਘ ਨੇ ਦੱਸਿਆ ਕਿ ਧੰਨਾ ਸਿੰਘ ਕਿਸਾਨ ਅੰਦੋਲਨ 'ਚ ਸ਼ਾਮਲ ਸਨ ਤੇ ਭਾਰਤੀ ਕਿਸਾਨ ਯੂਨੀਅਨ ਡਕੌਂਦਾ 'ਚ ਸਕੱਤਰ ਸਨ। ਉਹ ਅੰਦੋਲਨ ਵਿਚ ਗਏ ਕਿਸਾਨਾਂ ਲਈ ਰਾਸ਼ਨ ਤੇ ਜ਼ਰੂਰੀ ਚੀਜ਼ਾਂ ਲੈ ਕੇ ਦਿੱਲੀ ਗਏ ਸਨ। ਧੰਨਾ ਸਿੰਘ ਇਸ ਅੰਦੋਲਨ ਦੇ ਪਹਿਲੇ ਸ਼ਹੀਦ ਸਨ।
ਇਸ ਅੰਦੋਲਨ ਦੌਰਾਨ ਜ਼ਿਲ੍ਹਾ ਮਾਨਸਾ ਦੇ ਪਿੰਡ ਭੈਣੀ ਬਾਘਾ ਦੀ ਰਹਿਣ ਵਾਲੀ ਕਿਸਾਨ ਔਰਤ ਸੁਖਪਾਲ ਕੋਰ ਦੀ ਵੀ ਮੌਤ ਹੋ ਗਈ। ਉਸਦਾ ਪੂਰਾ ਪਰਿਵਾਰ ਕਿਸਾਨ ਅੰਦੋਲਨ ਨਾਲ ਜੁੜਿਆ ਹੋਇਆ ਹੈ। ਜਦੋਂ ਕਿਸਾਨ ਅੰਦੋਲਨ ਚੱਲ ਰਿਹਾ ਸੀ ਤਾਂ ਮ੍ਰਿਤਕ ਸੁਖਪਾਲ ਕੌਰ ਦਾ ਪੂਰਾ ਪਰਿਵਾਰ ਆਪਣੇ ਘਰ ਨੂੰ ਤਾਲਾ ਲਗਾ ਕੇ ਦਿੱਲੀ ਬਾਰਡਰ ਵੱਲ ਚਲਾ ਗਿਆ ਸੀ। ਮ੍ਰਿਤਕ ਸੁਖਪਾਲ ਕੋਰ ਦੇ ਪਰਿਵਾਰ ਦੇ ਛੇ ਮੈਂਬਰ ਅਜੇ ਵੀ ਕਿਸਾਨ ਅੰਦੋਲਨ 'ਚ ਮੌਜੂਦ ਹਨ। ਜੇਕਰ ਸਰਕਾਰ ਪਹਿਲਾਂ ਕਾਨੂੰਨ ਰੱਦ ਕਰ ਦਿੰਦੀ ਤਾਂ ਸੁਖਪਾਲ ਕੌਰ ਜਿਉਂਦੀ ਹੋਣੀ ਸੀ।