ਤੇਲ 'ਚ ਮਿਲਣ ਵਾਲੀ ਛੋਟ ਰੂਸ ਨੇ ਅਗਸਤ 'ਚ ਘਟਾ ਕੇ 4 ਡਾਲਰ ਪ੍ਰਤੀ ਬੈਰਲ ਕਰ ਦਿੱਤੀ ਸੀ, ਜਿਸ ਤੋਂ ਬਾਅਦ ਭਾਰਤ ਨੇ ਰੂਸ ਤੋਂ ਤੇਲ ਖਰੀਦਣਾ ਘਟਾ ਦਿੱਤਾ। ਜਦੋਂ ਭਾਰਤ ਨੇ ਰੂਸ ਤੋਂ ਤੇਲ ਖਰੀਦਣਾ ਸ਼ੁਰੂ ਕੀਤਾ ਤਾਂ ਉਸ ਨੂੰ ਪ੍ਰਤੀ ਬੈਰਲ ਲਗਭਗ 13 ਡਾਲਰ ਦੀ ਛੋਟ ਮਿਲ ਰਹੀ ਸੀ। ਭਾਰਤ ਤੋਂ ਮੰਗ ਘਟਣ ਦਾ ਰੂਸੀ ਤੇਲ 'ਤੇ ਤੁਰੰਤ ਅਸਰ ਨਜ਼ਰ ਆ ਰਿਹਾ ਹੈ ਕਿਉਂਕਿ ਰੂਸ ਨੂੰ ਹੁਣ ਇਹ ਤੇਲ ਸੱਤ ਡਾਲਰ ਦੀ ਛੋਟ 'ਤੇ ਵੇਚਣਾ ਪੈ ਰਿਹਾ ਹੈ। ਇਹ ਰੂਸ ਲਈ ਬਹੁਤ ਵੱਡਾ ਸਬਕ ਹੈ। ਕਿਉਂਕਿ ਪਿਛਲੇ ਦਿਨੀਂ ਰੂਸ ਨੇ ਭਾਰਤ ਨਾਲ ਰੁਪਏ-ਰੂਬਲ ਵਿੱਚ ਤੇਲ ਦਾ ਵਪਾਰ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ।
ਦੱਸ ਦਈਏ ਕਿ ਰੂਸ ਨੇ ਤੇਲ ਉਤਪਾਦਕ ਦੇਸ਼ਾਂ ਦੇ ਸਮੂਹ ਓਪੇਕ ਪ੍ਰਤੀ ਆਪਣੀ ਵਚਨਬੱਧਤਾ ਦਿਖਾਉਂਦੇ ਹੋਏ ਤੇਲ ਦੇ ਉਤਪਾਦਨ ਨੂੰ ਘਟਾ ਕੇ ਕੀਮਤ ਵਧਾ ਦਿੱਤੀ ਸੀ। ਪਰ, ਇਸ ਨਾਲ ਭਾਰਤੀ ਦਰਾਮਦਕਾਰਾਂ ਦੀ ਮੰਗ ਕਮਜ਼ੋਰ ਹੋ ਗਈ ਹੈ। ਭਾਰਤ ਤੋਂ ਇਲਾਵਾ ਚੀਨ ਤੋਂ ਵੀ ਯੂਰਲ ਕਰੂਡ ਦੀ ਮੰਗ ਘਟੀ ਹੈ। ਦੋ ਵੱਡੇ ਦਰਾਮਦਕਾਰਾਂ ਦੀ ਮੰਗ ਘਟਣ ਕਾਰਨ ਉਰਲ ਕੱਚੇ ਤੇਲ ਦੀਆਂ ਕੀਮਤਾਂ ਤੇਜ਼ੀ ਨਾਲ ਡਿੱਗਣੀਆਂ ਸ਼ੁਰੂ ਹੋ ਗਈਆਂ ਹਨ। ਹਾਲਾਂਕਿ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਯੂਰਲ ਕਰੂਡ ਦੀ ਕੀਮਤ 60 ਡਾਲਰ ਪ੍ਰਤੀ ਬੈਰਲ 'ਤੇ ਸਥਿਰ ਹੋ ਸਕਦੀ ਹੈ।
