Donald Trump Rally Firing: ਸਾਬਕਾ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਉਪਰ ਤਾਬੜਤੋੜ ਫਾਇਰਿੰਗ ਕਰਨ ਵਾਲੇ ਦੀ ਸਾਰੀ ਜਾਣਕਾਰੀ ਸਾਹਮਣੇ ਆ ਗਈ ਹੈ। ਇਸ ਤੋਂ ਇਲਾਵਾ ਉਸ ਦੀ ਫੋਟੋ ਤੇ ਨਾਂ ਦੀ ਪੁਸ਼ਟੀ ਹੋ ਗਈ ਹੈ। ਡੋਨਾਲਡ ਟਰੰਪ ਉਪਰ ਫਾਇਰਿੰਗ ਕਰਨ ਵਾਲੇ ਦਾ ਨਾਂ ਥਾਮਸ ਮੈਥਿਊ ਕਰੂਕਸ ਸੀ। ਸੁਰੱਖਿਆ ਏਜੰਸੀਆਂ ਅਗਲੀ ਜਾਂਚ ਵਿੱਚ ਜੁੱਟ ਗਈਆਂ ਹਨ।
ਦੱਸ ਦਈਏ ਕਿ ਸ਼ਨੀਵਾਰ ਨੂੰ ਪੈਨਸਿਲਵੇਨੀਆ ਦੇ ਬਟਲਰ ਵਿੱਚ ਸਾਬਕਾ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਰੈਲੀ ਵਿੱਚ ਗੋਲੀਬਾਰੀ ਦੀ ਘਟਨਾ ਵਿੱਚ ਇੱਕ ਵਿਅਕਤੀ ਤੇ ਹਮਲਾਵਰ ਦੀ ਮੌਤ ਹੋ ਗਈ। ਸੀਐਨਐਨ ਨੇ ਸੀਕਰੇਟ ਸਰਵਿਸ ਦੇ ਇੱਕ ਸੂਤਰ ਦੇ ਹਵਾਲੇ ਨਾਲ ਕਿਹਾ ਕਿ ਸ਼ੂਟਰ ਨੂੰ ਵੀ ਸੀਕਰੇਟ ਸਰਵਿਸ ਨੇ ਮਾਰ ਦਿੱਤਾ ਹੈ।
ਸੂਤਰਾਂ ਨੇ ਦ ਨਿਊਯਾਰਕ ਪੋਸਟ ਨੂੰ ਦੱਸਿਆ ਕਿ ਸ਼ਨੀਵਾਰ ਨੂੰ ਟਰੰਪ ਦੀ ਹੱਤਿਆ ਕਰਨ ਦੀ ਕੋਸ਼ਿਸ਼ ਕਰਨ ਵਾਲੇ ਹਮਲਾਵਰ ਦੀ ਪਛਾਣ 20 ਸਾਲਾ ਥਾਮਸ ਮੈਥਿਊ ਕਰੂਕਸ ਵਜੋਂ ਹੋਈ ਹੈ। ਬੈਥਲ ਪਾਰਕ, ਪੈਨਸਿਲਵੇਨੀਆ ਦੇ ਥਾਮਸ ਨੇ ਪਿਟਸਬਰਗ ਦੇ ਬਿਲਕੁਲ ਬਾਹਰ ਬਟਲਰ ਵਿੱਚ ਇੱਕ ਰੈਲੀ ਵਿੱਚ ਫਾਇਰਿੰਗ ਕੀਤੀ। ਸੂਤਰਾਂ ਨੇ ਦੱਸਿਆ ਕਿ ਥਾਮਸ ਨੂੰ ਬਟਲਰ ਫਾਰਮ ਸ਼ੋਅਗ੍ਰਾਊਂਡ 'ਤੇ ਸਟੇਜ ਤੋਂ 130 ਗਜ਼ ਤੋਂ ਜ਼ਿਆਦਾ ਦੂਰ ਇੱਕ ਮੈਨੂਫੈਕਚਰਿੰਗ ਪਲਾਂਟ ਦੀ ਛੱਤ 'ਤੇ ਦੇਖਿਆ ਗਿਆ।
ਹਮਲਾਵਰ ਦੀ ਪਹਿਲੀ ਤਸਵੀਰ
ਹਾਲਾਂਕਿ ਕਥਿਤ ਸ਼ੂਟਰ ਦੀਆਂ ਫੋਟੋਆਂ ਇੰਟਰਨੈਟ 'ਤੇ ਸਾਹਮਣੇ ਆਈਆਂ ਹਨ। ਇਸ ਵਿੱਚ ਉਸ ਨੂੰ ਗੋਲੀਬਾਰੀ ਤੋਂ ਕੁਝ ਪਲ ਪਹਿਲਾਂ ਤੇ ਸੀਕ੍ਰੇਟ ਸਰਵਿਸ ਏਜੰਟਾਂ ਦੁਆਰਾ ਗੋਲੀ ਮਾਰਨ ਤੋਂ ਬਾਅਦ ਉਸ ਦੀ ਇੱਕ ਖੂਨ ਨਾਲ ਭਿੱਜੀ ਫੋਟੋ ਦਿਖਾਈ ਗਈ ਹੈ। ਗੋਲੀਬਾਰੀ ਕਰਨ ਵਾਲਾ ਕਥਿਤ ਤੌਰ 'ਤੇ ਰੈਲੀ ਸਟੇਜ ਦੇ ਨੇੜੇ ਛੱਤ 'ਤੇ ਲੁਕਿਆ ਹੋਇਆ ਸੀ। ਜਿਵੇਂ ਹੀ ਉਸ ਨੇ ਸਾਬਕਾ ਰਾਸ਼ਟਰਪਤੀ ਟਰੰਪ 'ਤੇ ਗੋਲੀਬਾਰੀ ਕੀਤੀ, ਉਸ ਨੂੰ ਤੁਰੰਤ ਸੀਕ੍ਰੇਟ ਸਰਵਿਸ ਕਾਊਂਟਰ ਸਨਾਈਪਰਾਂ ਨੇ ਮਾਰ ਦਿੱਤਾ।
ਟਰੰਪ ਦੇ ਕੰਨ 'ਤੇ ਲੱਗੀ ਸੱਟ
ਹਮਲੇ ਦੌਰਾਨ ਟਰੰਪ ਦੇ ਕੰਨ 'ਤੇ ਸੱਟ ਲੱਗੀ ਸੀ ਪਰ ਸੀਕ੍ਰੇਟ ਸਰਵਿਸ ਦੁਆਰਾ ਉਨ੍ਹਾਂ ਨੂੰ ਤੁਰੰਤ ਸਟੇਜ ਤੋਂ ਹਟਾ ਦਿੱਤਾ ਗਿਆ ਤੇ ਇੱਕ ਮੋਟਰ ਕਾਫ਼ਲੇ ਵਿੱਚ ਲਿਜਾਇਆ ਗਿਆ। ਰੈਲੀ ਵਿੱਚ ਮੌਜੂਦ ਇੱਕ ਹੋਰ ਦਰਸ਼ਕ ਦੀ ਹਾਲਤ ਨਾਜ਼ੁਕ ਦੱਸੀ ਜਾ ਰਹੀ ਹੈ।