ਉਧਰ ਦੂਜੇ ਪਾਸੇ ਸਿੰਗਾਪੁਰ 'ਚ ਭਾਰਤੀ ਮੂਲ ਦੇ ਬਾਲਕ੍ਰਿਸ਼ਨਨ ਗੋਵਿੰਦਾਸਵਾਮੀ 'ਤੇ 1.5 ਮਿਲੀਅਨ ਡਾਲਰ ਦੀ ਰਿਸ਼ਵਤ ਲੈਣ ਦਾ ਦੋਸ਼ ਲੱਗਾ ਹੈ। ਗੋਵਿੰਦਾਸਵਾਮੀ ਇੱਕ ਇੰਜੀਨੀਅਰਿੰਗ ਕੰਪਨੀ ਦੀ ਵਪਾਰਕ ਬਾਂਹ ਵਿੱਚ ਇੱਕ ਕਾਰਜਕਾਰੀ ਹੈ। ਉਸ ਨੇ ਆਪਣੀ ਕੰਪਨੀ ਲਈ 9 ਵੱਖ-ਵੱਖ ਕੰਪਨੀਆਂ ਦੇ ਠੇਕੇਦਾਰਾਂ ਤੋਂ ਰਿਸ਼ਵਤ ਲਈ ਸੀ। ਸਿੰਗਾਪੁਰ ਦੀ ਭ੍ਰਿਸ਼ਟਾਚਾਰ ਵਿਰੋਧੀ ਏਜੰਸੀ ਕਰੱਪਟ ਪ੍ਰੈਕਟਿਸ ਇਨਵੈਸਟੀਗੇਸ਼ਨ ਬਿਊਰੋ ਨੇ ਬੁੱਧਵਾਰ ਨੂੰ ਅਦਾਲਤ 'ਚ ਗੋਵਿੰਦਾਸਵਾਮੀ ਖਿਲਾਫ ਚਾਰਜਸ਼ੀਟ ਪੇਸ਼ ਕੀਤੀ। ਗੋਵਿੰਦ ਸਵਾਮੀ ਨੂੰ 75 ਹਜ਼ਾਰ ਡਾਲਰ ਦਾ ਜੁਰਮਾਨਾ ਅਤੇ 5 ਸਾਲ ਦੀ ਸਜ਼ਾ ਹੋ ਸਕਦੀ ਹੈ।
ਇਸਤੋਂ ਇਲਾਵਾ ਅਮਰੀਕਾ ਦੇ ਹਵਾਈ ਰਾਜ ਦੇ ਲਹਾਨੀਆ ਕਸਬੇ ਦੇ ਜੰਗਲ ਦੀ ਅੱਗ ਦੀ ਲਪੇਟ ਵਿਚ ਆਉਣ 'ਤੇ ਫਾਇਰ ਸਾਇਰਨ ਨਾ ਵਜਾਉਣ ਲਈ ਆਲੋਚਨਾ ਦਾ ਸਾਹਮਣਾ ਕਰਨ ਤੋਂ ਬਾਅਦ ਐਮਰਜੈਂਸੀ ਪ੍ਰਬੰਧਨ ਏਜੰਸੀ ਦੇ ਮੁਖੀ ਹਰਮਨ ਅੰਦਾਯਾ ਨੇ ਅਸਤੀਫਾ ਦੇ ਦਿੱਤਾ। ਅੰਦਾਯਾ ਨੇ ਇਕ ਦਿਨ ਪਹਿਲਾਂ ਕਿਹਾ ਸੀ ਕਿ ਸਾਇਰਨ ਵਜਾ ਕੇ ਲੋਕਾਂ ਨੂੰ ਸੁਚੇਤ ਨਾ ਕਰਨ ਦੇ ਫੈਸਲੇ 'ਤੇ ਉਨ੍ਹਾਂ ਨੂੰ ਕੋਈ ਪਛਤਾਵਾ ਨਹੀਂ ਹੈ। ਲਹਾਨੀਆ ਕਸਬੇ ਵਿੱਚ ਅੱਗ ਲੱਗਣ ਕਾਰਨ ਕਰੀਬ 2100 ਘਰ ਸੜ ਕੇ ਸੁਆਹ ਹੋ ਗਏ ਸਨ, ਜਿਸ ਵਿੱਚ ਕਈ ਲੋਕਾਂ ਦੀ ਮੌਤ ਹੋ ਗਈ ਸੀ। ਵੀਰਵਾਰ ਤੱਕ 111 ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਹੋ ਚੁੱਕੀ ਹੈ।